AGENDA BATAK

Bagian Parjolo

 I. Parturena di parjamitaan jumpa ari Minggu.

Marende :

Paragenda:

Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen.

Jahaon sada ayat na tongon tu ganup Minggu manang tu ari Pesta.

(Buaton sian angka ayat-ayat na tarsurat di bagian paduahon A. Ihut tu ayat i dohonon "Haleluya").

Huria:

Haleluya ! Haleluya ! Haleluya !

Martangiang:

Jahaon sada tangiang na tongon tu ganup Minggu manang tu ari Pesta, buaton sian na tarsurat di bagian paduahon D.

Marende :

Paragenda: Tangihon hamu ma Patik ni Debata.

               I.            Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

             II.           Ndang jadi ganaonmu jala ndang jadi sumanonmu manang aha na di banua ginjang dohot na di banua tonga on, ro di na di bagasan aek na di toru ni tano, ianggo tung gabe sisombaon manang sioloan.

            III.          Ndang jadi dohonon goar ni Debata, ianggo so ture dalanna, ai hona uhum­Na do sogot angka na marsineang di GoarNa.

           IV.           Ingot hamu ma pabadiahon ari Minggu i ! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anak­mu pe manang borum manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadiai.

           V.          Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho.

                        VI.            Unang ho mamunu !

            VII.            Unang ho mangalangkup !

            VIII.            Unang ho manangko !

            IX.            Unang ho olo manghatindangkon hata na so tutu maralohon dongan jolma.

           X.          Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru manang lombuna manang hodana, manang dia pe ugasan ni donganmu.

Beha pandok ni Debata taringot tu Patik na sampulu i ?

On do: Ahu do Jahowa Debatam, ninna Debatanta. Pargogo na so hatudosan jala Parrimas, Siluluhon dosa ni ama-ama tu pinomparna, ro di sundut patoluhon, ro di sundut paopathon, pinompar ni angka na sogo roha di Ahu; alai asi do rohangKu di angka na marribu-ribu, angka na marholong ni roha di Ahu, na so mangalaosi PatikHi (Manang pamilliton sian Katechismus i singkat ni Patik ondeng).

Huria mandok:

Ale Tuhan Debata ! Sai pargogoi ma hami mangulahon na hombar tu PatikMi.

Marende :

Paragenda:

Tatopoti ma dosanta ! (Jahaon ma tangiang on manang na asing sada taringot tu panopotion di dosa na tarsurat di bagian paduahon B).

Ale Amanami na di banua ginjang, Parasi roha mida halak na dangol ! Na ro do hami pardosa tu joloM, manopoti dosanami na godang i. Na tarsolsol bagi do hami nueeng, ala jotjot hubahen hami sogo ni rohaM. Tama situtu do hona uhum hami ala ni i ! Tung lambas ni rohaM sambing do umbahen so mago hami. On pe asi ma rohaM di hami, sai unang uhumi hami; sai sesa ma dosanami sudena, ala naung use mudar ni Anak haholongan ni rohaM di dolok Golgatha. Amen.

Paragenda:

(Tabege ma hata bagabaga taringot tu hasesaan ni dosa    - Ida na tarsurat di bagian paduahon C).

Marende :

Paragenda:

Tabege ma Hata ni Debata turpuk ni ari Minggu on. (Tinutup turpuk dohot hata: Martua do angka na tumangihon Hata ni Debata, jala na umpeopsa. Amen).

Marende :

Paragenda :

Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

Ahu porsea di Debata Jahowa, i do Ama, Pargogo na so hatudosan na tumompa langit dohot tano.

Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patolubon, na manaek tu surgo laho hundul tu siamun ni Debata Jahowa, AmaNa i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda.

Tingting:

Marende Huria huhut papungu pelean:

Jamita:

Marende Huria:

Paragenda:

a. Tatangianghon ma peleanta:

Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus.

Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on.

Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandak mauliate tu Ho, marhitehite Jesus Kristus Tuhannami. A m e n .

b. Ende Pelean:

.(Jahaon ma sada tangiang, na tongon tu ari Minggu manang tu ari Pesta, Ida di bagian paduahon E). Udutna'

Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! Palua ma hami sian pangago !

Endehononhon:

Ai Ho do nampuna harajaon dohot hagogoon ro di hasangapon saleleng ni lelengna. A m e n !

Paragenda:

Dipasupasu jala diramoti Tuhan Debata ma ho (hita) ! Disondangkon Tuhan Debata ma bohiNa tu ho (hita) jula asi ma rohaNa mida ho (hita)! Didompakhon Tuhan Debata ma bohiNa tu ho (hita) jala dipasaorhon ma dameNa tu tondim (tondinta be). A m e n .

Marende Huria: 

II. Pandidion tu dakdanak

Marende:

Martangiang:

Ale Amanami na di banua ginjang ! Na ro do hami tu joloM mamboan angka dakdanak on. Sai asi ma rohaM, jalo ma nasida gabe anakhonMu; pasupasu jala pargogoi ma nasida mangeahi hangoluan sogot marhitehite Tuhan Jesus Kristus. Amen !

Hata Sipaingot:

Antong hamu angka dongan, na mamboan dakdanak sididion on, tangihon hamu ma Hata ni Tuhan Jesus: Laho ma hamu tu liat portibi on, ninna mandok angka siseanNa, podai hamu ma saluhut bangso, didi hamu ma nasida tu bagasan Goar ni Debata Ama dohot Anak dohot Tondi Parbadia, ajari hamu ma nasida mangaradoti saluhut na hutonahon i tu hamu. Jala ingot ma, sai dongananKu do hamu ganup ari rasirasa ro ajal ni hasiangan on. Manang ise na porsea dohot nididi dapotan hangoluan, alai na so porsea hona uhum sogot. Tangihon hamu ma dohot Hata na tarsurat di surat ni si Markus: Adong ma angka na mamboan dakdanak tu Tuhan Jesus, asa dijama; alai dipinsang angka siseanNa i ma na mamboan i. Jadi dung diida Tuhan Jesus i, sogo ma rohaNa, didok ma: Loas hamu ma angka dakdanak i ro tu Ahu, unang orai hamu nasida, ai di angka sisongon i do harajaon ni Debata. Na tutu do na hudok on tu hamu: Manang ise pe anggo so songon dakdanak ibana manjalo Harajaon ni Debata, ndang bongot ibana tusi. Dung i dihaol ma angka dakdanak i, diampehon ma tanganNa tu nasida mamasumasu nasida.

Pandita:

Hatindangkon hamu ma jolo haporsesonta i !

Ahu porsea d.u.

Antong alusi hamu ma hata na husungkunhon on:

1.         Dipangido hamu nuaeng didion angka dakdanak on tu bagasan ni na hinaporseaanmuna ?

       Alusna: Dipangido rohanami.

2.         Beha, na olo do hamu mamodai anakhonmuna on, asa diboto jala diihuthon nasida Hata ni Debata ?

       Alusna: Na olo do hami.

3.         Na olo do hamu marsuru nasida tu gareja dohot tu parguruan ni Huria Protestant, asa gabe ruas na mangolu nasida di Tuhan Jesus Kristus ?

       Alusna: Na olo do hami.

Pandidion:

Antong tapasahat ma nasida tu Debata marhitehite pandidion na badia i:

Ale si Anu ! Hudidi ma ho tu bagasan Goar ni Debata Ama dohot tu bagasan (loar ni AnakNa Tuhan Jesus Kristus, dohot tu bagasan Goar ni Tondi Parbadia. A m e n .

Diampehon Pandita i ma tanganna  tu ulunaslida huhut ma didok: Sai diramoti Debata ma ho di habobongotmon tu bagasan Harajaon ni Debata ro di saleleng ni lelengna.

Martangiang:

Ale Tuhan Debata, Amanami marhitehite Tuhan Jesus Kristus Tuhannami. Nunga hupasahat hami angka dakdanak on tu Ho, jala dijangkon Ho do nasida gabe anakhonMu marhitehite pandidion na badia i, asa masuk tu Huria ni halak Kristen nasida di tano on jala gabe panean di hangoluan na saleleng ni lelengna. Asi ma rohaM dohot di angka natoras ni dakdanak on. Sai pargogoi jala ajari ma nasida manogunogu dakdanak on tu Ho. Asa rap nasida taruli di angka arta ni harajaonMu.

Ale Amanami na di banua ginjang ! Sai pinarbadia ma Goarmu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! Palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna. A m e n !

Pandita:

Dipasupasu jala diramoti Tuhan Debata ma ho ! Disondangkon Tuhan Debata ma bohiNa tu ho jala sai asi ma rohaNa mida ho ! Didompakhon Tuhan Debata ma bohiNa tu ho jala dipasaorhon ma dameNa tu tondim. A m e n.

III. Pandidion na hinipu

Paragenda:

Marhitehite Goar ni Debata Ama dohot Goar ni AnakNa Tuhan Jesus Kristus dahot Goar ni Tondi Parbadia. Amen !

Dipangido hamu nuaeng didion dakdanakmuna on tu bagasan ni na hinaporsesan ni Huria Protestan ?

Alusna: Dipangido rohanami do.

Pandidion:

Ale si Anu ! Hudidi ma ho tu bagasan Goar ni Debata Ama dohot tu bagasan Goar ni AnakNa Tuhan Jesus Kristus dohot tu bagasan Goar ni Tondi Parbadia. A m e n.

Paragenda:

Ale Tuhan Debata, Pargogo na so hatudosan, Ama ni Tuhan Jesus Kristus Tuhannami ! Asi ma rohaM di dakdanak on, sai sahat tu tanganMu ma ibana, mangolu manang mate pe. Huboto hami, jonok do Ho di lambung ni angka na manjou GoarMu jala ditangihon Ho do nasida. Dibahen i sai asi ma rohaM, sai pangolu ma dakdanak on, molo tung i na hombar tu lomo ni rohaM; alai molo tung laos na mangalap nama Ho di tondina, pamasuk ma ibana tu banua ginjang, tu hangoluan na saleleng ni lelengna, marhitehite hamatean ni AnakMu Tuhan Jesus Kristus Tuhannami. Angkup ni i, papos ma roha ni natorasna dohot roha ni angka sisolhotna tu Ho. A m e n .

Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! Palua ma hami sian pangago ! Ai Ho do nampuna Harajaon dohot hagogoon ro di hasangapon saleleng ni lelengna. A m e n .

(Molo laos hipas muse dakdanak i, diboan natorasna ma ibana tu gareja di na tardidi angka posoposo na asing).

IV. Manjangkon parguru na naeng tardidi

Marende:

Sipaingot tu angka parguru i: Hamu ale dongan ! Dipangido hamu naeng masuk tu Huria ni Tuhan Jesus Kristus gabe halak Kristen. Las do rohanami manjalo hamu. Pangidoan na denggan do pangidoanmuna i asa saor hamu tu hami, tu huria ni halak Kristen na badia i. Ia na sinangkapmuna: Naeng tandaonmuna Debata na sintong i jala naeng masuk hamu tu hangoluan sogot. Ala ni i ingotonmuna ma on:

a.          Margoar "parguru" dope hamu nuaeng. Dung salpu manang sadia leleng, "tardidi" ma hamu, asa targoar "Kristen" jala saor dohot hami.

b.          Guruhononmuna ma Patik dohot Hata ni Debata, asa diboto hamu, ma­nang dia na jadi dohot na so jadi. Patuduhononnami ma tu hamu dalan tu hangoluan.

c.          Pungka hamu ma nuaeng mangorom subang dohot pasidinghon na so jadi. Unang be mamele begu, unang be mamurai, unang be manangko, unang be mamunu, unang margabus, unang marjuji (unang marsandu), unang mangalangkup d.l.n. Molo olo hamu pasidingkon i, goaronnami ma hamu "parguru".

Antong, ia bulus rohamuna mangoloi dok hamu ma:  Olo.

Tangiang:

Ale Tuhan Debata jela Amanami ! Na ro do dison angka dongan naeng masuk tu huriaM. Mauliate ma rohanami tu Ho ala diungkap Ho pintu hamasuhan di angka dongan on. Sai asi ma rohaM ramoti jala pasupasu ma nasida, asa sanga nasida bongot tu HuriaM na badia i. Sai ajari jala togutogu ma nasida mangihuthon Tuhan Jesus Kristus Tuhannami. A m e n .

Ale Amanami d.u.

Pasupasu:

Marende :

V.  Pandidion tu na magodang

Marende:

Asi ni roha ni Tuhanta Jesus Kristus dohot holong ni roha ni Debata Ama dohot parsaoran ni Tondi Parbadia i ma mandongani hamu ! A m e n .

Hamu angka na pinarhamaol ni Debata, nunga dijangkon hamu Hata ni Debata, na pinodahon tu hamu. Tama do mandok mauliate hamu tu Debata sian nasa rohamuna ala ni sude asi dohot holong ni rohaNa tu hamu. Ai diboto hamu nuaeng, ndang pola mago be hamu ala ni dosamuna, molo porsea hamu di panghophopon ni Tuhan Jesus Kristus.

Antong timbang hamu ma di bagasan rohamuna: Na olo do hamu nuaeng manadingkon sude dosa huhut mangihuthon Hata ni Debata tu joloan on. Dung tardidi hamu annon, tanda ni parpadananmuna do i tu Debata, na olo do Ibana manesa dosamuna saluhutna jala mangalehon gogo tu hamu mangalo sibolis dohot nasa dosa: gabe partohap ma hamu di hangoluan na saleleng ni lelengna.

Tangiang:

Ale Amanami na di banua ginjang, diida Ho do angka dongan on, na naeng tardidi. Dibereng Ho do tu bagasan rohanasida jala diboto Ho do, manang na burju rohanasida manang sipaulaula. Asi ma rohaM. Sai pargogoi ma nasida, asa lam diboto nasida manggotaphon nasa roha dohot pangalaho na so ture. Ale Tuhan Jesus ! Sai sesa ma saluhut dosanasida marhitehite mudarMu, suru ma Tondi Parbadia i tu rohanasida be, asa tarhangoluhon nasida haporseaon na sintong i saleleng di tano on jala masuk sogot tu banua ginjang. A m e n .

Tangihon hamu jolo Hata ni Tuhan Jesus, na nidokNa i di na laho manaek tu banua ginjang i Ibana. Nunga sahat tu Ahu nasa huaso na di banua ginjang dohot na di tano on. Laho ma hamu, podai hamu ma saluhut bangso, didi hamu ma nasida tu bagasan Goar ni Ama, Anak dohot Tondi Parbadia. Manang ise na porsea jala tardidi dapotan hangoluan do, alai nasa na so porsea hona uhum sogot.

On pe hupamanat ma nueeng haporseaonmuna, asa dibege Huria na pungu nuaeng dison. Tangkas ma alusi hamu hata na husungkunhon on:

1.         Diparhatutu roham do, pardosa ho sian hatutubum dohot sian pangalao­sim di Patik ni Debata ?

       Alusna: Diparhatutu rohangku do.

2.         Beha, diarsakhon roham do sude dosa na niulam nasailaon i ?

Alusna: Diarsakhon rohangku do.

3.         Na olo do ho manggotaphon sian roham nasa dosa dohot pambahenan na so ture nasailaon ?

Alusna: Na olo do ahu.

  

4.         Diparhatutu roham do, Tuhan Jesus Kristus ro tu tano on jala matedi hau na pinarsilang, asa malua hita sian dosa dohot sian gomgoman ni sibolis i?

Alusna: Diparhatutu rohangku do.

5.         Na olo do ho ringgas marsaor tu Debata, asa gabe ruas na mangolu ni Huria Kristen Protestant ho manghatindanghon haporseaonna sintong i?

Alusna: Na olo do ahu.

  

6.         Antong hatindanghon hamuma haporseaonta i :

Ahu porsea d.u.

7.         Olo do hamu didion tu bagasan ni nahinaporseaanmuna i?

Alusna: Olo.

Pandidion:

Ale si Anu ! Hudidi ma ho tu bagasan Goar ni Debata Ama dohot tu bagasan Goar ni AnakNa, Tuhan Jesus Kristus, dohot tu bagasan Goar ni Tondi Parbadia. A m e n .

Pasupasu:

Sai diramoti Debata ma ho di habobongotmon tu bagasan harajaonNa ro di saleleng ni lelengna. Amen.

Marende :

Martangiang:

Ale Tuhan Debata, Amanami na marasi roha i ! Na mandok mauliate do hami nuaeng tu Ho, ala naung dijalo Ho angka dongannami on gabe anakhonMu, marhitehite pandidion na badia i. Asi ma rohaM, sai pahot ma haporseaonnasida, asa dohot parangenasida mamuji GoarMu na badia i, asa unang mago nanggo sada sian nasida, alai asa sahat nasida sogot tu hangoluan na so ra suda marhitehite Tuhan Jesus Kristus Tuhannami.

Ale Amanami na di banua ginjang! Sai pinarbadia ma GoarMu ! Sai ro ma harajaonMu! Sai saut ma lomo ni rohaM di banua tonga on, songon na di banua ginjang! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan, na mardosa tu hami ! Unang hami togihon tu pangunjunan ! Palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna. Amen.

Pasupasu:

Dipasupasu jela diramoti Tuhan Debata ma ho! Disondangkon Tuhan Debata ma bohiNa tu ho, jala asi ma rohaNa mida ho! Sai didompakhon Tuhan Debata ma bohiNa tu ho jala dipasaorhon ma dameNa tu Tondim ! Amen.

Marende:

VI. Manghatindanghon haporseaon.

Marende:

Marhitehite Goar ni debata Ama, Anak dohot Tondi Parbadia. Amen. Hamu, ale natoras ni dakdanak on, diida hamu do ianakhonmuna, haholongan ni rohamuna, jongjong dison. Tama jumolo mandok mauliate hamu sadarion tu Debata ala ni sude asi ni rohaNa nasailaon, ai dipangolu do nasida rasirasa nuaeng jala sanga diboto nasida Hata ni Debata dohot dalan tu hangoluan. Alai tama do ingotonmuna sadari on angka pambahenanmuna tu ianakhonmuna on. Ai ndang dilehon Debata angka dakdanak on tu hamu, asa adong pagodanggodan-gonmuna mangula ulaon sambing, alai asa ditohu jala diajari hamu do nasida mangihuthon Hata ni Debata, ido umbahen nadilehon. Ditangianghon hamu do ganup ari ianakhonmuna on nasailaon, asa unang mago nasida? Molo dihilala hamu nuaeng hurang ni pambahenan muna taringot tu angka ianakhonmuna on, tama unduk hamu tu Debata manopoti salamuna.

Paragenda:  Antong martangiang ma hita !

Ale Amanami, Ama ni nasa na targoar ama di banua ginjang dohot di tano on ! Sai tangihon ma tangiangnami on, jangkon ma angka dakdanak on gabe ianakhonMu ! Asi ma roham, lehon ma Tondi Parbadia i tu rohanasida, asa gabe siseanMu nasida ro di saleleng ni lelengna. Molo tung na hurang pambahenannami nasailaon tu nasida, sai sesa ma i, sai unang ma targasip nasida, jala unang loas mago manang ise nasida binahen ni pangalahonami i. Asi ma rohaM, sahat tu tanganMu ma nasida marhitehite AnakMu Tuhan Jesus Kristus Tuhannami. Amen.

Marende:

Hamu angka dakdanak na hinaholongan ni Debata ! Na jongjong do hamu nuaeng di jolo ni Debata, na mamereng torus tu bagasan rohamuna, dohot di jolo ni Huria on. Nunga diboto hamu lomo dohot sogo ni roha ni Debata, ndang tarbahen hamu be marsidalian sogot di ari paruhuman i. Molo ingot rohamuna di angka ari ni ngolumuna naung salpu i, tama mandok mauliate hamu tu Debata ala ni sude asi ni rohaNa. Jala molo diingot hamu angka pambahenanmuna na so ture, i ma neang dohot langgus ni rohamuna tu natorasmuna, ro di saluhut dosamuna, tama marsak be hamu sadari on marningot i. Boan hamu ma luhutna tu Tuhan Jesus, asa disesa i ala ni mudarNa, na use humophop pardosa na manopoti dosana. Alai pauba hamu ma rohamuna, huhut pungka hamu ma parange na imbaru olat ni sadari on, asa dalananmuna dalan na gogot i, na marhapatean tu hangoluan sisaleleng ni lelengna.

Antong alusi hamu ma na husungkunhon on tu hamu di jolo ni Debata dohot di jolo ni angka dongan na pungu dison.

1.         Diparhatutu roham do hata ni Debata, naginuruhonmu nasailaon holan i do dalan tu hangoluani?

Alusna: Diparhatutu rohangku do!

2.         Olo do ho sian nasa roham tumundalhon saluhut dosa jala olo do ho tu jooan on mangihuthon hata ni Debata ro di hasusuda ni bohalmu?

Alusna: Na olo do ahu!

3.         Olo do ho manghangoluhon haporseaon na sintong i, na hinatindanghon ni Huria Kristen Protestant songon na tarsurat di Padan na Robi dohot di Padan na Imbaru?

Alusna: Na olo do ahu !

Antong, marpadan do hamu nuaeng dohot Debata na badia i di jolo ni Huria on, tung unang ose hamu, sai burju ma hamu marningot saluhutna i, asa lam hot haporseaonmuna.

Marende :

Tangiang:

Ale Amanami jala Debatanami ! Suru ma Tondi Parbadia tu rohanami be, marhitehite Tuhan Jesus Kristus. Hulehon hami ma rohanami bahen ingananMu olat ni on ro di saleleng ni lelengna. Surathon jala sahapi ma tusi sude, naung huoloi hami. Sai paujung ma ulaon na pinungkaMi di bagasan rohanami. Ramoti ma hami sasudena, unang tu hamagoan sogot manang ise sian hami on. Togu jala iringiring ma hami ganup ari, asa sahat hami tu hangoluan na so ra suda marhitehite AnakMu Tuhan Jesus Kristus Tuhannami. Amen.

Antong hatindangkon hamu ma jolo haporseaonmuna !

Ahu porsea d.u.

Marende :

Pasupasu:

Jalo hamu ma pasupasu ni Tuhan Debata Amanta i dohot AnakNa Tuhan Jesus Kristus dohot Tondi Parbadia. Sai didongani ma hamu maralohon nasa na jat, jala dipargogoi ma hamu patupahon nasa na denggan. Amen.

Marende :

Hamu angka na pinarhamaol ni Debata, nunga gabe dongan sahuria jala dongan sapanganan hamu manganhon parpadanan na badia i. Na arga situtu do hamu ditobus, unang oloi hamu be dosa dohot sibolis. Ramotan ni Debata do hamu maralohon pangago i, asal ma tongtong rohamuna tu Ibana jala togihononNa do hamu masuk tu harajaon banua ginjang i.

Paragenda: Antong martangiang ma hita!

Ale Amanami na di banua ginjang, asi ma rohaM di nasida angka napinasahat nuaeng to Ho! Sai ramoti ma nasida marhitehite Tondi Parbadia, sai pahot ma nasida di bagasan padan naung nialonasida nangkin. Sai parbadiai ma nasida di bagasan HataM, asa tarida haporseaonnasida tu joloan on marhitehite parange na denggan! Amen. Ale Amanami d.u.

Pasupasu:

Asi ni roha ni tuhan Jesus Kristus, dohot holong ni roha ni Debata Ama dohot parsaoran ni Tondi Parbadia i ma mandongani hamu! Amen.

Marende:

VII. Pabagashon

Marende:

Marhitehite Goar ni Debata Amanta dohot Goar ni Anakna Tuhan Jesus Kristus dohot Goar ni Tondi Parbadia. Amen.

Martangiang:

Ale Tuhan Debata Amanami na di banua ginjang! Ho do namangaturhon pardongan saripeon i. Diida Ho do dongannami on na marsangkap naeng marbagas. Jala na ro do nasida mangido pasupasuM. Antong sai tatap ma nasida di bagasan asi ni rohaM, pasupasu jala ramoti ma nasida marhitehite pangkaholongiM. Rajai ma nasida marhitehite Tondi Parbadia asa mamungka jala marujung di bagasan dame pardongansaripeonnasida i. Tangihon ma tangiangnami on ala ni asi dohot holong ni rohaM. Amen.

Marjamita:

Hamu ale angka na pinarhamaol ni Debata, ditahi rohamuna do nuaeng naeng marbagas (alai ndang tama halak Kristen marbagas songon sipelebegu). Antong tangihon hamu ma jolo Hata ni Debata taringot tu ruhut ni pardongansaripeon ni halak Kristen. Dung ditompa Debata jolma i, didok Ibana ma: Ndang denggan sasada baoa i punjung, hubahen ma di ibana sada boruboru pangurupi di ibana bahen angkupna. Angkup ni i didok Tuhan Jesus: Ganup na paulakhon na niolina, ia so ala ni na marmainan, na palangkuphonsa do ! Pangalangkup do nang na mambuat na sirang i ! Antong na pinadomu ni Debata, ndang jadi sirangon ni jolma.

Songon on do didok Debata tu baoa i: Hamu angka baoa, haholongi hamu ma pardihutamuna be songon Kristus, na mangkaholongi Huria i jala na mangalehon diriNa humophopsa. Unang muruk hamu dompak nasida, ingkon marroha hamu mandongani nasida, sangap bahen hamu nasida songon dongan panean di hangoluan na so ra suda.

Dung i songon on do didok Hata ni Debata tu angka boruboru: Dioloi angka parompuan ma baoana be songon pangoloina di Tuhan i ! Ai baoa i do ulu ni pardihutana songon Kristus ulu ni Huria i. Ingkon bontor, porman, toman, mardongan halambohon dohot hamenahon ni tondi parange ni boruboru i. I ma na arga di jolo ni Debata dohot di jolo ni jolma.

Antong, songon angka na marparangehon Hata ni Debata ma hamu ! Sumolukhon parasinirohaon dohot habasaron dohot haserepon ni roha ma hamu. Masipauneunean ma hamu dohot masiasiasian ! Saluhut riting ni roha, muruk, rimas, panonggahion dohot panginsahion i, dao ma sian hamu. Alai di ginjang ni saluhutna i masihaholongan ma hamu, ai i do rahutrahut ni na sun denggan. Dung i dame na sian Debata, i ma mangarajai di bagasan rohamuna. Jala saluhut na binahenmuna marhitehite hata manang pambahenan tongtong ma i marhitehite Goar ni Tuhan Jesus, asa Ibana mangarajai rohamuna dohot ulaonmuna.

Antong nunga dibege hamu Hata ni Debata taringot tu ruhut ni pardongansaripeon i.

Na manungkun ma ahu nuaeng jumolo di ho, ale pangoli si. . . Olo do ho manghajongjongkon di jolo ni Debata, na umboto saluhut, dohot di jolo ni angka dongan na pungu dison, na dipangido roham do si .... na niriritmon gabe donganmu saripe ? Olo do ho mangkaholongi ibana sian nasa roham dohot mangulahon sian nasa gogom, huhut marparangehon parange na badia rap dohot ibana; na olo do ho manganjuanju dohot hagaleonna, tung sura humurang parangena, jala na so tupa paulahonmu manang tadingkononmu ibana paima disirang hamatean hamu sogot ?

Molo naung sada roham mangoloi saluhutna i dok ma: Olo !

Na manungkun ma ahu dohot di ho, ale inang si .... niririt ni si ... on bahen donganna saripe: Na olo do ho manghajongjongkon di jolo ni Debata na umboto saluhut, dohot di jolo ni dongan na pungu dison na dipangido roham do si .... on, gabe sinondukmu ? Olo do ho mangkaholongi ibana sian nasa roham dohot marpangalaho na ture maradophon ibana dohot marparangehon parange na badia, paboa halak Kristen ho; jala na so tupa mahilolong ho manang tadingkononmu ibana, paima disirang hamatean hamu sogot ?

Molo naung sada roham mangoloi saluhutna i, dok ma: Olo !

Antong masilehonan tangan siamun ma hamu paboa hot ni padanmuna: Naposo ni Debata do ahu, na mamboan HataNa tu hamu. Marhitehite Goar ni Debata Ama, Anak dohot Tondi Parbadia do ahu mandok: Na pinadomu ni Debata ndang jadi sirangon ni jolma.

Pasupasu:

Dipasupasu jala diramoti Tuhan Debata ma hamu ! Disondangkon Tuhan Debata ma bohiNa tu hamu jala asi ma rohaNa di hamu. Didompakhon Tuhan Debata ma bohiNa tu hamu jala dipasaorhon ma dameNa tu tondimuna be. Amen.

Marende:

Martangiang:

Ale Amanami na di banua ginjang ! d.u.

Pasupasu:

Asi ni roha ni Tuhan Jesus Kristus dohot holong ni roha ni Debata Ama dohot parsaoran ni Tondi Parbadia ma mandongani hamu ! Amen.

Marende:

VIII. Patujolo ni ulaon na badia

Marende: (Ende na tongon tu panopotion ni dosa).

Asi ni roha ma di hamu dohot dame sian Debata Amanta dohot sian Tuhanta Jesus Kristus.

Martangiang:

Marjamita:

Pandita mandok:

Hamu ale dongan, na pinarhamaol ni Debata ! Tasangkap do naeng manganhon parpadanan na badia i. Ala ni i ma umbahen huapoi hamu, asa jumolo tatimbang parturena, manang na tau dohot hita manganhon. Ai didok Hata ni Debata: Ingkon jolo ditangkasi jolma i dirina, dung pe i, asa dipangan sagusagu i dohot manginum sian panginuman i. Ai molo so tau ibana, na manganhon dohot manginum uhum na mangonai tu ibana do ibana disi, dibahen na so dipandang rohana daging ni Tuhan i. Dibahen i patangkas hamu ma rohamuna be, manang na tau hamu jala manang naung jumpang di hamu roha na ture, songon na pinangido ni Tuhan Jesus sian angka na naeng marulaon na badia. Ai holan angka na unduk roha jala na manolsoli rohana ala ni pambahenanna na so ture i, jala na manopoti dosana, jala na porsea di hasesaan ni dosa, na pinatupa ni Tuhan Jesus, i do na tau manganhon. Ingot hamu ma jolo Hata ni Tuhan Jesus, na mandok: Ingkon haholonganmu Tuhan Debatam sian nasa ateatem dohot nasa hosam dohot nasa roham, i ma Patik parjolo jala na umbalga. Alai doshon i do na paduahon i: Ingkon haholonganmu do donganmu songon dirim. Molo disorminhon ho roham dohot parangem tu Patik ondeng, ndang tarbahen so parhatutuonmu, pardosa ho, ai nunga dilaosi ho Patik i di bagasan roham dohot marhite sian hatam dohot marhite sian pambahenanmu. Dibaheni unang neang roham mandonohi panganon na badia i, jala unang tois pangalahom, unang marpangansi, ai na badia do i. Ingot hamu ma: Ditanda Debata do angka na di Ibana ! Na sumurut ma sian hageduhon, na mandok: Goar ni Kristus. Unang ma lilu rohamuna, ai ndang olo Debata insahan. On pe, manang ise, na so porsea di Tuhan Jesus, jala na neang roha di panghophop ni Tuhan Jesus, jala na olo dope mangulahon dosa, unang ma didonohi na badia i, ai na gabe uhum do i tu ibana. Alai manang ise, na marsak roha ala ni dosana, jala na mangido asi ni roha tu Debata marhitehite Tuhan Jesus, jala na mangido gogo tu Tondi Parbadia, asa lam ias sian dosa, pos ma rohana, dapotsa ma hasesaan ni dosa ala ni panghophop ni Tuhan Jesus. Parpadanan na badia i ma sumahaphon i tu rohamuna.

Dibahen i patangkas hamu ma rohamuna, jala alusi hamu ma na husungkunhon on:

1.         Diparhatutu roham do: halak pardosa ho sian hatutubum dohot ala ni pangalaosim di Patik ni Debata ? Molo diparhatutu roham, dok ma: Olo !

2.         Diparhatutu roham do: tama uhumon ni Debata ho nuaeng dohot sogot ala ni dosam ? Molo diparhatutu roham, dok ma: Clo !

3.         Na marsak do roham ala ni dosam i, jala dipangido roham, naeng malua ho nueeng sian dosam ? Molo songon i roham, dok ma: Olo !

4.         Diparhatutu roham do: Naung ro Tuhan Jesus Kristus tu tano on pangoluhon pardosa; Ibana naung mate jala mulak mangolu humophop ho, mamorsan jala manesa dosam ? Molo songon i diparhatutu roham, dok ma: Olo !

5.         Olo do ho manggotaphon sian roham late ni roha dohot hosom ni roha ? Angkup ni i olo do ho mardenggan dohot halak na mangarsahi ho, jala olo do ho manesa dosa ni donganmu, songon na pinangido ni roham sesaon ni Debata sude dosam ? Molo songon i roham, dok ma: Olo !

6.         Olo do ho tu joloan on mangalo nasa dosa huhut mangihuthon Hata ni Debata sian nasa roham ? Molo songon i roham, dok ma: Olo !

Antong, tapaunduk ma nuaeng rohanta be jala tatopoti ma sude dosanta ! Ihuthon hamu ma tangiang on di bagasan rohamuna be !

Ale Tuhan Debata na badia jala Amanami, na maringanan di banua ginjang, jala na maringanan di lambung ni angka na bojok jala na serep marroha ! Parasi roha na sumurung do Ho ! Halak na dangol jala pardosa godang do anggo hami, ai jotjot hulaosi hami PatikMu. Tama do hona uhum hami nuaeng dohot sogot, aut sura baloshononMu tu hami hombar tu pambahenannami. Sai asi ma rohaM di hami, sai sesa ma saluhut dosanami. Paias ma rohanami na hodar binahen ni angka pangalaosionnami i. Tompa ma roha na ias jala paimbaru ma tondi na marsihohot di bagasan hami. Lehon ma Tondi Parbadia margogoihon hami, asa lam tos rohanami sian nasa dosa, jala asa lam badia parangenami. Sai lam pahot ma haporseaonnami di panghophop ni AnakMu Tuhan Jesus Kristus Tuhannami. Amen.

Antong tangihon hamu ma hata apulapul, na di Barita na Uli i: Songon on do holong ni roha ni Debata di portibi on, pola do AnakNa na sasada i dilehon, asa unang mago na porsea di Ibana, alai asa dapotan hangoluan na saleleng ni lelengna. Antong partonaan ni Kristus do ahu jala marhitehite GoarNa hupaboa hata on tu angka na porsea di Tuhan Jesus: Sai saut ma na hinaporseaanmuna, pos ma rohamuna, nunga sesa sude dosamuna jala partohap do hamu di angka asi ni roha ni Tuhan Jesus Kristus ! Antong manang ise na manghasiholi na hudok i, didok ma sian nasa rohana. Amen.

Alusna: Amen !

Ale Amanami na di banua ginjang ! d. u.

Marende:

Pasupasu:

Asi ni roha ni Tuhan Jesus Kristus dohot holong ni roha ni Debata Ama dohot parsaoran ni Tondi Parbadia i ma mandongani hamu ! Amen.

IX. Marulaon na badia rap dohot patujolona

Marende:

Pasunasu:

Dame ni Debata na sumurung sian saluhut roha, i ma mangaramoti ateatemuna dohot rohamuna marhitehite Kristus Jesus. Amen.

Martangiangma hita:

Ale Tuhan Debata Parasiroha na sumurung. Amanami na di banua ginjang! Asi rohaM, topot ma hami na pungu dison ! Andorang hupangan hami annon parpadanon na badia i, lehon ma Tondi Parbadia tu ganup hami, asa ditubuhon haporseaon na mangolu di hami, asa pos situtu rohanami di AnakMu Tuhan Jesus Kristus, na manghophop hami. Pargogoi ma hami mansoadahon dirinami, asa tarihuthon hami Tuhan Jesus Tuhannami, jala asa ditubuhon haporseaon na mangolu i. Sai taiti rohanami asa lam malungun hami tu banua ginjang, asa sai masihol hami paimaimahon haroro ni Tuhan Jesus. Amen.

Hita angka naung pinarhamaol ni Debata, itasangkap nuaeng manganhon parpadanan na badia i. Dibahen i tatimbang ma jumolo manang na tau hita marulaon na badia, asa unang hona uhum manang ise sian hita on. Ai holan na unduk roha jala na manolsoli rohana ala ni pambahenanna na so ture jala na manopoti dosana, jala na porsea di hasesaan ni dosa, na pinatupa ni Tuhan Jesus, i do na tau manganhon parpadanan na badia i. Alai angka na dohot marulaon na badia, unang be dioloi sibolis, unang be didatdati mardosa. Tung padao hamu ma rohamuna sian i, tung gotaphon hamu ma hosom dohot late ni roha. Alai paingotingot hamu ma Tuhan Jesus Kristus naung mate jala naung mulak mangolu humophop hamu, asa tau hamu manganhon parpadanan na badia i.

Dibahen i tatangkasi ma jolo rohanta be, jala alusi hamu ma sungkunsungkun on: ( Jongjong ma Huria i ).

1.         Diparhatutu roham do: Halak pardosa ho sian hatutubum dohot ala ni pangalaosim di Patik ni Debata ? Molo diparhatutu roham, dok ma: Olo!

2.         Na marsak do roham ala dosam i, jala dipangido roham, naeng malua ho nuaeng sian dosam ? Molo songon i roham, dok ma: Olo !

3.         Diparhatutu roham do: Naung ro Tuhan Jesus Kristus tu tano on pangoluhon pardosa; Ibana naung mate dohot mulak mangolu humophop ho, mamorsan jala manesa dosam ? Molo songon i diparhatutu roham, dok ma: Olo !

4.         Olo do ho manggotaphon sian roham late ni roha dohot hosom ni roha? Angkup ni i, olo do ho mardenggan dohot halak, na mangarsahi ho, jala na olo do ho manesa dosa ni donganmu, songon na pinangido ni roham sesaon ni Debata sude dosam ? Molo songon i roham, dok ma: Olo !

 Antong tapaunduk be ma rohanta jala tatopoti ma sude dosanta ! Ihuthon hamu ma tangiang on di bagasan rohamuna be:

Ale Tuhan Debata, Amanami marhitehite Tuhan Jesus Kristus Tuhannami! Halak pardosa godang do hami, ai jotjot hulaosi hami PatikMu. Tama do hona uhumMu hami nuaeng dohot sogot, molo baloshononMu tu hami hombar tu pambahenannami i. Alai ala ni godang ni asi dohot holong ni rohaM dohot ala ni AnakMu Tuhan Jesus Kristus, naung nilehonMu humophop hami, ala ni i umbahen na hum hami mangido tu Ho: Asi ma rohaM di hami, sai jalo ma hami, sai sesa ma sude dosanami, jala lehon Tondi Parbadia tu hami, asa margogo hami mangalo nasa dosa dohot mangulahon na hombar tu lomo ni rohaM saleleng di tano on dope hami. Amen.

Antong hamu angka na manopoti dosamuna jala na mauas di asi ni roha ni Debata, sai sahat ma tu hamu na hinaporseaanmuna. Mangasahon Hata ni Tuhan Jesus do hudok tu hamu: Pos ma rohamuna, nunga sesa saluhut dosamuna marhitehite Goar ni Debata Ama dohot Anak dohot Tondi Parbadia. Amen.

Holan Pandita:

Ale Amanami na di banua ginjang d. u.

Marende:

O Jesus naung sineat d.u.

Antong tangihon hamu ma tona ni Tuhan Jesus laho padirihon parpadanan na badia i.

Dibuat Tuhan Jesus Kristus do sagusagu bornginna i, uju tarjehe Ibana, didok ma mauliate, dung i diponggoli ma i diparlehon ma tu angka siseanNa huhut ma didok: "Jalo hamu ma jala pangan ma, dagingKu do i, na nilehon tu hamatean humophop hamu. Bahen hamu ma songon i bahen parningotanmuna di Ahu !" Jala dung sun nasida mangan, dibuat ma panginuman i, didok ma mauliate, dung i didok ma tu nasida: "Jalo hamu ma, sude hamu manginum sian i. Ia panginuman on padan na imbaru ma on marhitehite mudarHu, na niusehon humophop hamu bahen hasesaan ni dosa. Sai bahen hamu ma songon i bahen parningotanmuna di Ahu !

Antong ro ma hamu, nunga rade sude ! Ida jala dai hamu ma denggan basa ni Debata.

Marende :  ( huhut manganhon parpadanan i ).

Didok Tuhanta Jesus Kristus: Jalo hamu ma on jala pangan ma ! DagingKu do i, na nilehon to hamatean humophop hamu. I ma mangaramoti jala pahothon rohamuna manghaporseai Ibana, asa di hamu hangoluan na so ra suda. Amen.

Didok Tuhan Jesus Kristus: Jalo hamu ma on jala inum hamu sian i. MudarHu do i, na niusehon humophop hamu bahen hasesaan ni dosamuna. I ma mangaramoti jala pahothon rohamuna manghaporseai Ibana asa di hamu hangoluan na so ra suda. Amen. Mulak ma hamu di bagasan dame !

 Marende: ( ende pujipujian )

Tangiang:

Puji ma Tuhan Debata ale tondingku, jalA nasa rohangku di bagasan mamuji GoarNa na badia i. Puji ma Tuhan Debata, ale tondingku, jala unang tung halupahon denggan ni basaNa sudena. Ibana do manesa dosam sudena, jala Ibana pamalum angka sahitmu sudena. Ibana paluahon hosam sian hamagoan jAla dilehon tu ho denggan basa dohot asi ni roha. Parasiroha jala Pardenggan basa do Tuhan Debata, lambat tarrimas jala Parasiroha godang. Ndang dibahen tu hita na hombar tu dosanta jala ndang dibaloshon tu hita na hombar tu hajahatonta. Songon asi ni roha ni amaama tu angka anakhonna do asi ni roha ni Tuhan Debata di angka na manghabiari Ibana. Nunga tangkas dipatuduhon Debata holong ni rohaNa i tu hita di na mate Kristus, humophop hita uju pardosa dope hita. Antong nda lam malua ma hita nuAeng sian rimasNa, dung gabe parpintor hita hinorhon ni mudarNa i. Dibahen i sai pujion ni pamanganku dohot rohangku dohot nasa pambahenanku do Tuhan Debata olat ni on ro di saleleng ni lelengna. Amen.

Pasupasu:

Dipasupasu jata diramoti Tuhan Debata ma ho ! Disondangkon Tuhan Debata ma bohiNa tu ho jAla asi ma rohaNa mida ho ! Sai didompakhon Tuhan Debata ma bohiNa tu ho jala dipasaorhon ma dameNa tu tondim ! Amen.

Marende:

X. Parpadanan na badia

A. DI GAREJA

Marende: ( Ende na tongon tu ulaon na badia ).

Asi ni roha ma di hamu dohot dame sian Debata Amanta dohot sian Tuhan Jesus Kristus.

Martangiang : ( Pondok sian roha ).

Marjamita: (Pondokpondok, alai ndang pola marjamita, molo naung marjamita patujolo hian, alai huhut marguru tu pingkiran ni pandita i ma).

Pandita mandok: Hamu angka na hinaholongan ni Tuhan Jesus Kristus ! Naeng panganonta nuaeng parpadanan na badia i, marningot tona ni Tuhan Jesus tu angka siseanNa. Dibahen i tapatangkas jolo rohanta, manang naung jumpang di hita, songon na pinangido ni Tuhan Jesus tu hita. Na mangapuli roha ni angka na mangarsakhon dohot na manopoti dosana do, umbahen dilehon Tuhan Jesus parpadanan na badia i, asa lam togu haporseaonta tu Ibana; angkup ni i asa lam torang parningotanta di Ibana, horhonon ni panganon na badia i. Ingkon ingotonta Tuhan Jesus, naung sinuru ni Ama i tu portibi on, naung mangusung dosanta, naung manggarar utangta, asa malua hita sian saluhut jea. Tuhan Jesus do singkatta mangulahon saluhut Patik ni Debata, asa dapotan hatigoran hita. Nunga sesa dosanta, nunga mardenggan hita tu Debata. I ma na nilehonNa jala na sinahaphonNa tu rohanta, umbahen na dipatupa Tuhan Jesus parpadanan na badia i. Dibahen i ganup na manganhon sagusagu i dohot na manginum sian panginuman na sasada i, partohap do ibana di daging dohot mudar ni Tuhan Jesus, asa saor hita tu Tuhan Jesus, lapatanna: Ibana di bagasan hita jala hita di bagasan Ibana. Dibahen i tongtong ma taingot Tuhan Jesus jala tajamitahon hamamateNa, paboa naung diparhatutu rohanta: Tuhan Jesus mate ala ni dosanta jala mulak mangolu, asa dapotan hatigoran hita.

Molo dung tajalo annon apulapul dohot pasupasu sian Debata, italehon ma rohanta dohot dagingta tu Ibana, asa Ibana nampuna hita. Tongtong ma taihuthon Tuhan Jesus, itaoloi ma HataNa jala lam badia ma parangenta, paboa mauliate rohanta di Ibana. Angkup ni i lam marsada ni roha, lam masihaholongan, lam masiurupan ma hita sama hita, songon na tama di Huria ni Tuhan Jesus. Ai Tuhan Jesus do Ulunta, angka ruasNa do hita. Dilehon Tuhan Jesus do Patik tu hita, i ma patik holong ni roha, jala didok: Sian on ma botoon ni saluhut halak, hamu siseanHu: Molo masihaholongan hamu sama hamu.

Antong tapaunduk ma rohanta di jolo ni Debata.

Martangiang ma hita !

Ale Tuhan Debata, Parasi na sumurung, Amanami na di banua ginjang !

Asi rohaM, topot ma hami na pungu dison ! Andorang hupangan hami annon parpadanan na badia i, lehon ma Tondi Parbadia tu ganup hami, asa ditubuhon haporseaon na mangolu di hami, asa pos situtu rohanami di AnakMu Tuhan Jesus Kristus na humophop hami dohot manesa dosanami. Nunga dilehon Ho AnakMu Tuhan Jesus i tu hamatean, ala ni hami on. Sai lehon ma hami tu Ibana, asa saor hami dohot Ibana. Ala ni i do umbahen ro hami tuson, asa hujalo hami daging dohot mudar ni Tuhan Jesus i marhite sian panganon na badia i. Patongtong ma rohanami mangkaposi i, asa pos rohanami mangalehon dirinami tu Tuhan Jesus, ai Ibana do haporusannami, hangoluannami. Sai apuli ma rohanami na loja jala na sorat di hasiangan on, asa benget rohanami manaonnaon, nang adong haporsuhon sitaononnami ala ni Ho. Pargogoi ma hami mansoadahon dirinami, asa tarihuthon hami Tuhan Jesus Tuhannami, jala asa hubaritahon hami GoarNa na badia i. Sai taiti rohanami, asa lam malungun hami tu banua ginjang, asa sai masihol hami paimahon haroro ni Tuhan Jesus, na paubahon dagingnami, na olo mate jala na lea i, asa doshon dagingNa na sangap i dagingnami on di haheheon sogot. Amen.

Ale Amanami na di banua ginjang ! d. u.

Antong martangiang ma hamu di bagasan roha huhut tumangihon tona ni Tuhan Jesus laho padirihon parpadanan na badia i:

Dibuat Tuhan Jesus Kristus ma sagusagu borngin i, uju tarjehe Ibana didok ma mauliate, dung i diponggoli ma i, diparlehon ma i tu angka siseanNa, huhut ma didok: Jalo hamu ma, jela pangan ma, dagingKu do i, na nilehon tu hamatean humophop hamu. Bahen hamu ma songon i bahen parningotanmuna di Ahu. Jadi dung sun nasida mangan, dibuat ma panginuman i didok ma mauliate, dung i didok ma tu nasida: Jalo hamu ma, sude hamu manginum sian i. Ia panginuman on, padan na imbaru ma on marhitehite mudarHu, na niusehon humophop hamu bahen hasesaan ni dosa. Sai bahen hamu ma songon i bahen parningotanmuna di Ahu.

Antong ro ma hamu, nunga rade sude, dai jala ida hamu ma denggan basa ni Tuhan i, martua ma manang ise na marhaposan tu Ibana.

(Diendehon Huria i ma angka ende na tongon tu ulaon na badia, andorang manjalo panganon na badia i, angka dongan i).

Didok Tuhan Jesus Kristus: Jalo hamu ma on, jala pangan ma ! DagingKu do i na nilehon tu hamatean humophop hamu. I ma mangaramoti jala pahothon rohamuna marhaporseaon di Ibana, asa di hamu hangoluan na so ra suda. Amen.

Didok Tuhan Jesus Kristus: Jalo hamu ma on, jala inum sian i ! MudarHu do, i, na niusehon humophop hamu bahen hasesaan ni dosamuna. I ma mangaramoti jala pahothon rohamuna marhaporseaon di Ibana, asa di hamu hangoluan na so ra suda. Amen.

Marende:

Martangiang ma hita mamuji Debata:

Puji ma Tuhan Debata, ale tondingku, jala nasa rohangku di bagasan mamuji GoarNa na badia i. Puji ma Tuhan Debata, ale tondinku, jala sai unang halupahon denggan ni basaNa saluhutna. Ibana do manesa dosam sudena, jala Ibana pamalum angka sahitmu sudena. Ibana paluahon hosam sian hamagoan jala dilehon tu ho denggan basaNa dohot asi ni rohaNa. Parasiroha jala Pardengganbasa do Tuhan Debata, lambat tarrimas jala Parasiroha godang. Ndang dibahen tu hita na hombar tu dosanta jala ndang dibaloshon tu hita na hombar tu hajahatonta. Songon asi ni roha ni amaama tu angka anakhonna do asi ni roha ni Debata di angka na mangkabiari Ibana. Nunga tangkas dipatuduhon Debata holong ni rohaNa tu hita, di na mate i Kristus humophop hita, uju pardosa dope hita. Antong nda lam malua ma hita nuaeng sian rimasNa, dung gabe parpintor hita hinorhon ni mudarNa i ! Dibahen i, sai pujion ni pamanganku dohot rohangku do Tuhan Debata olat ni on ro di saleleng ni lelengna. Amen.

Pasupasu:

Dipasupasu jala diramoti Tuhan Debata ma hamu ! Disondangkon Tuhan Debata ma bohiNa tu hamu jala sai asi ma rohana di hamu ! Sai didompakhon Tuhan Debata ma bohiNa tu hamu jala dipasaorhon ma dameNa tu tondimuna be ! Amen.

B. HUTA

Molo adong na marsahit pasang, na mangido sipanganon na badia i, lehonon do, molo na ringgas hian ibana marulaon na badia. On ma dohonon ni Pandita disi:

Marhitehite Goar ni Debata Ama, Anak dohot Tondi Parbadia. Amen.

Martangiang ma hita:

Ale Amanami na maringanan di banua ginjang ! Na sangap, na badia, huhut Parasiroha do Ho. Asi rohaM tatap ma hami, ai na marsak jala na loja do hami ala ni dosa dohot ala ni sitaonon di tano on. Na tunduk jala na bojok do rohanami nuaeng. Sai topot ma hami na pungu dison. Pasintong ma bagabagaM tu hami, hombar tu na nidokMi, ale Tuhan Jesus, Tuhannami: Manang di dia pungu dua manang tolu marhitehite GoarHu, di tongatonganasida do Ahu. Sai topot ma tongatonganami on jala pasaor ma TondiM tu hami, ale Tuhan Jesus Kristus Tuhannami. Amen.

DOHONON MA HATA SIPAINGOT TU NA MARSAHIT MANANG JINAHA HATA SIPAINGOT ON:

Songon on didok Tuhan Jesus: Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha asa dapotan paradianan hasonangan tondimuna.

 Ale dongan na hinaholongan ni Tuhan Jesus: Dipangido ho nuaeng manganhon parpadanan na badia i. Dibahen i paserep ma roham, topoti ma sude dosam tu Debata jala unang pangasahon burjum, asa tau ho manganhon sipanganon na badia on. Ai na mangapul na marsak roha jula na mangalehon gogo tu na loja do, umbahen na dilehon Tuhan Jesus sipanganon na badia i. Dibahen i molo marsak roham ala ni dosam, jala dilului ho hasesaan ni dosam, pos ma roham, jumpang ho do hasesaan ni dosam i, ai dohot do ho hinophop ni Tuhan Jesus. Ingot ma godang ni na porsuk, na tinaon ni Tuhan Jesus humophop ho, ala ni holong dohot asi ni rohaNa. Asi ni roha dohot hatigoran ni Tuhan Jesus, i ma pangasahon asa tongtong tiur di ho dalan tu banua ginjang. Dibahen i andorang dipangan ho sipanganon na badia i, pasahat ma dirim tu Tuhan Jesus, asa didongani jala diramoti Ibana ho jela asa dilehon Ibana Tondi Parbadia pasonangkon roham. Antong benget ma roham manaon na hansit, saleleng di tano on dope ho, ai doshon satongkin jala saotik do i martimbangkon hasonangan sogot. Jala molo naung mauliate roham di Tuhan Jesus songon na tama, unang ho marpandelean, unang marungutungut, ai gumodang do na tinaon ni Tuhan Jesus sian na tinaonmu. Gotaphon roham sian portibi on; sesa sian roham saluhut sala ni dongan na marsala tu ho, asa disesa Debata dosam na godang i. Ia tano on paradianan jala inganan satongkin do, ndang adong na hot dison. Di banua ginjang do inganan na sonang jela na hot ro di saleleng ni lelengna.

Paunduk ma roham di jolo ni Debata jala ihuthon hata ni tangiang on di bagasan roham.

Martangiang ma hita:

Ale Tuhan Debata, Amanami na di banua ginjang ! Parasi roha godang do Ho; ditangihon Ho do anggukangguk ni na dangol marparniahapan. Diida Ho sude na masa di ahu ! Na targogot situtu do rohangku ala ni bernit ni sahit, na hutaon nuaeng. Sai asi ma roham di ahu, ale Debatangku ! Sai sesa ma sude dosangku, sai unang tulakhon ahu sian joloM. Lehon ma gogo tu ahu, asa benget ahu manaon, manang sadia leleng nari pasombuonMu ahu di tano on. Pasabam ma rohangku, ai Ho do Sipangapul; TondiM na badia i ma manogu ahu di dalan sidalananku.

Sai unang alang asi ni rohaM di ahu, ai nunga dilehon Ho AnakMu Tuhan Jesus Kristus Tuhanku, humophop ahu, nunga diporsan Ibana sude dosangku, jala Ibana do hupangasahon. Ibana do hangoluanku ! Molo tung jouonMu nama ahu, sai asi ma rohaM, pamasuk ma ahu tu hasonangan saleleng ni lelengna ala ni Tuhan Jesus Kristus Tuhanku. Amen.

Antong na tutu do, disolsoli ho roham ala ni angka pambahenanmu, na so tama, jela diparhatopot ho sude dosam, jala dipangido ho asi ni roha ni Debata manesa dosam, jala pos do roham di Tuhan Jesus, na patupahon hasesasn ni dosam.

Molo songon i roham, dok ma: Olo.

Alusna: Olo !

 Antong nunga disolsoli ho roham ala ni pambahenanmu, angka na so tama, jala dipangido ho asi ni roha ni Debata manesa dosam, sai sahat ma tu ho na pinangidom. Mangasahon Goar ni Tuhan Jesus do hudok hata on: Pos ma roham, nunga sesa dosam !

Ale Amanami na di banua ginjang ! d. u.

Martangiang ma ho di bagasan roha huhut tangihon tona ni Tuhan Jesus laho padirihon parpadanan na badia i:

Dibuat Tuhan Jesus Kristus ma sagusagu borngin i, uju tarjehe Ibana, didok ma mauliate, dung i diponggoli ma i, diparlehon ma tu angka siseanNa huhut ma didok: Jalo hamu ma jala pangan ma, dagingKu do i, na nilehon tu hamatean humophop hamu. Bahen hamu ma songon i bahen parningotanmuna di Ahu. Jadi dung sun nasida mangan, dibuat ma panginuman i didok ma mauliate, dung i didok ma tu nasida: Jalo hamu ma, sude hamu manginum sian i. Ia panginuman on, padan na imbaru ma on marhitehite mudarHu, na niusehon humophop hamu bahen hasesaan ni dosa. Sai bahen hamu ma songon i bahen parningotanmuna di Ahu.

Nilehon ma sipanganon na badia i tu na marsahit i.

Didok Tuhan Jesus Kristus: Jalo ma on jala pangan ma: DagingKu do i, na nilehon tu hamatean humophop ho. I ma mangaramoti jala pahothon roham marhaporseaon di Ibana, asa di ho hangoluan na so ra suda. Amen.

Didok Tuhan Jesus Kristus: Jalo ma on jala inum sian i: MudarHu do i, na niusehon humophop ho bahen hasesaan ni dosam. I ma mangaramoti jala pahothon roham marhaporseaon di Ibana, asa di ho hangoluan na so ra suda. Amen.

Antong, itadok ma mauliate tu Debata, ihuthon ma hata on di bagasan roham:

Dipuji tondingku do Ho, ale Tuhan Debata, ala dilehon Ho tu ahu arta na sumurung i na sian banua ginjang marhitehite Tuhan Jesus Kristus Tuhanku ! Dipuji tondingku do Ho, ale Tuhan Jesus, ala naung dipadomu Ho ahu tu Debata. Ndang be huhabiari hamatean, ai nunga monang ahu dibahen Ho, Sipangolu ahu. Na mangolu do Tuhan Jesus Tuhanku, ahu pe mangolu do, jala toguonNa do ahu tu hasonangan i. Asi ma rohaM di ahu, ale Debatangku ! Sai lehon Tondi Parbadia tu bagasan rohangku, asa lam togu haporseaonku, asa dibuhai rohangku manatap tu ujungna sogot, asa marpangkirimon na mangolu ahu, nang pe hutaon parsahitan. Nang pe mardalan ahu di rura nilinggoman ni hamatean, Debatangku do mandongani ahu dohot manogu ahu. Nang pe lam buruk jala tanggal daging on, paheheonNa do i songon Tuhan Jesus Tuhanku na pinaheheNa i. Dung i, dung mulak mangolu ahu, ingananku ma huta ni Debatangku ala ni Tuhan Jesus Kristus Tuhanku. Amen.

Pasupasu:

Dipasupasu jaIa diramoti Tuhan Debata ma ho ! Disondangkon Tuhan Debata ma bohiNa tu ho jala asi ma rohaNa di ho ! Sai didompakhon Tuhan Debata ma bohiNa tu ho jala dipasaorhon ma dameNa tu tondim ! Amen.

  XI.      Mananom na mate

A. NA MAGODANG

Marende: ( Pinillit ende na marhahonaan tu angka na mate ). Jinaha sada ayat: ( pinillit sada sian na tarsurat dison ).

Ahu do haheheon dohot hangoluan, ninna Tuhan Jesus, na mangolu do ganup na porsea di Ahu, atik pe mate ibana, jala ndang mate be ibana ro di saleleng ni lelengna. (Joh. 11, 25-26). Amen.

Manang: Nunga tarbondut hamatean tu bagasan hamonangan. Jo hamatean! Di dia do soropmi ? Jo naroko ! Di dia do hamonanganmi ? Alai dosa i do sorop ni hamatean. Dibahen i, mauliate ma rohanta tu Debata, na mangalehon hamonangan tu hita marhitehite Tuhan Jesus Kristus (1 Kor. 15, 55-57). Amen.

Martangiang: (Jinaha sada tangiang, pinillit sada sian na tarsurat dison).

Ale Tuhan Debata, Amanami na di banua ginjang ! Nunga dilehon Ho AnakMu Tuhan Jesus Kristus tu hamatean ala ni dosanami, jala dipangolu Ho do Ibana, asa dapotan hatigoran dohot hangoluan hami. Asi ma rohaM di hami. Sai ajari jala apuli ma hami, asa unang mandele hami, ala naung dijou Ho dongannami on. Patogu ma haporseaonnami jala pabenget ma rohanami mangkirim di hangoluan sogot, asa unang mangandungi hami, songon sipelebegu, na so marpangkirimon i. Sai taiti ma rohanami tu Ho, ai Ho do Sipangapul, jala Ho do haposannami. Na marsigantung tu Ho do hami sahat ro di hasusuda ni bohalnami. Amen.

Manang: Ale Tuhan Debata, Amanami na di banua ginjang ! Na so marmula, na so marujung do Ho, ai na so olo suda do angka taonMu, alai lam moru jala lam suda do bohalnami di tano on, jala hatop do hami laho salpu sian hasiangan on. Songon i nang dongannami on, naung jinouM i tu ari na so ra suda i, nunga salpu sude ngoluna di tano on, jala nunga ditinggalhon saluhut arta na olo buruk i. Sai paingot ma hami taringot tu hasusuda ni bohalnami, asa hobas hami laho masuk tu inganan na pinaradeM, jala asa unang tarsonggot hami, molo ro Ho manjou hami. Sai pahot ma haporseaonnami tu Ho, asa marhiras ni roha hami maninggalhon inganan pardangolan on. Angkup ni i apuli ma roha ni na marsak dison, i ma angka dongan ni na mate on, angka tondongna, angka alealena ro di sude angka na solhot tu ibana, asa unang mandele nasida ala ni sitaonon on. Sai taiti jala togu ma roha ni hami on tu Ho, asa lam malungun rohanami di inganan na sonang di lambungMu, ala ni AnakMu Tuhan Jesus Kristus Tuhannami. Amen.

Marjamita:

Molo so marjamita, jinaha sada turpuk sian Hata ni Debata, na marhahonaan tu angka na mate, dohot taringot tu haheheon ni daging sogot.

Marende :

Pasupasu : ( di na laho manutup batang ):

Dipasupasu Tuhan Debata ma ho laho ruar dohot laho bongot olat ni on ro di saleleng ni lelengna ! Amen.

B. DAKNANAK

Marende :

Ayat sidohonon disi: (pinillit sada sian na tarsurat dison):

Didok Tuhan Jesus: Loas hamu ma angka dakdanak i ro tu Ahu, unang orai hamu nasida, ai di angka na songon i do harajaon ni Debata. Amen.

Manang: Ai di banua ginjang do sambulonta, sian i do itapaimaima Tuhan Jesus Kristus, Sipangolu hita. Amen.

Tangiang: (pinillit sada sian na tarsurat dison):

a) Ale Tuhan Debata, Amanami na di banua ginjang ! Ho do Ama ni nasa na targoar Ama di banua ginjang dohot di tano on. Tibu do dialap Ho dakdanak on tu inganan hasonangan na di lambungMi, asa malua ibana sian pangunjunan, sian hajahaton dohot sian pardangolan na di hasiangan on. Asi ma roham, sai apuli ma angka na solhot tu ibana. Sai lehon tu nasida pangkirimon na mangolu, asa unang holan na di tano on dihirim nasida. Sai pangke ma habot ni rohanasida, asa rap nasida sogot dohot dakdanak on di hasonangan di lambungMi, ala ni AnakMu Tuhan Jesus Kristus Tuhannami. Amen.

b) Manang: Ale Tuhan Debata, Amanami na di banua ginjang ! Na denggan do sude sangkapMu dohot pambahenanMu sian nahinan ro di saleleng ni lelengna. Diida Ho do nuaeng hami dohot dongan angka na marsak roha dison, ala tibu dialap Ho dakdanak on. Sian Ho do dijalo nasida dakdanak on, dung i dibuat Ho i muse. Ala ni i rap hami nuaeng pasahathon i tu Ho, ai Ho do nampuna hami ro di sude anakhonnami. Sai apuli ma nasida saluhut, asa unang mandele jala unang mangandungi nasida songon sipelebegu. Sai pabotohon jala patorang tu nasida, na denggan do sude ujung ni pambahenanMu. Sai lehon ma haporseaon na mangolu di hami on, asa unduk jala benget hami manaon jala asa marhiras ni roha hami paimahon Tuhan Jesus Kristus Tuhannami. Amen.

c) Manang: Ale Tuhan Jesus, Anak ni Debata ! Ho do Tuhan jala aleale ni angka dakdanak. Mauliate hudok hami, ala dihophop jala dipamasuk Ho dakdanaknami tu HarajaonMu. Na pungu do hami nuaeng dison ala dialap Ho dakdanak on. Sai asi ma rohaM, apuli ma natorasna dohot angka sisolhotna, asa unang mandele nasida. Sai togu ma roha ni angka sisolhotna i, asa marhaposan tu Ho nasida. Pangke ma langka ni dakdanak on manogunogu angka sisolhotna i, asa lam malungun rohanasida tu banua ginjang. Sai sungguli haporseaonnami, asa tongtong huingot hami: Ndada na mago dakdanaknami, alai diramoti Ho do i paima pajumpang hami sogot di lambungMu. Amen.

Marjamita: (Molo so marjamita, jinaha sada turpuk sian Hata ni Debata, na marhahonaan tu angka na mate, dohot taringot tu haheheon ni daging sogot).

Marende:

Pasupasu:  (di na laho manutup batang).

Dipasupasu Tuhan Debata ma ho laho ruar dohot laho bongot, olat ni on ro di saleleng ni lelengna ! Amen.

C. DI PARBANDAAN.

Dung tinantan batang i, dohonon ma:

Ale si Anu, sian tano do parmulaan ni dagingmu, mulak ma i gabe tano; alai Tuhan Debata na manompa ho, dohot Tuhan Jesus Kristus, na paluahon ho sian dosa, dohot Tondi Parbadia, na manjou ho tu hangoluan na so ra suda, i ma mangaramoti orbuk ni bangkem, paima ro ari parpudi ! Amen !

Marende :

Ayat sidohonon:  (jinaha na tarsurat dison):

Martua do angka na mate marhitehite Tuhan i olat ni on. Olo, ninna Tondi i: asa maradian nasida sian angka ulaonna, ai na mangihut tu nasida do angka na niulanasida. Amen.

Manang: Ai apala Tuhan i ma na tuat sogot sian banua ginjang martoletole mardongan soara ni sintua ni surusuruan ni Debata dohot mardongan sarune ni Debata. Dung i hehe ma jumolo angka na mate, angka na marhitehite Kristus.

Martangiang:

Ale Tuhan Debata, Amanami na di banua ginjang ! Ho do Debata nampuna hami ro di sude ngolunami, sai lehon ma hiras ni roha di hami, asa marlas ni roha hami paimahon Tuhan Jesus Kristus Tuhannami. Sahat tu tanganMu ma tondinami dohot dagingnami, asa unang lilu hami di ujung ni ajalnami. Sai lehon tondiM i manogunogu hami, asa diramoti hami. Molo hubolus hami rura nilinggoman ni hamatean i. Asi ma rohaM, sai pamasuk ma hami sogot tu hasonangan na sun denggan i. Amen.

Ale Amanami na di banua ginjang ! d.u.

Marende:

Molo Pandita mananom: Asi ni roha ni Tuhanta Jesus Kristus dohot holong ni roha ni Debata Ama dohot parsaoran ni Tondi Parbadia i ma mandongani hamu! Amen.

XII.            Pasahathon dongan tu uhuman Huria.

A. PANGUHU MON PARJOLO.

Hamu ale dongan, na hinaholongan ni Debata ! Diboto hamu do naung diose si Anu padan, na nioloanna tu Debata di na tardidi ibana, ai na mangulahon dosa na balga do ibana (goaron ma dosana i). Ala ni i umbahen hupasahat ibana tu uhuman Huria, ndang jadi dohot be ibana marulaon na badia, mangihuthon tona ni Tuhan Jesus Kristus na tinonahonNa i tu HuriaNa. Saleleng so dipauba ibana rohana, ndang jadi ibana dohot marulaon na badia. Na bali ma ibana dohot sian nasa tohonan na di bagasan Huria. Molo mate ibana, ndang jadi tanomon di tongatonga ni halak Kristen, ingkon tar tungkan suhi ni parbandaan do. Ndang udurhonon ni Pandita manang Guru ibana jala ndang endean ni anak sikola, jala ndang paluon giringgiring di na laho mananom. Ala ni i huapoi ma hamu saluhut, asa ditangiangkon hamu ibana, anggiat disolsoli rohana ala ni dosana i, jala dipauba rohana, jala dilului muse Tuhanta i, na marasi ni roha mida pardosa, na manolsoli rohana songon si Petrus. Ai ndang marlomo ni roha Debata mida hamagoan ni manang ise, alai dipangido rohaNa, paubaon ni pardosa rohana, asa mangolu ibana. Amen.

B. PANGUHUMON NA DOKDOK SITUTU

Hamu ale dongan, angka na pinarhamaol ni Debata ! Nunga jotjot tinaringotan tu hamu dosa dohot jat ni harohaon ni donganta si Anu, jala nunga jotjot pinaingot ibana jala tinangiangkon huhut, anggiat mulak nian rohana tu Debata, asa tanggal angka rante ni sibolis i sian tondina, gabe mangulahi rohana marparangehon na pinangido ni roha ni Debata. Alai atik pe songon i, ndang olo ibana paubahon rohana, baliksa lam dipatangkang do mandatdati manambai dosana. Atik pe pinaidaida ibana nasailaon, ndang tarjua hita be so pasahatonta ibana tu panguhumon na dokdok situtu mangIhuthon pandokhon ni Debata di bagasan HataNa, anggiat olo ibana manolsoli rohana, asa unang tubu parmaraan di hita, na sada daging, bahenon ni sada ruas na busuk, na so hadaonan i, asa unang targasip manang ise sian hita on maniru pambahenanna i jala unang marlea Goar ni Debata.

Antong ale angka dongan, na pungu do hita nuaeng dison ro di Guru dohot Sintua marhitehite Goar ni Tuhan Jesus Kristus. Marningot Hata ni Tuhan Jesus, na tinonahonNa di surat ni si Matheus bindu 18, na mandok: "Situtu do na hudok on tu hamu, manang dia na pinahotmuna di tano on, naung hot do i nang di banua ginjang". Pangkeonta ma huaso na pinasahatNa tu HuriaNa i. Sahat ma daging ni si Anu tu tangan ni sibolis na nioloanna i nasailaon; naung bali do ibana sian nasa parsaulian na di Huria ni Kristus, ndang be dohot ibana etongon partohap di angka ulaon na badia ro di angka pasupasu angka na pinarbagabagaNa jala na binasabasahonNa tu angka na porsea di Ibana, saleleng so olo ibana paubahon rohana. Asa ingkon songon halak sipelebegu nama ibana etongon ni rohamuna.

On pe, hamu ale angka dongan halak Kristen, unang be marparsaoran hamu tu ibana, anggiat olo maila jala anggiat olo mulak rohana tu bagasan; alai unang rajumi hamu ibana songon musu, paingot hamu ibana tagonan songon dongan na lilu.

Alai tama do manonditnondit roha ni hita on sudena marnida ibana, sai dihabiari rohanta ma Debata ! Manang ise pe hita on, ia didok rohana di bagasan na hot ibana jongjong, manatmanat ma ibana, asa unang tinggang ! Tagogo be ma pasaorhon rohanta tu roha ni Debata Ama dohot AnakNa Tuhan Jesus Kristus dohot tu dongan na porsea situtu, asa tung hot rohanta tongtong tu Tuhan i ro di ajalta be, asa maruli hita di hangoluan na so ra suda. Diida hamu ale dongan, pangalaho ni hamagoan ni donganta na hona uhum on, jolo sian na otik dipungka, gabe lam ganda di laonlaon ni ari. Matua songon i do angkal ni sibolis mangago manisia, mangela rohanasida, asa garis maradophon angka parhitean ni asi ni roha ni Debata na manogu jolma tu hasonangan nian. Asa ingkon dungo hita jumaga dirinta ro di urat ni dosa na di bagasan rohanta marningot hata ni Apostel na 'mandok: Itapeakhon ma saluhut na pasorathon hita dohot angka dosa i, na girgir mangkaliangi hita, marlojong ma hita marhitehite habengeton ni roha tu paraloan na diri di jolonta i, huhut mamereng dompak parmulaan dohot ujung ni haporseaonta i. Jaga ma rohamuna, dungo ma hamu jala martangiang, asa unang bongot hamu tu bagasan pangunjunan. Sadari on, molo dibege hamu Hata ni Tuhan i, unang papir hamu rohamu; mardongan biar dohot lomos ni roha ma ulahon hamu hangoluanmuna be. Disolsoli be ma rohana ala ni dosana, asa unang marsombusombu Debata di ibana, jala unang marsak rohanta muse mida manang ise sian hita on. Sai pasada hamu ma rohamuna marparangehon parange na hombar tu lomo ni roha ni Debata, asa tau tumpal halalas ni roha ni Tuhan Jesus hamu sogot. Antong Debata ma umpungka ulaon na denggan di bagasan hita, ro di hagiot ni rohanta, ro di ulaon saut, guru lomo ni rohaNa. Dibahen i itajou ma GoarNa na badia i huhut manopoti dosanta tu Ibana.

Martangiang ma hita:

Ale Tuhan Jahowa, Amanami na asi roha i ! Na bonar do Ho, pardosa ianggo hami. Alai husolsoli hami do rohanami ala ni i, jala diparhatopot rohanami do marnida dongannami naung hona uhum i, na tama do dohot hami on bali sian joloM ala ni godang ni dosanami, tung sura olo Ho mamaloshon tu hami na hombar tusi. Sai asi ma rohaM di hami, ale Tuhan Jahowa ala ni Tuhan Jesus Kristus Tuhannami, sai sesa ma dosanami sudena, ai marsak do rohanami ala ni i. Alai lehon ma Tondi Parbadia, asa tongtong dipaingot rohanami, asa lam dihabiari rohanami uhumMu, na madabu tu angka na tangkang marroha, jala asa lam margogo hami marparangehon parange lomo ni rohaM ! Padungo ma hami jumaga dirinami, asa unang dais tu hami dosa ni angka naung bali sian angka parsaulian di harajaonMu. Alai tahe, ndang lomo rohaM mate halak pardosa, dipauba nian rohana, asa mengolu ibana, i do na pinangido ni rohaM, asa tarbahensa mulak tu HuriaM. Antong pamalo jala paringgas ma rohanami mandabu sipaingot tu angka dongan nabali i, ja]a ajari ma hami marparangehon perange na tau tiruonnasida, anggiat manguna rohanasida mangulahi tu na denggan tu hangoluan i, sai tumpahi ma sipasingotnami tu rohana dohot tu roha ni halak nahumaliang hami, asa sumuang marlas ni roha hami mida ibana, na mangarsahi hami nasailaon, asa tarpuji dohot GoarMu marhitehite Tuhan Jesus Kristus Tuhannami, na mangajarhon tu hami mandok:

Ale Amanami na di banua ginjang ! d. u.

Pasupasu:

Dipasupasu jala diramoti Tuhan Debata ma hamu ! Disondangkon Tuhan Debata ma bohiNa tu hamu jala asi ma rohaNa di hamu ! Sai didompakhon Tuhan Debata ma bohiNa tu hamu, jala dipasaorhon ma dameNa tu tondimuna be ! Amen.

XIII. Paluahon angka na hona uhum parhuriaon

(Ia adong naung bali sian Huria naung pinareso ni Kerkeraad jaIa naung tiningtingkon di jolo ni Huria i, na tarsurat di toru ni on ma pangkeon laho manjangkon naung bali i tu Huria ).

Hamu ale angka dongan na hinaholongan ni Debata ! Jangkonon ma hamu sadari on gabe sumuang songon donganta hian. Las do roha ni Debata molo dung ditanda jolma dosana, ai didok Ibana do: Ndang lomo rohangKu mida hamatean ni parJahat i, dipauba ma nian rohana asa mangolu ibana.

Antong na manungkun ma ahu nuaeng di hamu, ale si Anu:

1.         Diparhatutu hamu do dosamuna di jolo ni Debata dohot di jolo ni Huria na marpungu dison, jala na tarsolsol bagi do hamu ala ni na niulahonmuna najolo ? Molo songon i rohamuna, dok hamu ma: Olo.

2.         Dipangido rohamuna nuaeng jangkonon hamu mulak tu Huria ni Kristus jala na olo do hamu tu joloan on marparangehon parange, na hombar tu Patik dohot Hata ni Debata ? Molo songon i rohamuna, dok hamu ma: Olo.

Antong mangasahon gogo ni Tuhan Jesus Kristus, na pinasahatNa tu HuriaNa i, jinangkon ma hamu sadari on sumuang tu Huria ni Kristus i, asa martohap hamu muse di Tuhan Jesus, ro di ulaon na badia, ro di sude pasupasu dohot asi ni roha ni Debata. Sai hot ma rohamuna marhaporseaon di Ibana ro di hasusuda ni bohalmuna. Sai dungo ma hamu tu joloan on maralohon angkal ni sibolis dohot roha sibuk dohot roha portibi on, asa unang talu be hamu di pangunjunan. Sai haholongi hamu ma Tuhan Jesus jala sai paingotingot hamu ma HataNa na denggan i, asa masuk hamu muse tu banua ginjang.

Tangiang:

Ale Tuhan Debata Amanami ! Mauliate ma rohanami tu Ho marhitehite AnakMu Tuhan Jesus Kristus, ala naung muba roha ni dongannami on jala mulak tu Ho. Las situtu rohanami ala ni i. Asi ma rohaM, lam panghilalahon ma godang ni holong ni rohaM tu nasida, asa lam ringgas rohanasida mangoloi HataM. Sai patongtong ma rohanasida mandalani dalan tu hangoluan. Alai patondithon ma tu roha ni hami on sude dokdok ni habalion sian joloM dohot sian tongatonga ni HuriaM, asa hot hami sude di bagasan tanganMu jala partohap di hangoluan sogot. Amen.

Ale Amanami d. u.

Pasu-pasu:

Marende:

  

XIV. Manjangkon Sintua

Marende:

Hamu ale angka dongan na saHuria on ! Diida hamu do nuaeng donganta na jongjong dison na itapillit bahen Sintua di tongatonganta. Naeng pangidoonnasida ma pasupasu sian Tuhanta i, asa margogo nasida mangulahon ulaonnasida.

Antong tabege ma jolo pangarimpunan ni ulaon ni Sintua.

1.         Pangula ni Huria do nasida mamatamatahon dongan angka na pinasahat tu nasida dohot mangaramoti parangenasida. Molo diboto nasida, na hurang ture parange ni manang ise, ingkon pinsangonnasida i, manang paboaonnasida tu Guru dohot tu Pandita, asa dipature.

2.         Mandasdas donganta tu parmingguan dohot manangkasi alana umbahen na so ro.

3.         Mandasdas anakboru sikola, asa ondop ro.

4.         Maningkir angka na marsahit jala paturehon na ringkot tu nasida dohot nasa na tarpatupasa, alai na rumingkot, pasingothon Hata ni Debata tu nasida dohot tumangiangkonsa.

5.         Mangapuli angka na marsak, paturehon angka na dangol dohot na pogos.

6.         Mangapuli angka sipelebegu, angka parugamo na asing dohot angka na lilu, asa dohot marsaulihon hangoluan na pinatupa ni Tuhan Jesus.

7.         Mangurupi paturehon angka guguan dohot ulaon na ringkot tu Harajaon ni Debata.

On pe, hamu na hinaholongan, naeng tangkas botoonnami burju ni rohamuna mangaradoti ulaon hasintuaon i. Dibahen i alusi hamu ma na husungkunhon on tu hamu:

1.         Na olo do hamu mamarangehon parange na tama di jolo ni Debata dohot di jolo ni jolma ?

2.         Na olo do hamu manjalo ulaon hasintuaon songon na hupajojor ondeng tu hamu ?

3.         Na olo do hamu mangaradoti sude sian nasa roha dohot sian nasa gogomuna hombar tu Hata ni Debata ?

Molo sada rohamuna mangoloi jala marpadanhon sudena i di jolo ni Debata dohot di jolo ni donganta on, dok hamu ma: Olo.

Antong masijalangan ma hita, paboa hot ni padanmuna i jala paboa na olo do hamu mangula ulaon ni Debata rap dohot hami.

Sai diparrohai Tuhan Debata, Ama ni Tuhanta Jesus Kristus ma hamu, marhitehite Tondi Parbadia mangkaburjuhon siulaonmuna, na pinasahat tu hamu sadari on, asa marsangap Debata di tongatonga ni HuriaNa i. Amen.

 Hamu angka dongan na di Huria on jangkon hamu ma nasida di bagasan dame. Sude ma hita on manggogo tumangiangkon nasida, asa manjadi ulaonnasida i, huhut mangkorhon hasangapon ni Tuhanta.

Tangiang:

Ale Tuhan Debata Amanami na di banua ginjang ! Mauliate ma rohanami tu Ho ala ni asi ni rohaM di angka dongannami on. Sai tambai ma tu rohanasida angka silehonlehon ni tondi Parbadia, asa lam marroha jala margogo nasida mangaradoti tohonan na sahat tu nasida. Asi ma rohaM dohot di sude ruas ni HuriaM on, asa lam hot haporseaonnasida be, jala lam ture parangenasida mangihuthon Ho. Sungguli ma rohanami asa masihaholongan, unang adong sipinsangon di hami, asa lam rarat harajaonMu, jala marmulia GoarMu na badia i. Amen.

Ale Amanami na di banua ginjang ! d. u.

Pasupasu:

Marende : 

XV. Pasahathon tohonan haguruon

Marende:

Ale angka dongan, na jongjong do nuaeng di jolonta angka donganta na poso na marsiajar nasailaon di Seminarie, asa gabe Guru nasida di Huria Kristen Batak Protestant. Umbahen na marpungu hita dison, ala naung monang nasida di examen nambura pinamasa i, huhut ala naeng pasahaton tu nasida sadari on tohonan haguruon i. Antong rap ma hita mangido gogo dohot pasupasu sian Tuhanta i di nasida, asa mardongan gogo na sian Debata nasida mangula ulaon na pinasahat tu nasida.

Antong tangihon hamu ma jolo poda taringot tu haguruon, na ingkon ulahononmuna:

1.         Dongan ni Pandita do hamu manguluhon jala mamatamatahon ruas ni Huria na masuk tu Huria Kristen Batak Protestant. Hamu do dongan ni Pandita, laho manjamitahon Hata hangoluan na tarsurat di Padan na Robi dohot di Padan na Imbaru di tongatonga ni Huria sipasahaton tu hamu be.

2.         Ala parjamita di Huria hamu, bahenonmuna ma nasa gogomuna marmahani birubiru ni Tuhanta, i ma angka ruas ni Huria na balga nang na metmet, na poso dohot na matua, na marsahit dohot na hisar, na jengkel dohot na burju. Apulanmuna ma angka na marsak, tungkolanmuna angka na mabalu dohot angka na tading maetek.

3.         Laos songon i apoanmuna halak sipelebegu dohot halak Silom dohot sandok angka na asing pe na manimbil sian Hata ni Debata dohot sian HuriaNa, asa dohot nasida marsaulihon na pinatupa ni Tuhan Jesus, ojahan ni haporseaonta i.

4.         Ala guru hamu di Huria Kristen Batak Protestant, pasahaton ma muse tu hamu angka dakdanak siajaranmuna/sitogutoguonmuna. Tamba ni angka parbinotoan sikola ajarhononmuna ma tu nasida nang Hata ni Debata, anggiat tartogu nasida tu panandaon di Tuhanta Jesus.

5.         Asa saut angka na nidok ondeng, ingkon marparange na denggan ma hamu di jolo ni Debata nang di jolo ni jolma. Tau tiruan ma hamu di angka na pinasahat ni Debata tu hamu. Sandok hata naung pinasahat tu hamu, radoti hamu ma sian nasa rohamuna hombar tu Hata ni Debata na mamolin i.

Paboa naung sada rohamuna mangoloi saluhutna i di jolo ni HuriaNa, dok hamu ma: Na olo do ahu ! Sai didongani asi ni roha ni Debata ma ahu patupahon saluhutna i.

Marende nasida:

Mardebadeba ro tu jolo marsinggang:

Guru .... Hupasahat ma tu ho tohonan haguruon dohot parjamitaon di Huria Kristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta i ma hamu marhitehite Tondi Parbadia mangulahon ulaonmuna, asa gabe pangula na burju hamu, marparbuehon parbue na denggan ro di saleleng ni lelengna. Amen.

Martangiang:

Ale Tuhan Debata, Amanami na di banua ginjang ! Sasada Ho do patauhon angka naposoM na sinuruM tu angka Huria i. Ho do mangalehon huaso dohot hamaloon, asa tarida jala lam timbul ulaonMi. Ala ni i umbahen na ro hami marhitehite Tuhan Jesus Kristus Tuhannami mangido tu Ho: patiur ma roha ni angka naposoM on. Iringiring ma nasida marhitehite tanganMu na badia i. Sai pamalo ma nasida mangulahon tohonan na pinasahatMi tu nasida sadari on, asa ture ulaonnasida di bagasan HuriaM jala lam rarat harajaonMu tu liat portibi on.

Sai lehon ma TondiM na badia i mangajari dohot manogunogu nasida, asa tartogihon nasida angka donganna naung hinophop ni AnakMu marhitehite mudarNa na badia i mulak tu Ho, asa rap hami di hasonangan pasangaphon Ho di bagasan Jesus Kristus Tuhannami. Amen.

Marende Sikola:

Martangiang : Ale Amanami d. u.

Pasupasu :

Marende : 

XVI. Pasahathon tohonan hapanditaon

Marende:

Ale Tuhan Debata ! Tompa ma roha na ias di bagasan ahu jala lehon di ahu tondi na imbaru jala na marsihohot.

Martangiang:

Ale Tuhan Debata ! Amanami, Parasiroha na sumurung. Didokhon AnakMu do hami mangido panabi angka na burju tu Ho, sisuruonMu tu sisabion i, mamaritahon HataM tu jolma. Ala ni i umbahen na ro hami nuaeng tu joloM mangasahon Tuhan Jesus Kristus Tuhannami mangido tu Ho: Sai topot ma hami na pungu dison laho pasahathon ulaon hapanditaon tu angka dongannami on. Lehon ma Tondi Parbadia tu nasida angka naung pinabangkitMu asa malo nasida manjamitahon HataM, asa marhiras ni roha nasida mamboan Barita na Uli bahen hamuliaon di Anak haholongan ni rohaM. Ungkap jala patiur ma rohanasida, asa mian nasida di bagasan Ho, jala asa tung bulus rohanasida tongtong maniop HataM dohot mangharingkothon ulaon na pinasahatMu tu nasida. Sai tumpahi ma ulaonnasida, asa maruli upa nasida rap dohot angka na pinarmahanna di hangoluan sogot marhitehite Tuhan Jesus Kristus Tuhannami. Amen.

Hamu ale dongan ! Disuru Amanta na di banua ginjang i do AnakNa Tuhan Jesus Kristus tu tano on gabe jolma, asa tarbahen jolma manisia mananda holong ni roha ni Debata di nasida, asa marpos ni roha nasida di Ibana jala sumuang nasida tu harajaonNa, gabe masuk nasida tumean hangoluan na saleleng ni lelengna. Jadi dung sun ulaon ni Anak ni Debata di tano on, dipasahat ma tohonan tu angka anak sisean i, asa nasida paboahon dohot pasahathon naung hinamonangkonNa i tu donganna jolma. Angkup ni i didok Apostel Paulus do: Dipabangkit Tuhanta do deba gabe Apostel, deba gabe panurirang deba gabe parbarita, deba gabe parmahan, deba gabe pangajari, asa sun denggan angka na badia i tu ulaon i. Sian i ma tangkas taboto: Tuhan Jesus Kristus do mamajokhon tohonan hapanditaon.

Mangihuthon hata ondeng, sai dipabangkit Debata di tongatonga ni HuriaNa angka Pandita, mulai intap ni dung ojak Huria i di tano on ro di tingki nuaeng.

Dung i jahaon ni Ephorus dohot donganna: Bege hamu nuaeng pandok ni Debata taringot tu tohonan ni hapanditaon. Mat. 28,18-20. Joh. 21,15-17, Ulaon ni Apostel 20,17-35, 1 Tim. 3,1-7, 2 Tim. 1, 5b.

Marende:

Antong ale dongan ! Tohonan na badia do sijaloonmuna nuaeng, ai sian Tuhan Jesus do tohonan na songon i. Ala ni i hupasingothon jala hupaboa ma tu hamu parture ni pangaradotion di tohonan hapanditaon, asa tangkas diboto hamu dokdok ni tohonan i.

                  I.            Ramotanmuna ma arta na sian Tuhan Jesus, songon na binahen ni parmahan mangaramoti na di ibana, asa unang mago. Ai peakhononmuna do sogot rujiruji taringot tu angka na pinarmahanmuna di jolo ni Tuhan i. Na gabe sitiruon do hamu di jolo ni angka na pinasahat tu hamu. Dibahen i tangkas ma hatahon hamu tu nasida Hata ni Debata, na tarsurat di angka surat na di Padan na Robi dohot di angka surat na di Padan na Imbaru. Buat hamu ma sian Hata i poda, apoapo, sipaingot, apulapul dohot hata paminsangon, hombar tu angka na masa. Songon i do dibahen angka Apostel, songon na nidok ni Apostel Petrus: Molo adong na manjamita, dihatahon ma hatana songon Hata ni Debata; molo adong manang ise na marhobas hombar ma i tu gogo na nilehon ni Debata, asa dapotan hasangapon Debata marhitehite Tuhan Jesus Kristus di na salohutna. Sialoonmuna jala sitaluhononmuna ma nasa hatahata, na marsalisi tu Hata ni Debata. Marlambok ni roha ma hamu maminsangi angka na mangalo, anggiat dilehon Debata hamubaon ni roha, asa diboto nasida hasintongan. Antong ramoti hamu ma dirimuna dohot na sapunguan i, manang tu dia hamu dipaojak Tondi Parbadia asa diparmahani hamu Huria ni Debata, na hinophopNa i marhitehite Tuhan Jesus Kristus. Ingkon baritahononmuna do hata sihaporseaan i, i ma na nilehon ni Debata padengganhon jolma tu Ibana, ai i do dalan tu hangoluan, dalan tu hamubaon ni roha dohot dalan pardamean ni jolma tu Debata. Pardengganan na songon i ma paboaonmuna tu angka na pinasahat tu hamu. Antong singkat ni Kristus i do hamu mangelekelek jala dohononmuna ma tu jolma i: Sai olo ma hamu padengganon tu Debata.

                 II.            Songon tangkas ni pamodaionmuna di angka na olo tu hadaulaton tu Debata, ingkon songon i ma tangkas paminsangonmuna di angka na so olo tu hangoluan, asa unang adong na mago, ala so ada sipaingot, jala unang marsapata nasida tu hamu. Ingot hamu ma na tarsurat i. Ia ho ale anak ni jolma ! Nunga hupabangkit ho gabe siparmahan ni halak Israel, ingkon tangihononmu Hata na ruar sian pamanganHu. SingkatHu ma ho, palumbahon nasida. Molo hudok tu angka pardosa na tu hamatean nama ho, gabe so dipalumba ho ibana, ndang diapuli ho ibana, asa dipauba rohana, asa mangolu, na mate do tutu pardosa i ala ni dosana, alai sian tanganmu do tungguonHu mudarna. Alai molo dipalumba ho pardosa i, hape ndang dipauba rohana dohot pambahenanna, mate ma ibana tutu di bagasan dosana, alai malua do ianggo tondim.

               III.            Alai ndada holan ulaon ondeng na pinasahat tu Pandita. Ai di na laho manadingkon tano on Tuhan Jesus, jumolo do dipadiri ulaon na badia na dua ragam i. Na mangan parpadanan na badia do na saragam. Na saragam nari, i ma pandidion na badia, na tinonahonNa i di na laho manaek Ibana tu banua ginjang. Asa radotanmuna ma ulaon na badia na dua ragam i; songon parhobas di bagas ni Debata ma hamu mangulahonsa. Tangkas ma pamanat hamu angka dongan i, asa holan angka na tau, angka na tumanda dosana, angka na mangarsakhon pambahenanna jala na olo paubahon rohana manjonohi panganon na badia i. Ambatonmuna do angka na jungkat, angka na lomo roha di dosa, asa unang dijonohi na badia i. Ingot hamu ma: Dipasahat Tuhan Jesus do anakhinsu ni banua ginjang tu HuriaNa i, asa dipabali angka na so olo paubahon rohana, ai ninna do: Hulehon pe tu ho anakhinsu ni harajaon na di angka banua ginjang i. Nasa na niihotanmi di tano on, na tarihot do i dohot di angka banua ginjang, jala molo adong diharhari ho di tano on, harhar do i nang di angka banua ginjang. Didok Tuhan Jesus dope: Jalo hamu ma Tondi Parbadia ! Molo disesa hamu dosa ni manang ise, naung sesa ma i, molo dipahot hamu dosa ni manang ise naung hot do i.

             IV.            Angkup ni radot ma hamu patureturehon angka dakdanak, maniru pambahen ni Tuhan Jesus. Ai didok Tuhan Jesus sahali: Loas hamu ma angka dakdanak i ro tu Ahu, unang orai hamu nasida, ai di angka sisongon i do harajaon ni Debata. Dibahen i ajarhon hamu ma pamusatan ni Hata ni Debata (Katechismus) dohot jamita tu angka dakdanak. Podai hamu ma nasida, asa diboto hadaulaton tu Debata dohot hapantunon tu jolma. Ambat hamu ma nasa na tau mangago dakdanak, ai parmahan do hamu, songon naung nidok ni Tuhan Jesus: Parmahani ma angka anak ni birubirungKu.

              V.            Ramoti hamu ma saluhut pangisi ni Huria i, angka na mabalu, angka ama, ina, dolidoli dohot anakboru, maniru pambahen ni Apostel Paulus. Ai ninna do tu halak Epesus: Dibahen i jaga ma hamu, ingot hamu ma na so mansohot ahu saleleng ni tolu taon arian dohot borngin, paingothon ganup hamu huhut mariluilu. Tangiangkon hamu ma saluhut na pinasahat tu hamu, asa diramoti Tuhan Jesus nasida jala dipasupasu marhitehite Tondi Parbadia.

             VI.            Angkup ni i sai ture ma parangemuna, asa tau tiruan hamu di angka na pinarmahanmuna i, tiruan di hata, di pangalaho, di haporseaon dohot di holong ni roha. Ingot hamu ma na nidok ni Hata ni Debata: Ingkon unang marhaurahon Sintua i, harajaan ni sada boruboru, unang parmabuk, na marroha, na ture marparange, na las roha di tamue, pangajari, unang sisobur tuak, unang pangalinsingi, unang parpangomoan na so tama, alai ingkon partalup ni roha do, na so parbada, na so impolan di perak, na denggan mangarajai donganna sabagas, parianakhon sioloi ajar di bagasan nasa hatomanon. Ai molo adong manang ise, na so malo manggomgomi isi ni bagasna tung beha ma tarpaturesa Huria ni Debata.

           VII.            Ingkon ture bahenonmuna saluhut aturan ni ulaonmuna i mangihuthon patik ni indukmuna. Sahata ma hamu dohot angka dongan Pandita: Di pangalaho ni pangoloion tu Debata, unang pulikpulik marpingkiran, unang marsalisi hata dohot roha, unang masigasipan, asa saut di hamu na pinangido ni Tuhan Jesus sian AmaNa di na nidokNa i: Sai tongtong ma di GoarMu nasida na nilehonMi tu Ahu, asa sada nasida songon Hita.

Marende:

Antong nunga dibege hamu hatorangan taringot tu tohonan hapanditaon songon na pinatorang ni Hata ni Debata.

Na manungkun ma ahu nuaeng di hamu:

1.         Diparhatutu roham do: Angka surat na di Padan na Robi dohot angka surat na di Padan na Imbaru, i do Hata ni Debata na patuduhon dalan tu hangoluan na so ra suda, jala na olo do ho mambolongkon saluhut poda na asing jala mangalo nasa na marsalisi tu Hata na tarsurat disi ?

              Alus: ......

2.         Na olo do ho mangulahon tohonan i hombar tu na hujaha nangkin, i ma taringot tu poda dohot pangalaho, jala na olo do ho marateatehon hata paminsangon na sian indukmu di tingkina ?

              Alus: .....

Antong na jongjong do hamu di jolo ni Debata dohot di jolo ni Huria on. Molo naung sada situtu rohamuna manjalo tohonan hapanditaon jala molo na olo hamu mangulahonsa sian nasa rohamuna, dok hamu ma:

"Na olo do abu; Sai didongani asi ni roha ni Debata ma abu patupahon saluhutna i !"

Marende:

Ephorus mandok: Hupabangkit jala huurasi ho gabe Pandita di Huria Kristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta i ma ho marhitehite Tondi Parbadia mangulahon tohonan hapanditaon, asa gabe pangula na burju ho, na marparbuehon parbue na denggan ro di saleleng ni lelengna. Dipatau Debata ma ho tu angka ulaon i, mangulahon na hombar tu HataNa marhitehite Tuhan Jesus Kristus, sipasangapon i ro di saleleng ni lelengna ! Amen.

Sada pandita mandok hata:

Mandak hata Parhalado Pusat:

Marende :

Martangiang:

Ale Tuhan Debata, Amanami na di banua ginjang ! Sasada Ho do na patauhon angka naposoM, na sinuruM tu angka Huria i. Ho do mangalehon huaso dohot hamaloon, asa tarida jala lam timbul ulaonMu. Ala ni i umbahen na ro hami marhitehite Tuhan Jesus Kristus Tuhannami, mangido tu Ho: Patiur ma roha ni angka naposoM on. Iringiring ma nasida marhitehite tanganMu na badia i. Sai pamalo nasida mangulahon tohonanna na pinasahatMu tu nasida sadari on, asa ture ulaonnasida di bagasan HuriaM, jala lam rarat harajaonMu tu liat portibi on. Sai lehon TondiM na badia i mangajari dohot manogunogu nasida, asa tartogihon nasida angka donganna jolma na hinophop ni AnakMu marhitehite mudarNa na badia i, gabe mulak tu Ho asa rap hami di hasonangan pasangaphon Ho di bagasan Tuhan Jesus Kristus Tuhannami. Amen.

Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! Palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna ! Amen.

Pasupasu:

Marende: 

XVIl. Pasahathon Tohonan Pariamita Ina (Bibelvrouw)

Marende:

Ale angka dongan, na jongiong do nuaeng di jolonta angka donganta naung marsiajar di Sikola Bibelvrouw, asa gabe Parjamita Ina nasida di Huria Kristen Batak Protestant. Nunga marujung parsiajarannasida di tingki na salpu, jala nunga dibolus nasida tingki marsiajar praktek. Sadari on naeng pasahaton ma tu nasida Tohonan Panjamita Ina (Bibelvrouw). Antong rap ma hita mangido gogo dohot pasupasu sian Tuhanta i di nasida, asa mardongan gogo na sian Debata nasida mangula ulaon na pinasahat tu nasida.

Hamu angka na naang manjalo Tohonan Parjamita Ina (Bibelvronw) sadari on, tangihon hamu ma jolo poda taringot tu Tohonan Parjamita Ina na ingkon ulahononmuna:

1.         Dongan ni Pandita do hamu manogunogu jala mamatamatahon ruas ni Huria na masuk tu Huria Kristen Batak Protestant. Hamu do dongan ni Pandita laho manjamitahon Hata hangoluan na tarsurat di Padan na Robi dohot di Padan na Imbaru di tongatonga ni Huria sipasahaton tu hamu be.

2.         Ala Parjamita di Huria hamu bahenonmuna ma nasa gogomuna marmahani birubiru ni Tuhanta, i ma angka ruas ni Huria na balga nang na metmet, na poso dohot na matua, na marsahit dohot na hisar, na jengkel dohot na burju. Apulanmuna ma angka na marsak, tungkolanmuna angka na mabalu dohot angka na tading maetek.

3.         Laos songon i apoanmuna halak sipelebegu dohot angka parugamo na asing pe na manimbil sian Hata ni Debata dohot sian HuriaNa, asa dohot nasida marsaulihon na pinatupa ni Tuhan Jesus, ojahan ni haporseaonta i.

4.         Ala Parjamita ina hamu di Huria Kristen Batak Protestant, tumangkas pasahaton tu hamu panghobasion di tongatonga ni angka Ina, Namarbaju dohot angka Dakdanak.

5.         Angkup ni parbinotoan di Hata ni Debata, siajarhonon jala sipodahononmuna tu nasida, siradotanmuna do panghobasion na ampit tu nasida.

6.         Asa saut angka na nidok ondeng ingkon marparange na denggan ma hamu di jolo ni Debata nang di jolo ni jolma. Tau tiruan ma hamu di angka na pinasahat ni Debata tu hamu. Sandok hata naung pinasahat tu hamu, radoti hamu ma sian nasa rohamuna hombar tu Hata ni Debata na mamolin i.

Paboa naung sada rohamuna mangoloi saluhutna i, di jolo ni HuriaNa, dok hamu ma: "Na olo do ahu ! Sai didongani, asi ni roha ni Debata ma ahu patupahon salubutna i !”

Marende :

Mardebadeba ro tu jolo marsinggang:

 Ale .... hupasahat ma tu ho Tohonan Parjamita Ina (Bibelvrouw) di Huria Kristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta i ma hamu marhitehite Tondi Parbadia mangulahon ulaonmuna, asa gabe pangula na burju hamu, marparbuehon parbue na denggan ro di saleleng ni lelengna. Amen.

Martangiang:

Ale Tuhan Debata, Amanami na di banua ginjang ! Sasada Ho do patauhon angka naposoM na sinurum tu angka Huria i. Ho do mangalehon huaso dohot hamaloon, asa tarida jala lam timbul ulaonMi. Ala ni i umbahen na ro hami marhitehite Tuhan Jesus Kristus Tuhannami mangido tu Ho: Patiur ma roha ni angka naposoM on. Iringiring ma nasida marhitehite tanganMu na badia i. Sai pamalo ma nasida mangulahon Tohonan na pinasahatMu tu nasida sadari on, asa ture ulaonnasida di bagasan HuriaM jala lam rarat harajaonMu tu liat portibi on. Sai lehon ma TondiM na badia i mangarajai dohot manogunogu nasida asa tartogihon nasida angka donganna naung hinophop ni AnakMu marhitehite mudarNa na badia i mulak tu Ho, asa rap hami di hasonangan pasangaphon Ho di bagasan Jesus Kristus Tuhannami. Amen.

Martangiang: Ale Amanami d. u.

Pasupasu :

XVIII. Pasahathon Tohonan Diakones

Marende :

Ale angka dongan, na jongjong do nuaeng di jolonta angka donganta naung marsiajar di Pendidikan Diakones, asa gabe Diakones nasida di Huria Kristen Batak Protestant. Nunga marujung parsiajarannasida di tingki na salpu, jala nunga dibolus nasida tingki marsiajar praktek. Sadari on naeng pasahaton ma tu nasida tohonan Diakones.

Antong rap ma hita mangido gogo dohot pasupasu sian Tuhanta i di nasida, asa mardongan gogo na sian Debata nasida mangula ulaon na pinasahat tu nasida.

Hamu angka na naeng manjalo tohonan Diakones sadari on, tangihon hamu ma jolo poda taringot tu tohonan Diakones, na ingkon ulahononmuna:

1.         Pangula ni Huria do hamu mangaradoti angka ulaon parasinirohaon di tongatonga ni Huria dohot di masyarakat.

2.         Ragam do angka ulaon parasinirohaon na pinungka ni Huria, songon dalan manjamitahon asi dohot holong ni roha ni Debata:

- Pangubation dohot sumarihon angka na ringkot di na marsahit.

- Patureturehon angka na mardangol.

- Patureturehon angka na tading maetek.

- Mangurupi angka na pogos dohot angka na di bagasan hasusaan.

- Manungkoli angka na mabalu dohot angka na matua.

- Mangurupi angka na suda gogo.

3.         Siapulanmuna do angka na marsak, sitoranganmuna do roha ni angka na marsitaonon, situngkolanmuna do haporseson dohot pangkirimon ni angka na naeng mandele.

4.         Ulahononmuna do panogunoguon asa diboto halak manjagahon hahipason ni pamatangna, asa diboto jala diparangehon parange na denggan.

5.         Manang di dia pe pajumpang hamu dohot halak na ringkot manigor urupan, hobas ma mangurupi hombar tu na tarpatupa hamu, so mamereng upa.

6.         Gabe parasi ni roha ma hamu songon Amamuna Parasiroha i, asa pangula na ringgas hamu jala na hinsa.

On pe, naeng ma tangkas alusanmuna sungkunsungkun on di jolo ni Debata dohot di jolo ni Huria na pungu dison:

1.         Na olo do ho mangaradoti ulaon tohonan Diakones na hujaha nangkin sian nasa roham dohot nasa gogom hombar tu na pinangido ni Hata ni Debata?

2.         Na olo do ho mamarangehon parange na tama di jolo ni Debata dohot di jolo ni jolma ?

Molo naung sada rohamu mangoloi saluhutna i dok hamu ma: "Na olo do ahu, Sai didongani asi ni roha ni Debata ma ahu patupahon saluhutna i!”

 Antong, hombar tu pangoloionmuna na songon padanmuna tu Tuhanta i, pasahaton ma tu hamu Tohonan Diakones di Huria Kristen Batak Protestant.

Marende :

Mardebadeba ro tu jolo marsinggang: (diatur parjongjong ni angka donganna satohonan).

Ale.....     Hupasahat ma tu ho Tohonan Diakones di Huria Kristen Batak Protestant, marhitehite Goar ni Debata Ama, Anak dohot Tondi Parbadia.

Dipatiur, dipargogoi jala ditogutogu Tuhanta i ma hamu marhitehite Tondi Parbadia mangulahon ulaonmuna, asa gabe pangula na bunju hamu, marparbuehon parbue na denggan ro di saleleng ni lelengna. Amen.

Martangiang:

Ale Tuhan Debata Amanami na di banua ginjang ! Sasada Ho do patauhon angka naposoM na sinuruM tu angka Huria i. Ho do mangalehon huaso dohot hamaloon, asa tarida jala lam timbul ulaonMi. Ala ni umbahen na ro hami marhitehite Tuhan Jesus Kristus Tuhannami mangido tu Ho, patiur ma roha ni angka naposoM on, iringiring ma nasida marhitehite tanganMu na badia i.

Sai patau ma nasida mangulahon Tohonan na pinasahatMu tu nasida sadari on, asa lam ture ulaonnasida jala asa lam torop halak mananda dohot marsaulihon Barita na Uli na sian Ho i.

Sai sungguli ma tongtong huriaM marningot angka na ringkot urupan dohot mangulahon parasinirohaon, asa lam torop marnida asi ni roha na sintong songon na niulahonMu dohot na pinodahon ni HataM, asa dipuji jala dipasangap sude GoarMu na badia i. Amen.

Marende :

Martangiang:     Ale Amanami  d. u.

Pasupasu :

XIX. Mangompoi gareja

Marpungu ma Huria di jolo ni gareja na imbaru i mangendehon "Ungkap bahal na umuli".

Dung i pasahaton ni tukang na paulihon gereja i ma anakhinsuna tu Kerkeraad jala Kerkeraad i ma pasahathon tu Ephorus, dung i dohonon ni Ephorus i ma (manang singkatna): Huungkap ma bagas on marhitehite Goar ni Debata Ama dohot Goar ni AnakNa Tuhan Jesus dohot Goar ni Tondi Parbadia. Amen. (Dung i masuk ma tu gareja Huria i).

Marende :

Dame ni Debata, na sumurung sian saluhut roha, i ma mangaramoti ateatemuna dohot rohamuna marhitehite Tuhan Jesus Kristus. Amen.

Jahaon ma: 1 Kron. 30,1-20; 1 Raja 8; 2 Kron. 5-7; Ps. 24, 86, 87, 100,122, 132; Joh. 2,13-22; 4,19, 20; 1 Kor. 3, 16,17.

Marende:

Haporseson: Rap sude mandok !

Marende:

Tangiang :

Ale Tuhan Debata, Parasiroha na sumurung ! Mauliate ma rohanami tu Ho ala ni godang ni asi ni rohaM di hami. Diurupi Ho do hami paulihon bagas on sian na mamungka pajongionghonsa sahat ro di nuaeng. Pujionnami ma Ho ro di saleleng ni lelengna, ala naung sun saluhutna i bahen inganan ni hasangaponMu dohot pamaritaan di GoarMu na badia i. Sian Ho do hujalo hami angka silehonlehonMi, umbahen na sun bagas on. Ala ni i hupasahat hami ma i tu Ho, asa Ho nampunasa. Asi ma rohaM, sai ro ma Ho tumopot bagas ingananMon. Sai parbadiai ma i. Sai patubegehon ma Hata hasintonganMi sian hajongjongan on asa adong sitiopannami laho tu hasonangan. Sai marmulia ma bahen ulaon pandidion i dison, parhitean laho bongot tu HuriaM, paboa anakhonMu hami. Sai parade ma parpadanan na badia i di langgatan on, parhitean ni silehonlehonMu na godang i di hami. Sai jalo ma ende angka na huendehon hami dison laho pasangaphon GoarMu na badia i. Sai paria ma hami ro tu bagasMon, di na hubege hami soara ni giringgiring, na manjou hami. Sai pasupasu ma sude angka na mangalehon guguan dohot na paulihon bagas on. Sai ajari ma hami paulihon nang rohanami be, asa tau hami bahen ingananMu. Sai parmahani ma hami ro di pinomparnami marnini marnono; sai lehon di hami pangula angka na burju marmahani pangisi ni Huria on.

Sai topot ma hami marhitehite Tondi Parbadia, asa lam hot haporsenonnami jala huhatindangkon hami Ho sahat ro di hamamatenami be. Sai jumpang hami ma dison Barita na Uli, i ma HataM na badia i, na paubahon, na mangapul jala na pasonangkon rohanami.

Asi ma rohaM ale Tuhan Debata ! Sai tangihon ma tangiangnami dohot tangiang ni angka dongan na ro tu bagas on. Sai pasupasu ma hami manang sadihari pe hami marpungu di bagas on. Sai pasupasu ma angka parminggu, angka parguru, angka na tardidi, angka na marulaon na badia dohot angka na pinabagas dison. Sai jalo jala pasupasu hami dohot ianakhonnami, molo huboan hami tuson angka posoposo dohot angka na manghajongjonghon haporseaonna. Sai alusi jala oloi pangidoannami, molo ro hami tu bagas on jumpa masa hagogotan, sahit manang haleon pe. Sai jalo ma hamauliateonnami, angka na huboan hami tu bagas on. Sai alusi angka partangiang na ro tu bagas on, i ma angka na lumpuon, na dangol, na mabalu, na so marama, na so marina, panangkarnangkar, na targogot, sai lehon tu nasida haluaon dohot apulapul. Sai oloi ma pangidoan ni dongan, angka na ro tu bagas on, i ma na mangido hasesaan ni dosa, na mangido gogo dohot apulapul ro di sude na hasea, na hombar tu lomo ni rohaM.

Asi ma rohaM di hami naung hinophop ni AnakMu Tuhan Jesus Kristus, Tuhannami, sai ramoti hami marhitehite TondiM i, paima sahat hami tu hasonangan na di banua ginjang. Amen.

Marende:

Jamita :

Marende: ( Papungu pelean ).

Tangiang: rap mandok: Ale Amanami d. u.

Pasupasu:

Sai dipasupasu jala diramoti Tuhan Debata ma hamu ! Disondangkon Tuhan Debata ma bohiNa tu hamu jala asi ma rohaNa mida hamu ! Didompakhon Tuhan Debata ma bohiNa tu hamu jala dipasaorhon ma dameNa tu tondimuna be ! Amen.

Marende mardongan giringgiring:

XX. Mameakkon batu ojahan ni gareja

Marende :

Paragenda:

Ari on do na jinadihon ni Jahowa, marolopolop jala marlas ni roha ma hita disi. Haleluya !

Huria:

Haleluya, EIaleluya, Haleluya !

Paragenda:

Psalm 84, manang Psalm 87, manang Psalm 122.

Marende :

Paragenda I:

Dung i tarsunggul ma si Jakop sian na modom i, jadi didok ma: inganan ni Jahowa do on hape, so pamotoanku. Jadi mabiar ma ibana, ninna ma: na songkal situtu do inganan on, ndang tarbahen so on bagas ni Debata, jala baba pintu ni langit. Dung i hehe ma si Jakop sogot manogotna i dibuat ma batu pinarhalanguluna i, jala dipajongjong bahen partinandaan, jala diusehon miak tu ginjangna. Dung i dibahen ma goar ni inganan i Beth-El ( bagas ni Debata ). Lus do goar ni huta i ianggo nasailaon. Dung i marbagabaga ma si Jakop ninna do: molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siparuloshononhon, jala marsonangsonang ahu mulak ditogihon tu bagas ni damang, sai Jahowa ma Debatangku. Jala batu na hupajongjong on bahen partinandaan, i ma gabe bagas ni Debata, jala sude na nilehonMu tu ahu parsampuluonku ma i tu Ho ( 1 Musa 28, 16-22 ).

Tangiang:

Ale Amanami jala Debatanami na maringanan di banua ginjang. Nang pe so hahaliangan langit ni langitan dohot tano on Ho, alai tong do diparsinta rohaM joroM di tano on, inganan panjouon di GoarMu na badia i. Ditangihon Ho do parhurajaon ni naposoM raja Daud ujui, i ma na boi pajongjongon ni anakna raja Salomo bagas JoroM i. Songon panangihonMu di parhurajaon ni naposoM raja Daud i, laos songon i ma tangihon eleheleknami on: sai patulus ma jongjong joroM di inganan on. Hupangido hami i di bagasan Goar ni AnakMu Tuhan Jesus Kristus Tuhannami. Amen.

Paragenda II:

Dibahen i songon on do Hata ni Tuhan Jahowa: Ida ma, Ahu paojakhon di Sion sada batu, batu na niuji, sada batu parsuhi na arga bahen ojahan na hot; manang ise na porsea di Ibana, ndang tagamon maporus (Jes. 28, 16).

Tangıang :

Ale Tuhannami Tuhan Jesus Kristus, Anak ni Ama na mangolu jala Pargogo na so hatudosan i. Ho do Sillam ni hasangapon ni Ama i dohot Suman ni hadirionNa; Ho do batu parsuhi na marpili jala na arga dohot ojahan na hot. Na mangido ma hami tu Ho: pahot ma batu parsuhi na naeng peakhononnami di bagasan GoarMu na badia i. Songon Ho mula dohot Ujung ni nasa na adong, laos Ho ma na mamulai, patorushon dohot na paujunghon ulaon on, na hupungka hami tau hasangapon dohot hamuliaon ni GoarMu na badia i. Hupasahat hami pangidoannami on tu Ho ale Tuhannami, ai Ho do Tuhan na mangolu jala na sintong, na mangarajai rap dohot Ama dohot Tondi Parbadia, ro di saleleng ni lelengna. Amen.

Paragenda III:

Asa ndada be angka paisolat manang panginsua hamu; angka dongan saharajaon raphon angka na badia do, jala dongan sabagas ni Debata. Ai dipauliuli do hamu di atas ojahan ni angka Apostel dohot Panurirang; Jesus Kristus sandiri do batu parsuhi disi. Di bagasan Ibana do martomu sandok bagas i jala lam ganda, gabe joro na badia di bagasan Tuhan i. Di bagasan Ibana do nang hamu rap dipauliuli, gabe parmianan ni Debata di bagasan Tondi i. (Epesus 2,19-22).

Tangiang:

Ale Tuhan Debata Amanami na di banua ginjang. Diparade Ho do parmianan ni hamuliaonMu na hot sian punguan ni angka na badia i. Lehon ma pangurupionMu dohot pasupasuM di na pajongjonghon bagas joroM on. Sai pauli ma nang hami songon angka batu na mangolu gabe bagas partondion jala joro na hot, parmianan ni hamuliaonMu. Hupangido hami i di bagasan Goar ni AnakMu Tuhan Jesus Kristus Tuhannami. Amen.

Marende:

( Dipeakhon paragenda I ma batu ojahan i mangihuthon na somal. Di tingki tangiang na mangihut, tongkohon ni paragenda i ma tolu hali batu ojahan i. Tanda + : panongkohon ).

Paragenda I:

Di bagasan haporseson di Tuhan Jesus Kristus pineakhon batu on gabe ojahan. Di bagasan Goar ni + Ama, + Anak, dohot + Tondi Parbadia. Anggiat ma mian tongtong dison: haporseaon na sintong, biar mida Jahowa dohot holong ni roha. Tau inganan partangiangan na pinarbadiaan ma on, laho manjou dohot mamuji Goar ni Tuhanta Tuhan Jesus Kristus, na mangolu jala na mangarajai rap dohot Ama i dohot Tondi Parbadia, ro di saleleng ni lelengna. Amen.

Marende :

Martangiang:

Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on, songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan, na mardosa tu hami ! Unang hami togihon tu pangunjunan ! Palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna. Amen.

Pasupasu:

Sai dipasupasu jala diramoti Debata ma hamu. Disondangkon Debata ma bohiNa tu hamu jala asi ma rohaNa mida hamu. Didompakhon Debata ma bohiNa tu hamu jala dipasaorhon ma dameNa tu tondimuna be. Amen.

Bagian paduahon

A. Angka ayat sidahonon di ari Minggu dohot di angka ari pesta

I. ADVENTUS

A.       1. Paboa hamu ma tu boru Sion: Ida ma, nunga ro hatuaonmi ! Ida ma, ihut tu Ibana do upa      silehononNa, jala pamalosonna di joloNa. ( Jes. 62, 11 ).

2.       Ida ma, hatop do Ahu ro, tiop ma na di ho nuaeng, asa unang adong na mambuat tumpalmi. ( Pangungk. 3, 11 ).

3.       Endehon hamu ma Debata, puji hamu ma GoarNa, palendes hamu ma dalan di Ibana, na marhureta di halongonan, Jahowa do GoarNa, jala marolopolop ma hamu di joloNa !

( Psalm 68, 5 ).

4.       Marolopolop ma ho jala marlas ni roha, ale boru Sion, ai ida ma, na ro ma Ahu maringanan di tongatongam i, ninna Jahowa.

( Sakaria 2, 14 ).

B.       1.  Ho do ale Jahowa, dihalungunhon rohangku. Ale Debatangku, marhaposan tu Ho do ahu, sai unang paila ahu, asa unang marsuraksurak angka musungku mida ahu. Ndang tahe tagamon tarurak manang ise sian angka na manghaposi Ho, ale Jahowa, sai pabotohon ma tu ahu angka dalanMu, jala ajarhon tu ahu angka bogasMu. ( Psalm 25, 1-4 ).

Sadari on ma ro Tuhan i manopot joroNa, beta, tasomba ma Ibana !

2.       Patuginjang ma tohangmuna, hamu ale angka harbangan, patuginjang ma hamu, ale angka pintu sian narobi, asa bongot Raja ni hamuliaon! Ise ulaning Raja ni hamuliaon i ? I ma Jahowa, na gogo jala ulubalang, Jahowa ulubalang di hamusuon. Patuginjang ma tohangmuna, hamu ale angka harbangan, jala patuginjang ma hamu, ale angka pintu sian narobi, asa bongot Raja ni hamuliaon i ! Ise ulaning Ibana, Raja ni hamuliaon i ? I ma Jahowa Sebaot, Ibana do Raja ni hamulinon i.

( Psalm 24, 7-10 ).

3.       Manetehi ma angka langit sian ginjang, jala diusehon angka ombun ma udan hatigoran. Buha ma tano on jala diparbuehon hatuaon dohot hatigoran. Angka langit do mamaritahon hamuliaon ni Debata, jala jadijadian ni tanganNa do pinaboa ni na ratarata ni langit i. ( Jes. 45,8; Psalm 19, 1 ).

II. PESTA HATUTUBU NI TUHAN JESUS

A.       1. Dung i gabe daging ma Hata i, jala maringanan di tongatonga ni hita on, jadi huida hami ma hasangaponNa songon hasangapon ni anak sasada na sian Ama i, gok asi ni roha dohot hatutuon. ( Joh. 1, 14 ).

2.       Nunga patar hangoluan i, jala nunga huida hami jala nunga huhatindangkon hami dohot hubaritahon hami tu hamu hangoluan na saleleng ni lelengna, na di lambung ni Ama i hian jala naung patar di hami.

( Joh. 1, 2 ).

B.                  1.  Nunga-tubu di hita sada posoposo, dilehon tu hita sada Anak, pampe tu abaraNa do sogot harajaon, jala bahenonna GoarNa: Sipartahi halongangan, Ulubalang ni Debata Ama, saleleng ni lelengna, Raja ni hadameon. ( Jes. 9, 5 ). Endehon hamu sada ende na imbaru di Jahowa, endehon ma Jahowa, ale sandok tano on. Pajojor hamu ma di tongatonga ni angka sipelebegu hamuliaonNa i, di tongatonga ni saluhut bangso halongangan, angka na binahenNa i. Marsomba ma hamu tu Jahowa marpahean na marhadohoan, angka hitir ma hamu mar~dophon Ibana, ale isini sanduk tano on (Psalm 96,1, 3, 9 ).

2.       Bangso na mardalani di bagasan haholomon marnida sada panondang na bolon. Binsar do sada panondang di angka na mangingani tano na nilinggoman ni hamatean.

(Jes. 9,1 ).

Marrongoman bangsoM ro sian lomona di ari parporanganMu; marpahean habadiaon, songon nambur sian ampuan ni andos torang ro do tu Ho paranganMu angka na umposo. ( Psalm 110, 3 ).

III. TAON NA IMBARU

A.           Ahu do Alpha, Ahu do Omega, bonana dohot ujungna ninna Tuhan i, na adong dohot naung adong hian dohot na ro. Pargogo na sumurung.

( Pangungk. 1, 8 ).

B.           Sai mangaranapi do matangku dompak angka dolok: Sian dia do ulaning ro panguruipon tu Ahu ? Sian Jahowa Sitompa langit dohot tano on sambing ro pangurupion ianggo tu ahu. Ndang tagamon loasonNa tarsulandit patmu, ndang tagamon nok mata ni Sijaga ho. Sai jagaon ni Jahowa do ho sian nasa parmaraan, sai jagaonNa do tondim. Sai jagaon ni Jahowa do ho laho ruar dohot laho bongot olat ni on ro di saleleng ni lelengna. ( Psalm 121, 1-3.7.8.).

IV. EPIPHANIAS

A.       1.  Songon on do ninna Tuhan Jahowa: Hehe ma ho ! Marsinondang ma ho! Ai na ro ma na  manondangi ho, jala hamuliaon ni Jahowa binsar di atasmu. ( Jes. 6D, 1 ).

2.       Mandok mauliate ma hamu di Ama i, na mangaroro hita sian gomgoman ni haholomon, jala na paunsathon hita tu bagasan harajaon ni Anak haholongan ni rohaNa.

( Kol. 1,12.13 ).

3.       Ale Jahowa huhaholongi do hajongjongan ni bagasMu dohot hasonggopan ni hamuliaonMu. ( Psalm 26, 8 ).

4.       Sai pabotohononMu do tu ahu dalan hangoluan, gok do las ni roha di adopan ni bohiM, angka hasudungan ni roha do di siamunMu saleleng ni lelengna. ( Psalm 16, 16 ).

5.       Debata do haporusanta dohot hagogoonta, pangurupi situtu di hagogotan, angka na mangonai tu hita. Dibahen i ndang mabiar hita, nang pe balik tano on, jala lalolalo angka dolok, laho marongrong tu tongatonga ni laut. ( Psalm 46, 2. 3).

6.  Lehon ma tu Jahowa hamuliaon ni GoarNa, marsomba ma hamu tu Jahowa, mamangke pahean na marhadohoan. ( Psalm 29, 2 ).

B.       1.  Puji ma Jahowa, hamu ale angka surusuruanNa. Dibege Sion do i, jadi marlas ni roha ma, marolopolop ma angka boru ni Juda, ala ni panguhumMu ale Jahowa ! Jahowa do Raja marolopolop ma tano on, marlas ni roha ma pulo angka na lan i.

(Psalm 103, 20; 97, 8; 97, 1 ).

2.       Jahowa do panondangi di ahu dohot hatuaonhu, tung ise ma habiaranhu? Nang pe marhoronhoron parangan angka na manungkum ahu, ndang dihabiari rohangku. Sada do naung hupangidohon tu Jahowa, sai i do hulului: Naeng mian ahu di bagasan Joro ni Jahowa saleleng mangolu ahu paidaidahon hinadenggan ni Jahowa dohot manghalomohonsa. Haposi ma Jahowa, pagomos jala patogu roham jala parhanalom Jahowa. ( Psalm 27, 1 a. 3 b. 4. 14 ).

V. TINGKI PANAONON NI TUHAN JESUS PARJOLO

( SEPTUAGESIMA - ESTOMIHI )

A.      1. Songon on didok Tuhan Jesus: Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha, asa dapotan paradianan hasonangan tondimuna.

( Mat. 11, 28, 29 ).

2.       Beta ma hita manungkap marsomba, marsinggang ma hita tu adopan ni Jahowa, Sitompa hita. Ai Ibana do Debatanta, jala hita bangso pinarmahanNa jala birubiru niiringiring ni tanganNa. (Psalm 95, 6. 7).

3.       Tung beha ma pamaloshu di saluhut denggan ni uhum ni Jahowa tu ahu! Surdukhononku do panginuman parhatuaon tu ginjang jala pajoujouonku do Goar ni Jahowa. ( Psalm 116, 12.13 ).

B.                  Sai paeleng ma pinggolMu tu ahu, hapogani paluahon ahu. Sai Ho ma gabe dolok batu partanobatoan di ahu, gabe huta na gonting laho pangoluhon ahu. Ai Ho do partanobatoanku hian dohot pangondinganku, jala ala ni goarMu sai iringiringonMu jala toguonmu ahu. Tu Ho do, ale Jahowa, ahu marhaposan, sai unang ma paurak ahu saleleng ni lelengna; sai palua ma ahu marhitehite hatigoranMu ! ( Psalm 31, 3, 4. 2). !

VI. TINGKI PANAONON NI TUHAN JESUS

A.      1. Ai dokhononNa do angka surusuruanNa taringot tu ho, asa dijaga ho di angka dalanmu sudena. Sai tangantanganonnasida do ho, asa unang tartuktuk patmu tu batu.

( Psalm 91,11.12 ).

2.       Diusung Ibana do dosanta marhitehite dagingNa tu hau i, asa dung lias hita sian dosa, mangolu hita di bagasan hatigoran; marhite sian bugangNa do malum hamu.                    ( 1 Petr. 2, 24 ).

3.       Sai manatapnatap do matangku tu Ho, na marhabangsa di banua ginjang. Ida ma, songon mata ni angka anaksomang tu tangan ni induksomangnasida, songon mata ni naposo boruboru tu tangan ni sorangannasida, songon i do mamerengi matanta tu Jahowa Debatanta paima asi rohaNa di hita. ( Psalm 123, 1. 2 ).

4.       Tongon do angka sahitta diusung Ibana, jala angka pardangolanta diporsan. Ala ni pangalaosionta Ibana tartullang, binahen ni hajahatonta Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malum hita.           ( Jes. 53, 4. 5 ).

5.       Jahowa do patupahon angka pambahenan hatigoran, jala dipatingkos uhum tu sudena angka na nirupa. ( Psalm 103, 6 ).

6.       (Estomihi). Ai Ibana, hapatean jala parmulaan ni nasa na adong, na tama do Ibana, di na tinogihonNa torop anak tu hasangapon padengganhon sun induk ni hangoluannasida marhitehite haporsuhon.

( Heber 2, 10 ). 56

 B.     1. (Invocavit). Songon on do didok Tuhan Jahowa: Jouonna ma Ahu, jala alusanKu ma ibana, sai dongananKu do ibana jumpa hagogotan, paluaonKu do ibana jala marmulia ibana bahenonKu. Sai pamahaponKu do ibana sarimatua. Martua do na hundul di pangondingan ni Natumimbul i jala na mian di linggoman ni pargogo na so hatudosan, na mandok tu Jahowa: Haporusanku jala partanobatoanku, Debatangku, marhaporusan tu Ho do ahu. ( Psalm 19, 15.16a. 1-2 ).

2.       (Reminscere). Sai ingot ma, ale Jahowa, angka denggan ni basaM dohot asi ni rohaM, ai sian narobi do angka i. Asa unang marsuraksurak angka musungku mida ahu. Ale Debatangku, marhaposan tu Ho do ahu, sai unang paila ahu. ( Psalm 25, 6, 2b 1. 2b ).

3.       (Octili). Sai tong do mamerengi matangku tu Jahowa, ai Ibana do mangenet pathu sian jorgong. Sai dompakhon ma ahu, jala asi rohaM di ahu, ai puqjung jala na dangol do ahu. Ho do, ale Jahowa, dihalungunhon rohangku. Ale Deatangku marhaposan tu Ho do ahu, sai unang paila ahu. (Psalmn 25,16,1,2a).

4.       (Letare). Marlas ni roha ma hamu rap dohot Jerusalem jala marolopolop mida ibana sude hamu, ale angka na holong roha di ibana ! Marlas ni roha situtu ma - rap dohot ibana sude hamu, ale angka na marsak roha mida ibana nesailaon ! Las do rohangku di angka na mandok tu ahu: beta hita manopot bagas ni Jahowa ! ( Jes. 66. 10; Psalm 122, 1 ).

5.       (Judica). Lulohon ma ahu, ale Debata, jala parbadahon badangku dompak bangso na so daulat roha, sai palua ma ahu sian baoa siulahon sipaotooto dohot hajengkelon. Ai Ho do Debata haroroan ni hagogoonku. Tongos rna hatiuronMu dohot hatigoranMu, angka na manogu ahu, pataru ahu tu dolok ni habadiaonMu dohot tu ingananMu.                             ( Psalm 43, 1. 4a. 3 ).

6.       (Palmarum). Asi ma rohaM di ahu, ale Jahowa, ai targogot do ahu, maras do rohangku dohot dagingku. Alai anggo ahu, tu Ho do ahu marhaporusan, ale Jahowa, ningku do: Ho do Debatangku. Marguru tu tangan-Mu do angka parsorionki, sai palua ma ahu sian tangan ni angka musungku dohot sian angka na mangalotongi ahu. Ale Jahowa, sai unang paurak ahu, ai Ho do na hujou, sai palua ma ahu marhitehite hatigoranMu.

( Psalm 31, 10. 15. 16. 18a. 2b ).

VIII.            PARNINGOTAN DI HASASAHAT NI ULAON NA BADIA

A.           Sai mangan do sogot na dangol i jala butong, ingkon mamuji Jahowa do angka na usouso di Ibana: Sai tarhilas do rohamuna salelenglelengna.

( Psalm 22, 27 ).

B.           Nunga dibahen Tuhan Jahowa sada parningotan di halongangan angka na binahenNa i, pardenggan basa jala parasi roha do Ibana. Songon panghalungunhon ni ursa di angka batang aek, songon i do pangkalungunhon ni tondingku tu Ho, ale Debata. Mauas do tondingku di Debata, di Debata na mangolu i. ( Psalm 111, 4; 42, 2. 3a ).

VIII. ARI HAMAMATE NI TUHAN JESUS

A.           Sintua ni malim sisongon i do tama di hita, na badia, na so jahat, na so marlindang, na so marbolat sian angka pardosa, naung gabe tumimbo sian angka banua ginjang. Na so pola ganup ari songon angka sintua ni malim i mamboan jumolo pelean taringot tu angka dosana sandiri, dung i taringot tu dosa ni natorop i, ai sahali do i diulahon, di na mamelehon diriNa Ibana. ( Heber 7, 26.27 ).

B.    1.   Na gabe pangoloi do Kristus paima mate, pola tung mate tarsilang. Di dia angka soropmi,   ale hamatean ? Di dia pangagoonmu, ale banua toru? ( Phil. 2, 8; Hos. 13, 14b ).

2.          Sai unang mandaoduo ianggo Ho, ale Jahowa, parsigantunganku, hapogani ma mangurupi ahu. Merus do gogongku songon ngarngar, jala lohot do dilangku di langitlangit ni pamanganhu, jula tu orbuk ni na mate dipapodom Ho ahu. Ale Debatangku ! Debatangku ! Boasa tung tadingkononMu ahu ? Unang manduodeo Ho sian ahu, ai donok nama parmaraan, ai so adong sipartumpak. ( Psalm 22, 20. 16, 2a. 12 ).

IX. ARI HAHEHEON

A.     1.       Unang ho mabiar, Ahu do bonana dohot ujungna. Na mangolu do, jala naung mate do Ahu najolo, jala ida ma, Ahu do na mangolu ro di saleleng ni lelengna, jala di Ahu do anakhinsu ni banua toru dohot hamatean.

               ( Pangungkapon 1,17b, 18 ).

2.         Haleluya ! Di Tuhan Debatanta i do hatuson dohot hasangapon dohot hamuliaon dohot hagogoon. Na pahehehon Tuhan Jesus, i do na pahehehon dohot hita sogot ala ni Tuhan Jesus. ( Pangungkapon 19, lb; 2 Kor. 4,14a)

B.           Nunga hehe Tuhan i, nunga tutu hehe Ibana. Ari on do na jinadihon ni Jahowa, marolopolop jala marlas ni roha ma hita disi. Batu naung binolongkon ni angka padde bagas, i ma gabe batu parsuhi. Pinamasa ni Jahowa do i, halongangan do i anggo di matanta. ( Lukas 24, 34; Psalm 118, 24. 22. 23 ).

X. TINGKI HAHEHEON

A.     1.  Soara ni olopolop dohot hatuaon marsaringar di undungundung ni angka partigor. Siamun ni Jahowa do sibahen hamonangan. Timbul situtu do siamun ni Jahowa; siamun ni Jahowa do sibahen hamonangan.

( Psalm 118, 15.16 ).

2.         Ida ma, Debata do hatuaonku. Ibana huhaposi, jadi ndang mabiar ahu, ai Tuhan Jahowa do hagogoonku jala pujionku do na manjadi hatuaon di ahu. ( Jes. 12, 2 ).

3.         Pinuji ma Debata jala Ama ni Tuhanta Jesus Kristus, na tumubuhon hita paduahalihon sian godang ni asi ni rohaNa tu pangkirimon na mangolu marhitehite haheheon ni Tuhan Jesus Kristus sian na mate.

( 1 Petr. 1, 3a ).

4.         Tung na arga situtu do asi ni rohaM, ale Debata ! Jadi marhaporusan tu linggoman ni habongMu do angka anak ni jolma. Ai di lambungMi do mual hangoluan, di bagasan hatiuronMi huida hami hatiuron.

( Psalm 36, 8, 10 ).

5.         (Rogate). Songon on do didok Tuhan i: Pajoujouonmuna ma Ahu, laho martangiang tu Ahu, jala tangihononKu ma hamu. Jala luluanmuna ma Ahu laos jumpang hamu; molo tung dilului hamu Ahu sian nasa rohamune, jadi jumpang hamu ma Ahu.                            ( Jer. 29, 12, 13, 14a ).

B.    1. (Quasimodogeniti). Hisapan ma hamu songon posoposo na imbaru tubu i, di susu na denggan na so mangansi asa lam ganda hamu marhite sian i molo tung nunga didai hamu basar ni Tuhan i. Puji hamu ma Debata hagogoonta i, olophon hamu ma Debata ni si Jakop. (Psalm 81, 2).

2.         (Miserikordias Domini). Gok asi ni roha ni Jahowa do tano on. Marhitehite Hata ni Jahowa do manjadi angka langit. Marolopolop ma hamu, ale angka partigor, mangasahon Jahowa, talup do marende angka na unjur marroha. ( Psalm 33, 5b. 6a. 1 ).

3.         (Jubilate). Marolopolop tu Debata ma ho, ale sandok tano on ! Endehon hamu ma hamulison ni GoarNa marmulia bahen hamu pujipujianNa. Dok hamu mandok Debata: Tung na songkal do angka pambahenanMu ! Binahen ni hinatimbul ni gogoM ingkon marsomba tu Ho angka musuM.

( Psalm 66, 1-3 ). 59

4.         (Cantate). Endehon hamu ma di Jahowa ende na imbaru, ai nunga dipambahen Ibana angka halongangan. Nunga dipabotohon Jahowa hatuaonNa, nunga dipapatar Ibana hatigoranNa di adopan ni angka sipelebegu. Nunga ditumpahi tangan siamunNa na badia i Ibana. ( Psalm 98, la. 2. lb ).

5.         (Rogate). Marsoara olopolop ma hamu paboahon, patubegehon hata i, pasar hamu ma i ro di ujung ni tano on, dok hamu ma: Nunga dipalua Jahowa naposoNa si Jakop. Marolopolop tu Debata ma ho, ale sandok tano on ! Endehon hamu ma hamuliaon ni GoarNa, marmulia ma bahen hamu pujipujianNa. ( Jes. 48, 20b; Psalm 69, 1. 2 ).

XI. HANANAEK NI TUHAN JESUS

A.                Songon on do didok Tuhan i: BahenonKu do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i.         ( Pangk. 3, 21).

B.                Nunga didok Jahowa mandok Tuhanku: Hundul ma Ho di siamunHon, paima hubahen angka musuM sidegedegean ni patMu. Marrongoman bangsoM ro sian lomona di ari parporanganMu, marpahean habadiaon; songon nambur sian ampuan ni andos torang ro do tu Ho paranganMu angka na umposo. Nunga pola maruari Jahowa, jala ndang tagamon solsolanNa rohaNa:      Sai Ho do malim ro di salelenglelengna mangihuthon horong ni si Melkisedek. Sai patimbul ma diriM, ale Debata, tu atas ni langit hamuliaonMu tu sandok tano on. ( Psalm 110,1. 3. 4; 57, 6 ).

XII. EXAUDI

A.            Songon on do didok Tuhan Jesus: Lehonon ni Amamuna na di banua ginjang i do Tondi Parbadia tu angka na mangidohonsa. ( Luk. 11, 13b ).

B.            Sai tangihon ma soarangku, ale Jahowa, molo joujou ahu. Didok rohangku, Ho mandok: Lului hamu ma bohingKu ! Antong bohiM ma na hulului, ale Jahowa. Sai unang ma tabunihon bohiM maradophon ahu. Jahowa do panondangi di ahu dohot hatuaonhu, tung mida ise ma mabiar ahu ? Jahowa do partanobatoan ni ngolungku, tung mida ise ma ahu biahaton ?

( Psalm 27, 7. 8. 9a. 1).

A.            Songon on do.........( Lukas 11,13b ).

B.            Sai tangihon..........(Psalm 27, 7. 8. 9a 1 ).

Nunga tangkas huboto sangkap angka na husangkapi taringot tu hamu ninna Jahowa, sangkap hasonangan do tahe, ndada tu hamagoan, asa Ahu mangalehon tu hamu ujung ni na hinalungunhonmuna. Jadi pajoujouonmuna ma Ahu, huhut laho hamu martangiang tu Ahu, gabe tangihononKu ma hamu. (Jer. 29,11. 12).

XIII. PESTA PENTAKOSTE

A.                Songon on ninna Tuhan Jahowa: LehononKu tu hamu roha na imbaru dohot tondi na imbaru tu bagasan ateatemuna, jela unsatonKu do roha batu sian dagingmuna, jala lehononKu tu hamu roha na marpangkilalaan. Jala lehononKu ma TondingKu tu bagasan ateatemuna, Ahu do mambahensa, asa marparange hamu di bagasan angka PatikHu, angka uhumHu pe radotanmuna jala patupaonmuna do. ( Hes. 36, 26.27 ).

B.                Sian Sion, situan ni hinadenggan, marsinondang Debata Sai na ro do Debata, jala ndang tagamon hohom Ibana; ai songon on do didok Jahowa: UsehononKu ma aek tu angka na mauas dohot angka sunge tu na mahiang. Us~ hononKu ma tutu TondingKu tu pinomparmuna nuaeng iala pasupasungKu tu pinomparmu sogot. Jahowa do Debata, jela Ibana manondangi hita. Tambathon hamu ma angka pelean pesta i sahat ro di angka tanduk ni langgatan. ( Psalm 50, 2, 3a; Jes. 44, 3; Psalm 118, 27 ).

A.                Songon on ninna Tuhan Jahowa      ( Hes. 36, 26, 27 ).

B.                Sian Sion, situan......( Psalm 50, 2, 3a; Jes. 44, 3; Psalm 118, 27).

Tagan so manjou dope nasida, nunga mangalusi Ahu, mangkatai dope nasida nunga manangihon Ahu. ( Jes. 65, 24 ).

Di hamu do bagabaga i dohot di angka anakhonmuna ro di saluhut na dao, manang piga na naeng jouon ni Tuhanta dope. ( Ulaon 2, 39 ).

Molo tung adong apoapo marhitehite Kristus, dohot sosososo holong ni roha - dohot parsaoran ni Tondi, nang talup dohot asi ni roha, gohi hamu ma halalas ni rohangkon: Sada ma parrohahon hemu; sada ma haholonganmuna. Saroha, sapingkiran ma hamu. ( Pilipi 2,1. 2 ).

  

XIV. TRINITATIS

A.                Huida Tuhan i hundul di atas habangsa na timbo jala na marmulia, jala angka rambu ni paheanNa manggohi bagas joro. Jongjong di atas surusuruan Seraphim, jala masijouan ma nasida songon on: Na badia, na badia, na badia do Jahowa Sebaot, gok hamuliaonNa liat portibi on. ( Jes. 6, 1 b. 2a. 3)

A.                Huida Tuhan i .......            ( Jes. 6,1 b, 2 a ).

Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanNa i, di bagasan holong ni roha. ( Ep. 1, 3. 4 ).

Ida ma sai nolnol do mata ni Jahowa tu angka na manghabiari Ibana, angka na manghalungunhon asi ni rohaNa. Sai dihalungunhon rohanami do Jahowa. Ibana do panumpahi dohot lombulombunami. Ai mangasahon Ibana marlas ni roha do hami, marhaposan tu GoarNa na badia i do hami. Sai pasonggop ma asi ni rohaM tu hami, ale Jahowa, hombar tu panghalungunhonnami di Ho. ( Psalm 33,18, 20. 21. 22 ).

B.                Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang di bagasan Kristus. Dibolati do hita gabe anak tu Ibana bahen pamujian di hamuliaon ni asi ni rohaNa. Ale Jahowa, sigomgom hami, mansai sangap do GoarMu di liat portibi on. ( Ep. 1, 3, 5a. 6a; Psalm 8,10 ).

C.                 

XV. TlNGKI TRINITATIS

ANGKA AYATAYAT SIPILLITON DI llNGKI TRINITATIS

A.   1.   Na mamolus do anggo portibi on rap dohot na pinangido ni rohana, alai na mian ro di saleleng ni lelengna do na mangulahon lomo ni roha ni Debata. ( 1 Joh. 2,17 ).

2.         Songon on ninna Tuhan Jahowa: Ianggo halak partigor i mangolu do binahen ni parsihohotna marhaporseaon; alai anggo di halak parjahat ndang adong hasonangan.        ( Habak. 2, 4b; Jes. 48, 22 ).

3.         Nunga tibu hian diida rohangku Jahowa, ninna Ibana do: Haholongon salelenglelengna hubahen mangkaholongi ho, dibahen i hutaiti ho marhitehite denggan basa. ( Jer. 31, 3 ).

4.         Songon on do Hata ni Tuhan Jahowa: Ida ma, Ahu, apala Ahu sandiri usouso sogot di birubirungKu jala luluanKu nasida. Songon pangalului ni parmahan di punguanna ganup ari, uju di tongatonga ni birubiruna angka na mampar i ibana, suang songon i Ahu mangalului birubirungKu sogot. ( Hes. 34,1 1,1 2a ).

5.         Mangasahon Debata sai hamonangan do ulahononta. Ngot ma ho, ale parhinaloan ! Tarsunggul ma ahu di buha siang ari. Pujionku ma Ho di tongatonga ni angka bangso, ale Tuhan, endehononku ma Ho di tongatonga ni angka marga ( Psalm 60, 14a; 57, 9a. 10 ).

6.         Nunga dipabotohon Ibana tu ho, ale jolma, manang aha na denggan jala manang aha na niluluan ni Jahowa sian ho, i ma na mangulahon uhum sambing dohot holong ni roha di habasaon, jala marpangalaho haserepon maradophon Debatam. ( Mika 6, 8 ).

7.         Songon on do Hata ni Tuhan Jesus: Martua ma angka na mauas male mida hatigoran, ai pabosuron do nasida. Martua ma angka na ias tondi, ai idaonnasida do Debata.                  ( Mat. 5, 6, 8 ).

8.         Ai na mangolu do Hata ni Debata jala margogo mangula, jala tumajom sian sandok podang sidua baba, jala manorusi do i rasirasa disirang hosa dohot tondi, angka ringring pe dohot utok, jala panguhum do i di parrohaon dohot di pingkiran ni roha. ( Heb. 4,12 ).

9.         Parangehon hamu ma na tama di Tuhan i, marguru tu sandok lomo ni rohaNa, marparbuehon parbue marhitehite saluhut ulaon na denggan. Oloi hamu ma Jahowa marhitehite las ni roha, ro be ma hamu tu joloNa marhitehite olopolop.                                 ( Kol. 1,10; Psalm 100, 2 ).

10.     Tigor do angka dalan ni Jahowa, jala halak partigor mardalan disi; alai anggo halak parjahat tarsulandit do disi. ( Hos. 14, 10 b ).

11.     Dialo Debata do angka na jungkat roha, alai dilehon do asi ni rohaNa tu angka na serep marroha. ( 1 Petr. 5, 5b ).

12.     Pardenggan basa do Jahowa, tau partanobatoan di ari hagogotan jala ditanda do angka na marhaposan tu Ibana. ( Nah. 1, 7 ).

13.     Disuru Debata do AnakNa gabe pardengganan taringot tu dosanta. Hamu ale angka dongan, molo songon i dihaholongi Debata hita, ingkon dohot do hita masihaholongan sama hita. ( 1 Joh. 4, 10b, 11).

14.     Songon on do Hata ni Tuhan Jahowa: Manang ise na mamelehon hamauliateon, i do na pasangap Ahu jala mambahen dalan, asa hupatuduhon tu ibana hatuaon ni Debata. ( Psalm 50, 23 ).

15.     Tung ise ma donganku di angka banua ginjang ? Jala dungkon ni Ho, ndang adong dihalomohon rohangku di tano on. Nang pe merus sibukhu dohot rohangku, sai Debata do partanobatoan ni rohangku jala panjambaranku salelenglelengna. ( Psalm 73, 25, 26 ).

16.     Dihorhon haporsuhonnami na satongkin jala na neang i do hasangapon na sumurung, na lumobi hamuliaon na salelenglelengna tu hami, hami angka na so tumailihon angka na tarida angka na tumailihon angka na so tarida; ai na martingki do anggo angka na tarida, alai na salelenglelengna do angka na so tarida. ( 2 Kor. 4,17,18 ).

17.     Kristus Jesus do naung gabe hapistaran sian Debata tu hita, gabe hatigoran dohot habadiaon dohot haluaon. ( 1 Kor. 1, 30 ).

18.     Pos situtu do rohangku, manang hamatean, manang hangoluan, manang angka surusuruan ni Debata, manang harajaon, manang hagogoon, manang angka na masa nuaeng, manang angka na ro sogot, ndang tarbahen i manirangi hita sian haholongon ni roha ni Debata, na marhitehite Kristus Jesus Tuhanta i. ( Rom 8: 38, 39b ).

19.     Hurajumi angka sitaonon di hasiangan on, hira na soada do martimbanghon hasangapon sipapataronNa tu hita sogot. ( Rom 8,18 ).

20.     Biar mida Jahowa do parmulaun ni hapistaran, maruli hamaloon ni roha na sumurung do sude angka na mangulahonsa; hot do baritaNa i ro di salelenglelengna. ( Psalm 111, 10 ).

21.     Martua do halak na manaon di pangunjunan, ai dung tau sian pangunjunan i, jaloonna do tumpal hangoluan, na pinarbagabaga ni Tuhan i tu angka na holong roha di Ibana.             ( Jak. 1, 12 ).

22.     Ise do na jadi nangkok tu dolok ni Jahowa, jala ise do na jadi jongjong di hajongjongan ni habadiaonNa i ? Halak partangan na lidang dohot na ias roha. ( Psalm 24, 3. 4a ).

23.     Songon on do didok Tuhan Jesus: Ianggo poda na di Ahu, ndang Ahu nampunasa, poda ni na marsuru Ahu do i. Molo adong manang ise na mambahen lomo ni roha ni Ama i, botoon ni i do taringot tu poda i, manang na sian Debata i, manang na huhatahon i sian roharohangku sandiri. Songon na nidok ni Surat i: Angka batang aek na mangolu do mabaor sian pamatang ni na porsea di Ahu. ( Joh. 7, 16. 17. 38 ).

B.    1.  Ditimbang rohanami do, ale Debata, asi ni rohaM di parsitongaan ni JoroM i. Suman tu GoarMu do baritaM, ale Debata, ro di ujung ni tano on, gok hatigoran do siamunMi. Timbul do Jahowa jala pujion situtu do di bagasan huta ni Debatanta, di atas dolok habadiaonNa i.

( Psalm 48, 10, 11, 2 ).

2.         Ingkon songon i do HatangKu na ruar sian pamanganKu: Ndang mulak boti tu Ahu, ingkon bahenonna do lomo ni rohangKu, jala ingkon manjadi do umbahen na hutongos. O sude hamu, angka na mauas, ro ma hamu tu aek ! Jala hamu angka na so marhepeng, ro ma hamu manuhor dohot manganhon ! Sai ro ma hamu manuhor anggur dohot susu, unang pola marhepeng manang marpanuhor. Sai lului hamu ma Jahowa, binsan tarbahen dope jumpang Ibana, jou hamu ma Ibana binsan jonok dope Ibana. ( Jes. 55. 11, 1, 6 ).

3.         Lombulombunami do Ho, ale Debata, asi ma rohaM, tatap ma bohi ni MesiasMi. Ai dumenggan do sadari di angka alamanMu, sian saribu ari na asing. Dengganna i angka ingananMi, ale Jahowa Sebaot ! Pola do maras jala maheu rohangku dibahen lungunna di angka alaman ni Jahowa. ( Psalm 84,10,11 a, 2, 3 a ).

4.         Halomohon Jahowa, jadi lehononNa ma tu ho na pinangido ni roham. Pasahat ma dalanmu tu Jahowa jala haposi Ibana, asa Ibana paturehon. Pahohom ma roham maradophon Jahowa jala Ibana paimaima. Sai marhaposan tu Jahowa ma ho jala ulahon na denggan. Ai holong do roha ni Jahowa mida uhum jala ndang tagamon tadingkononNa angka na niasianNa. ( Psalm 37, 4. 5.7 a. 3 a. 28 a ).

XVI. PESTA GOTILON.

A.                Saluhutna silehonlehon na denggan dohot nasa ulibasa na mauliutus, na ro sian banua ginjang do i, sian Ama ni angka hatiuron, ndang adong anggo di Ibana parsorinon manang halinu ni pangkusoron. ( Jak. 1,1 7 ).

B.                Songon on do didok Tuhan Jahowa: Ndang be ulahanKu mangaragehon nasa na mangolu, songon na hubahen i. On pe saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin. Na balga situtu do Ho, ale Jahowa Debatangku, marpahean hasangapon dohot hamuliaon do Ho. ( 1 Musa 8, 21 b, 22; Psalm 104,1 b).

C.                 

XVII. PESTA REORMASI

A.                Ndang adong na tarbahen paojakhon haojahan na asing sian naung ojak i, i ma Tuhan Jesus Kristus. ( 1 Kor. 3, 11; Rom 3, 28 ).

B.                Sada batang aek ro di sungena palashon roha ni huta ni Debata, inganan na badia ni Natumimbul, Debata do di tongatongana, ndang tagamon humordit; andostorang dope nunga diurupi Debata ibana. Debata do haporusanta, dohot hagogoonta, pangurupion situtu di hagogotan, angka na mangonai tu hita. Jahowa Sebaot do donganta, Debata ni si Jakob do partanobatoanta.  ( Psalm 46, 5. 6. 2.8 ).

XVIII. ANGKA MINGGU DI UJUNG NI TAON HURIA.

A.  1. Angka diboto hamu do, na mangkorhon habengeton ni roha do pangunjunan di haporsesonmuna. Alai ingkon adong do ulaon naung sun denggan di habengeton i, asa tung tang situtu jala halak sisandok hamu, angka na so hurangan di manang aha. Martua do naposo, na mangulahon sisongon i didapot tuanna di harorona i.

( Jak. 1, 3, 4; Luk. 12, 43 ).

2.         Mulak ma sogot halak, angka na pinalua ni Jahowa, jala mariaia ro tu Sion; jala halalas ni roha salelenglelengna di atas ulunasida, dapotan hilas dohot las ni roha nasida, alai maporus ma anggo arsak dohot hoihoi ni roha. ( Jes. 35, 10 ).

3.         Dungo ma hamu jala martangiang, asa unang hamu bongot tu pangunjunan. Managam ma hamu, dungo ma hamu jala martangiang, ai ndang diboto hamu manang andigan tingki ni i.

( Mat. 26, 41 a; Mark. 13, 33 ).

B.                Hohom ma hamu maradophon Tuhan Jahowa; ai jonok nama ari ni Jahowa na bolon i, jonok nama i, jala silu situtu do i ro. Di na mulak tinogihon ni Jahowa angka na tarbuang sian Sion, doshon halak na marnipi do hita. Gok parengkelon ma ujui pamanganta jala marolopolop. Ida ma, hatop do Ahu ro, tiop ma na di ho nuaeng, asa unang adong na mambuat tumpalmi.

( Sepanya 1, 7a, 14a; Psalm 126, 1, 2a; Pangungkapon 3, 11 ).

XIX. ARI PANOPOTION DI DOSA

A.    1.  Songon sintongna mangolu Ahu, ninna Tuhan Jahowa, tung na so lomo do rohangKu mida hamatean ni halak parjahat, so ingkon mida hamumulak ni parjahat i tumadingkon dalanna hian, asa mangolu ibana. ( Hes. 33, 11 ).

2.         Sian pardangolan angka na bagas do ahu joujou tu Ho, ale Jahowa ! Ale Tuhan, sai tangihon ma soarangku, sai patinggil ma pinggolMu tumangi soara ni anggukhon ! Molo tung manjujur Ho, ale Jahowa di angka dosa, tung ise ma manahan, ale Tuhan ? Alai tahe marroha pamuation do Ho, asa dihabiari halak Ho. ( Psalm 130,1-4 ).

B.   1.  Tangihon hamu, ale angka langit, jala bege ma ale tano on ! Ai mangkuling do Jahowa: Hupagodanggodang do angka anak jala hupatimbul, hape marbalik do nasida sian Ahu, angka tumadingkon Jahowa, angka na mangaleai na badia ni Israel, angka na sumurut tu pudi. Molo tung manjujur Ho, ale Jahowa, di angka dosa, tung ise ma manahan ale Tuhan? ( Jes. 1, 2, 4b; Psalm 130, 3 ).

2.         Songon on do Hata ni Tuhan Jahowa: Sai mulak ma hamu tu Ahu sian nasa rohamuna; ndang be parupionKu bohingKu mida hamu, ai Pardengganbasa do Ahu, ninna Jahowa, ndang manjujur Ahu salelenglelengna, asal ma ditanda ho hajahatonmu, na tinundalanmu Jahowa Debatam. ( Joel 2, 12a; Jer. 3, 12b, 13a ).

XX. PARNINGOTAN DI ANGKA NA MATE

A.                Songon on do Hata ni Tuhan Jesus: Na monang i do siparulosan dohot angka ulos na saksak, jala ndang sesaonKu goarna sian pustaha hangoluan, jala parhatopotonKu do goarna di jolo ni Damang dohot di jolo ni angka surusuruanNa. ( Pangungkapon 3, 5 ).

B.                Songon duhutduhut do saluhut daging jala songon bungabunga ni duhutduhut i do saluhut hasangapon ni jolma. Nunga malos duhutduhut i jala nunga marurus bungabungana i, alai na hot do Hata ni Tuhan i ro di saleleng ni lelengna. Sai burju ma ho rasirasa mate, dung i lehononKu ma tu ho tumpal hangoluan. ( 1 Petr. 1, 23a, 24a; Pangungkapon 2,10b ).

B. Tangiang panopotion di dosa

1.         Ale Amanami jala Debatanami na di banua ginjang. Parasiroha na sumurung mida hami ! Huparhatutu jala hutopoti hami do dosa dohot pangalaosionnami na godang i di joloM. Tatap hami marhitehite asi ni rohaM, jala sesa ma dosanami saluhutna, ala ni panghophop ni Anak haholongan ni rohaM, Tuhan Jesus Kristus, Sipangolu hami. Amen.

*

2.         Ale Amanami jala Debatanami, na di banua ginjang, Pargogo na so hatudosan ! Pardengganbasa do Ho, jala ro di salelenglelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami; ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami, di hataM, Ale Tuhan Jahowa, sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata hatuaonnami, palua hami, jala sesa dosanami, ala ni AnakMu, Tuhan Jesus Kristus, Tuhannami. Amen.

*

3.         Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia ! Na ro do hami tu joloM manopoti dosanami, angka na huula hami marhite sian pangalaosionnami di PatikMu, i ma marhite sian tubutubu ni rohanami na roa i, nang sian pangkataionnami na so ture, ro di pangoloionnami di hisaphisap ni rohanami. Na tama situtu do hona uhum hami ala ni dosanami i, alai na tarsolsolbagi do hami nuaeng ala ni i. Asi ma rohaM di hami, ale Debatanami. Pardengganbasa jala Parasi roha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu, Tuhan Jesus Kristus, Tuhannami. Amen.

*

4.         Ale Tuhan Debata, Amanami, Pargogo na so hatudosan, Parasiroha mida hami na dangol on ! Na ro do hami tu joloM manopoti dosanami na godang i. Di bagasan hajahaton do hami tubu jala ndang adong haporseaon di bagasan rohanami hian, saluhut do hami manimbil sian angka dalanMu. Mansai godang do pangalaosionnami di PatikMu. Alai ingot ma hami, ale Tuhan, ala ni denggan ni basaM dohot asi ni rohaM. Sai unang paingotingot angka dosa ni haposoonnami dohot pangalaosionnami; sai ingot ma hami hombar tu asi ni rohaM dohot denggan ni basaM ala ni GoarMu. Ale Tuhan Jesus, marpamuati ma rohaM di dosanami na godang i ! Amen.

*

5.         Ale Tuhan Debata, Amanami na di banua ginjang ! Ho do na patupahon hasesaan ni dosa di hami halak na dangol on marhitehite Anak haholongan ni rohaM. Sai asi ma rohaM di hami, angka na mangarsakhon dosanami. Sai sahapi ma tu bagasan rohanami hasesaan ni dosanami i. Lehon ma tu hami TondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibi on, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami. Amen.

*

6.         Ale Debatanami, na marasiroha jala na badia, Amanami, marhitehite Tuhan Jesus Kristus ! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa. Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalanMu na badia songon birubiru na lilu. Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubson ni rohana do lomo ni rohaM, asa mangolu. Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di GoarMu na badia i. Amen.

*

7.         Ale Tuhan Debata, Pargogo na so hatudosan jala Amanami ! Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami ! Asi rohaM di hami, sai patongtong ma di hami roha hamauliateon tu Ho. O Tondi Parbadia, pangapul di na marsak roha, pamalum ma saluhut na bernit, binahen ni dosanami ! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak dohot Tondi Parbadia ! Amen.

*

8.         Ale Tuhan Debata, Amanami, Parasiroha na sumurung ! Na pungu do hami di joloM martangiang tu Ho; ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, Sipangolu hami. Amen.

*

9.         Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami ! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala n i Tuhan Jesus Kristus. Anak haholongan ni RohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on! Amen.

*

10.      Ale Tuhan Debata, Pargogo na so hatudosan jala Ama Parasiroha ! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen hupangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhannami. Amen.

*

11.      Ale Tuhan Debata, na badia jala na bonar. Parasi jala Partalup ni Roha jala na basar do Ho ! Sai marpangulahi ma rohaM mida hami. Dibahen i sai sesa ma sude dosanami ! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami angka na hinophop ni Tuhan Jesus Kristus, Tuhannami. Amen.

*

C. Angka bagabaga, dung salpu tangiang manopoti dosa

1.         Munsat pe angka dolok, jala humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho. (Jes. 54, 10). Hasangapon ma di Debata na di ginjang !

2.         Songon sintongna mangolu Ahu, ninna Tuhan Jahowa, tung na so lomo do rohangKu mida hamatean ni parjahat, na lomo do rohangKu mida hamumulak ni parjahat i, tumadingkon dalanna, asa mangolu ibana. (Hes. 33, 11). Hasangapon ma di Debata na di ginjang !

3.         Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jela ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. ( Psalm 103, 8,10,13 ). Hasangapon ma di Debata na di ginjang !

4.         Songon on do panghaholongi ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana. (Joh. 3, 16). Hasangapon ma di Debata na di ginjang !

5.         Songon on do Hata ni Tuhan Jesus: Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangKu jala neang do dohot na hupaporsanhon. ( Mat. 11, 28-30 ). Hasangapon ma di Debata na di ginjang !

6.         Songon on do Hata ni Tuhan Jahowa: Nunga diarsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirionKu, jala ndang be hupaingotingot angka dosam. ( Jes. 43, 24b, 25 ). Hasangapon ma di Debata na di ginjang !

7.         Ro ma hamu tu Ahu, asa mangolu tondimuna, ninna Tuhan Jahowa. Tung sura rara dosamuna songon abit bunga dapdap, bontar do bahenonHu songon itak; nang pe rara songon abit hasumba, gabe songon hapas do muse. (Jes. 1,18). Hasangapon ma di Debata na di ginjang !

8.         Songon on do Hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do Sipalua ho. (Jes. 44, 22). Hasangapon ma di Debata na di ginjang !

9.         Satongkin do hutadingkon ho, alai papungupunguonHu ma ho muse marhitehite angka asi ni roha godang ! Tagan di parpiar ni murukHu hutabunihon bohingKu satongkin maradophon ho, alai marhitehite denggan basa salelenglelengna asianHu ho, ninna Jahowa Sipalua ho. (Jes. 54, 7. 8). Hasangapon ma di Debata na di ginjang !

10.      Songon on do Hata ni Jahowa: Unang ho mabiar, ai Ahu do Siluluhon ho; nunga pola hujou goarmu, Ahu nampuna ho. (Jes. 43, 1). Hasangapon ma di Debata na di ginjang !

11.      Ala ni pangalaosionta do umbahen na tartullang Kristus, jala binahen ni hajahatonta do Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malum itahilala. (Jes. 53, 5). Hasangapon ma di Debata na di ginjang !

12.      Ise be mangaluhon angka na pinillit ni Debata ? Debata do na mamintori. Ise do na mandabu uhum hamagoan ? Kristus Jesus do naung mate; alai ndada holan i, naung mulak mangolu do, jala di siamun ni Debata do Ibana mangondihon hita. (Rom 8, 33. 34). Hasangapon ma di Debata na di ginjang !

13.      Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa diitangianghonnasida. (Heb. 8,1; 7, 25). Hasangapon ma di Debata na di ginjang !

14.      Ai ndang adong imbar ni i; ai saluhut do pardosa jala hurangan maradophon hasangapon ni Debata, alai angka na gabe pintor, binahen ni basabasa marhite sian asi ni RohaNa, hinorhon ni panobusion na marhitehite Kristus Jesus i, na pinajongjong ni Debata bahen habangsa parasian marhitehite haporseaon di mudarNa. (Rom 3, 23, 24, 25a). Hasangapon ma di Debata na di ginjang !

15.      Humophop hita, gabe dosa do Ibana na so tumanda dosa dibahen Debata, asa gabe hatigoran ni Debata hita, marhitehite Ibana. ( 2 Kor. 5, 21 ). Hasangapon ma di Debata na di ginjang !

16.      Molo tung adong manang ise na mardosa, adong do pangondianta di Ama i, i ma Tuhan Jesus Kristus na tigor roha i. Jala Ibana do pardengganan taringot tu dosanta, alai ndada holan taringot tu dosanta, dohot do taringot tu dosa ni saluhut portibi on. ( 1 Joh. 2, lb, 2 ). Hasangapon ma di Debata na di ginjang !

C.                Angka tangiang laho mamungka di angka ari pesta

I. ADVENTUS

1.         Ale Tuhan Debata, Pargogo na so hatudosan, na tumompa langit dohot tano, hinorhon ni asi ni rohaM do umbahen sahat hami tu taon Huria na imbaru on. Lehon ma tu HuriaM TondiM na badia i dohot hamaloon sian Ho, asa lam rarat jala ganda harajaonMu di tongatonga ni hami on. Sai lehon ma hiras ni roha tu naposoM mangkatahon HataM, asa lam denggan HuriaM marhite sian i. Pargogoi ma hami mangoloi Ho di bagasan haporseaon na tongtong, asa manahan hami sahat ro di ujungna marhitehite AnakMu Jesus Kristus Tuhannami. Amen.

2.         Ale Amanami na di banua ginjang ! Na mandok mauliate do hami tu Ho, ala dipabotohon Ho tu hami marhitehite AnakMu Tuhan Jesus Kristus, na laho salpu sogot langit dohot tano, alai na hot do anggo HataM ro di salelenglelengna. Angkup ni i, ingkon patar do sogot saluhut jolma di jolo ni habangsa paruhumanMi.

Sai asi ma rohaM di hami, pahot ma rohanami marhaporseaon di HataM marhitehite Tondi Parbadia. Padungo ma hami jala paringgas hami martangiang, asa marlas ni roha hami paimaimahon Ho, jala asa dapot hami hangoluan na so ra suda. Amen.

3.         Ale Tuhan Debata, ajarhon ma tu hami aturanMu; unang tadinghon hami' Patonggor ma matanami, asa hutanda hami hatuaonnami na sian Ho i; pargogoi hami marhitehite HataM. Padao ma sian hami nasa poda na lipe, sai togihon ma hami di angka dalanMu, asa hutanda hami Ho hangoluannami manang mangolu manang mate pe hami, marhitehite Tuhannami Jesus Kristus, AnakMi. Amen.

*

4.         Ale Amanami jala Debatanami ! Na mandok mauliate do hami tu Ho sian nasa rohanami, ala disuru Ho AnakMu, Tuhan Jesus Kristus, na paluahon hami sian dosa dohot hamatean. Hupangido hami, sai patiur jala rajai ma rohanami marhitehite Tondi Parbadia i, asa unang hu rohanami mida hametmetonNa i. Urupi hami, asa lam hutanda hami Ibana Raja naung ro i, sisombaon ni sandok jolma na di liat portibi on. Amen.

II. PESTA HATUTUBU NI TUHAN JESUS.

5.         Ale Tuhan Debata, Amanami na di banua ginjang ! Mandok mauliate do hami tu Ho, ala ni godang ni asi dohot holong ni rohaM di hami; ai dibasabasahon Ho do AnakMu na sasada i tu hami na di pardangolan on, asa malua hami marhitehite Ibana sian dosa dohot sian hamatean saleleng ni lelengna. Hupangido hami tu Ho, sai sondangi ma rohanami na holom i marhitehite Tondi Parbadia i; angkup ni i sai parrohai ma hami, asa huboto hami mandok mauliate tu Ho, asa tarapul situtu rohanami di hagogotan dohot di pangunjunan marhitehite AnakMu, Tuhan Jesus Kristus Tuhannami. Amen.

*

6.         Ale Tuhan Debata, Amanami na di banua ginjang ! Marroha Ama do Ho tu hami halak pardosa na dangol on; ala ni i dilehon Ho do AnakMu na sasada i, Tuhan Jesus Kristus, asa porsea hami jala dapotan hangoluan marhite sian Ibana. Na mangido ma hami nuaeng tu Ho, suru ma TondiM na badia i tu rohanami, asa manahan hami sahat ro di ujungna di bagasan haporseaon na sintong jala asa martua hami marhitehite AnakMu Tuhan Jesus Kristus, Tuhannami. Amen.

*

7.         Ale Debata, Ama na di banua ginjang ! Pujipujian, hasangapon dohot hamauliateon husombahon hami tu Ho, marningot silehonlehonMi na balga i tu hami jolma na di pardangolan on, i ma AnakMu, Jesus Kristus, na sinuruM i sian banua ginjang ala ni hami. Gabe na dangol do Ibana jala na pogos, pola tubu Ibana di bara ni Betlehem, asa mamora hami. Sai rajai jala togutogu hami marhitehite TondiM, asa lam huida hami godang ni holong ni rohaM na pinapatar ni AnakMi. Amen.

*

8.         Ale Amanami, Ama ni Jesus Kristus Tuhannami, na tubu di huta Betlehem! Sai pinuji ma GoarMu na badia i, ala naung ditingkir Ho hami bangsoM. Ditogutogu Ho do hami sian haholomon tu hatiuron jala dipadomu Ho do hami, na holang hian sian Ho, gabe saor muse dohot Ho. Gok halalas ni roha do hami ala ni i. Sai jalo ma hamauliateon ni rohanami, naung tinopotMu marhitehite AnakMi. Amen.

III.  TAON NA INBARU OOHOT ARI MINGGU NA MANGIHUT TUSI

9.         Ale Tuhan Debata ! Sian asi ni rohaM do umbahen sahat hami tu taon na imbaru on; Ho do na mangaramoti hami di bagasan taon na salpu i. Sai asi ma rohaM, sai unang tulak hami nuaeng, sai dongani ma hami di bagasan taon na imbaru on.

Pasupasu hami ro di angka ulaon na denggan, na huula hami marhitehite GoarMu. Alai na gumodang, pasupasuhon ma HataM na badia i tu rohanami, asa gabe na imbaru rohanami, asa tarpamasuk Ho hami tu banua ginjang di hasusuda ni bohalnami. Amen.

10.      Ale Amanami na di banua ginjang ! Dibahen Ho do Anak haholongan ni rohaM tu toru ni patik, asa dipalua angka na ginomgoman ni Patik. Urupi hami, asa dohot hami dapotan haluaon i, jala asa mian hami di bagasan harajaonMu marhitehite AnakMu Tuhan Jesus Kristus, Tuhannami. Amen.

IV. EPIPHANIAS

11.      Ale Tuhan Debata, Ama na marasiroha ! Hudok hami mauliate tu Ho, sian nasa rohanami, ala dijou Ho hami sian haholomon tu hatiuron, marhitehite AnakMu Tuhan Jesus Kristus. Sai dirajai TondiM na badia i ma hami asa lam ganda haporsesonnami, jala asa lam badia parangenami, unang marlindang binahen ni portibi on, asa sahat hami rap dohot angka na porsea di GoarMu tu hangoluan na so ra suda, marhitehite Anak haholongan ni rohaM, Tuhan Jesus Kristus, Tuhannami. Amen.

*

12.      Ale Tuhan Debata, Pargogo na so hatudosan, Amanami na di banua ginjang! Dipabotohon Ho do tu angka parroha na sian purba i marhitehite bintang, naung tubu AnakMu na sasada i. Sondangi ma rohanami, asa hutanda hami haporseaon na sintong i marhitehite Ibana, asa tarbahen dahot hami mamereng hamuliaon sogot marhitehite Anak haholongan ni rohaM, Tuhan Jesus Kristus, Tuhannami. Amen.

*

13.      Ale Tuhan Debata, Amanami na di banua ginjang ! Dipapatar Ho do diriM marhitehite HataM i, naung dohot do hami dihalomohon rohaM marhite sian panesaM i, di dosanami. Antong papatar ma diriM tu rohanami, asa hutanda hami Ho, jala asa hutangihon hami soara ni AnakMu, jala asa hujalo hami Tondi Parbadia marhitehite Anak haholongan ni rohaM, Tuhan Jesus Kristus, Tuhannami. Amen.

*

14.      Ale Tuhan Debata, Pargogo na so hatudosan ! Na mandok mauliate do hami tu Ho, ala dipapatar Ho dohot tu angka sipelebegu AnakMu Tuhan Jesus Kristus. Sai asi rohaM, sai paian ma di hami ro di pinomparnami Barita na Uli i, jala pararat ma i tu saluhut bangso, asa binsar sondang ni hasangaponMi dohot di angka na hundul di haholomon dohot na nilinggoman ni hamatean marhitehite Anak haholongan ni rohaM, Tuhan Jesus Kristus, Tuhannami. Amen.

*

15.      Ale Tuhan Jesus Kristus, Ho do panondang na sintong, na manondangi ganup jolma na di portibi on ! Sondangkon ma bohiM tu hami jala parbadiai ma rohanami, asa hutanda hami dalan hangoluan marhite sian i. Sai rajai ma hami, asa unang manimbil hami sian dalan na sintong i. Ale Tuhan Jahowa, patongtong ma rohanami marhaporseson tu Ho marhitehite Tondi Parbadia ! Amen.

V. TINGKI PANAONON NI TUHAN JESUS

16.      Ale Tuhan Debata, Amanami na di banua ginjang ! Asi ma rohaM di hami halak na gale on. Diida Ho, na gogo do musunami, sai talu do hami dibahen ala ni hagaleonnami. Dibahen i hupangido hami tu Ho : Sai pargogoi jala pamonang ma hami maralohon musu i marhitehite panaonon ni Anak haholongan ni rohaM, Tuhan Jesus Kristus. Amen.

*

17.      Ale Amanami na di banua ginjang ! Disuru Ho AnakMu Tuhan Jesus Kristus tu portibi on, asa disegai angka ulaon ni sibolis i. Sai padungo ma hami marhitehite TondiM na badia i, asa unang tarpedem hami di bagasan dosa, alai asa monang hami sahat ro di ujung, jala asa mardame hami saleleng di tano on, paima sahat hami tu hangoluan na so ra suda marhitehite AnakMu, Tuhan Jesus Kristus, Tuhannami. Amen.

*

18.      Ale Tuhan Debata, Ama ni saluhut parasirohaon ! Nunga ditatap Ho hami bangsoM on, ai ndang manjua Ho mangalehon AnakMu na sasada i, Tuhan Jesus Kristus tu tangan ni pardosa, asa taononNa haleaon dohot siak ni bagi sahat ro di hau na pinarsilang. Sai tumpahi hami marhitehite asi ni rohaM, asa margogo hami jala marbenget ni roha songon anak haholongan ni rohaM i di angka sitaonon, asa marsangap GoarMu dohot AnakMu, Tuhan Jesus Kristus, dohot Tondi Parbadia marhitehite hami. Amen.

*

19.      Ale Amanami Parasi roha na sumurung, Debata ni hatuaonnami ! Huingot hami do di angka ari on panaonon dohot hamamate ni Tuhan Jesus Kristus, Tuhannami. Pahibul ma rohanami jala parbadiai mamingkiri sude na tinaonNa i. Patandahon ma tu hami dosanami, asa diarsakhon rohanami, asa hupompomi hami hisaphisap dohot sangkapsangkap ni rohanami, jala asa hupasaut hami lomo ni roha ni na manobus hami, asa martua hami marhite sian i ro di salelenglelengna. Sai patupa ma i di hami marhitehite Tuhan Jesus Kristus, Anak haholongan ni rohaM. Amen.

*

20.      Ale Tuhan Debata, Amanami na di banua ginjang, Parasi roha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan, na pinelehonNa i humophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.

*

21.      Ale Amanami na di banua ginjang, Parasiroha na sumurung di sude jolma! Ndang diolani Ho AnakMu na sasada i, dilehon Ho do Ibana humophop hami mamorsan dosanami sahat tu hau na pinarsilang i. Sai patogu ma rohanami, asa unang ganggu rohanami manghaporseai hasesasn ni dosanami, asa unang mandele hami ala ni dosanami, alai asa pos situtu rohanami di asi ni rohaM na godang i marhitehite Tuhan Jesus Kristus Tuhannami, Anak haholongan ni rohaM i. Amen.

22.      Ale Tuhan Jesus, Sasada Ho do Sipangolu padomuhon jolma dohot Debata! Hupuji hami GoarMi, jala hudok hami mauliate tu Ho ala ni saluhut na binahenMi, patupahon hangoluannami. Sai dongani ma hami marhitehite asi ni rohaM, asa hupingkiri hami tongtong na tinaonMu dohot hamamateM, asa huarsakhon hami dosanami jala asa tubu di hami haporseaon na sintong, jala asa marroha haholongon hami huhut mandok mauliate tu Ho, asa olo hami mangihuthon Ho ro di hamatean. Ale Tuhan Jesus, di Ho ma tama pujipujian di tongatonga ni saluhut Huria, naung tinobusMu marhitehite mudarMu na badia i, olat ni on ro di salelenglelengna. Amen.

VI. ARI HAMAMATE NI TUHAN JESUS

23.      Ale Amanami jala Debatanami ! Parasiroha na sumurung do Ho di sude jolma manisia. Nunga dilehon Ho AnakMu, Tuhan Jesus Kristus Tuhannami, manaon haleaon dohot siak ni bagi, pola mate tarsilang, asa malua hami sian gomgoman ni sibolis. Sai parrohai ma hami mamingkiri panaonon ni AnakMu, asa maruli hami marhite sian i di hasesaan ni dosa dohot di haluaon sian hamatean paduahalihon, asa dapot hami hangoluan salelenglelengna marhitehite Tuhan Jesus Kristus Tuhannami, Anak haholongan ni rohaM. Amen.

*

24.      Ale Tuhan Jesus, na mate tarsilang do Ho humophop hami halak pardosa, ala ni holong ni rohaM na godang i di hami ! Ajari ma hami paingotingot Ho, na targantung di hau na pinarsilang humophop hami, ai Ho do haporusannami maradophon rimas ni Debata dohot panoruion ni Patik dohot panolsolion ni roha. Sai sesa jala urati ma dosa sian rohanami marhitehite TondiM na badia i, jala pargogoi ma hami maralohon roha sibuk dohot hisaphisap dohot sangkap sangkap ni rohanami laho mangihuthon Ho, na mangolu jala na manggomgomi rap dohot Ama i dohot Tondi Parbadia ro di saleleng ni lelengna. Amen.

*

25.      O Tuhan Jesus, Birubiru ni Debata, na mamorsan dosanami ! Na jongjong do hami di joloM, marningot Ho, na targantung i. Tangkas do huantusi hami habebernit ni na tinaonMu di dolok Golgatha. Tungki do hami marningot dosanami na mangkorhon hamamateM i. Asi ma rohaM, urupi ma hami, asa gabe upa ni halojaonMu hami. Amen.

VII. PESTA DOHOT TINGKI HAHEHEON

26.      Ale Tuhan Jesus, Tuhannami ! Na mandok mauliate do hami tu Ho, ala ditaluhon Ho do dosa dohot hamatean marhitehite hamamateM i, ala disondangi Ho tanomannami, asa marpangkirimon na mangolu hami ala ni haheheonMi. Ndang pola be mabiar hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho di bagasan haporseson na mangolu, paima sahat hami tu lambungMu. Amen.

27.      Ale Tuhan Debata ! Suru ma Tondi Parbadia tu rohanami, asa tarapul situtu rohanami marhitehite haheheon ni AnakMu, Tuhan Jesus Kristus, jala asa lam ganda haporseaonnami marhitehite pangkirimon na mangolu, asa tongtong huingot hami, na hehe do hami muse sian na mate songon Tuhan Jesus Kristus, Tuhannami, naung hehe sian na mate i. Amen.

*

28.      Ale Tuhan Debata, Parasiroha na sumurung ! Didok HataM do, ingkon manaon hami jala mate rap dohot Tuhan Jesus Kristus, asa rap hami dohot Ibana tu hasangapon. Sai parrohai ma hami, asa unduk hami tu lomo ni rohaM jala hot hami di haporseaon na ture asa tongtong mangkirim di haheheon dohot di hasangapon sogot silehononMu tu angka na porsea di Ho. Amen.

VIII. ROGATE

29.      Ale Tuhan Debata, Pargogo na so hatudosan ! Holan ala ni asi ni rohaM sambing do, umbahen na tarbahen hami marpungu di joloM, marsada ni roha martangiang tu Ho. Diparbagabaga Ho do di bagasan HataM: Molo adong dua manang tolu halak marpungu marhitehite GoarMu, lehononMu do na pinangidonasida. Ale Tuhan pasaut ma bagabagaM i, tangihon ma pangidoannami, lehon ma na tau hangoluannami. Lehon ma di hami saleleng di hasiangan on parbinotoan di hasintonganMi, dohot di hangoluan salelenglelengna marhitehite AnakMu, Tuhan Jesus Kristus, Tuhar,nami. Amen.

IX. HANANAEK NI TUHAN JESUS

30.      Ale Tuhan Debata, Pargogo na so hatudosan ! Sai pargogoi ma hami manghaporseai AnakMu na sasada i, Sipangolu hami, na manaek tu surgo, asa huparrohahon hami roha banua ginjang marhitehite Anak haholongan ni rohaM, Tuhan Jesus Kristus, Tuhannami. Amen.

*

31.      Ale Tuhan Jesus Kristus, Anak ni Natumimbul i, naung manaek tu banua ginjang jala hundul tu siamun ni Debata ! Sai suru ma Tondi Parbadia tu rohanami, asa Ibana tongtong mangajari rohanami. Lehon tu hami parhalado na burju tu HataM, pargogoi ma nasida, asa tongtong diradoti nasida ulaonna jala asa marsahala nasida mangalo bisuk ni sibolis i, asa tung rarat harajaonMu di hasiangan on, paima sude musuM peak di toru ni patMu. Sai pamonang ma hami saluhutna manaluhon dosa dohot hamatean marhitehite Ho, ai Ho do na mangolu dohot na manggomgomi rap dohot Ama i dohot Tondi Parbadia. Amen.

X. EXAUDI

32.      Ale Tuhan Debata, Pargogo na so hatudosan, Amanami na di banua ginjang i ! Usehon ma TondiM na badia i dohot hapistaran na sian Ho i tu saluhut HuriaM, asa lam rarat jala lam hot HataM na badia i di tongatonga ni hami on. Lehon ma hiras ni roha di naposoM manjamitahon HataM, asa lam pita jala lam ganda HuriaM na badia i. Patongtong ma huhut rohanami mangoloi Ho sahat ro di ujung di bagasan haporseaon na ture marhitehite AnakMu, Tuhan Jesus Kristus, Tuhannami. Amen.

XI. PENTAKOSTE

33.      Ale Tuhan Debata, Amanami ! Ho do manondangi jala mangajari roha ni angka na porsea di HataM marhitehite Tondi Parbadia. Sai buhai ma rohanami asa ture parrohaonnami marhitehite TondiM i, asa tongtong gok dame rohanami manghalashon hagogoonNa i marhitehite Tuhan Jesus Kristus Tuhannami. Amen.

*

34.      Ale Tuhan Jesus ! Hudok hami mauliate tu Ho sian nasa rohanami, ala dipaojak Ho HuriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannsmi, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, ne tarpuji ro di saleleng ni lelengna. Amen.

XII. TRINlTATIS

35.      Ale Debata Sitolu sada, Debata Ama, Anak dohot Tondi Parbadia ! Na mandok mauliate ma hami tu Ho, ala ditompa, dipalua jala diparbadiai Ho hami hinorhon ni asi dohot holong ni rohaM na godang i. Sai ramoti ma hami di bagasan parmaraan dohot pangunjunan, apuli hami uju marsak, pahehe hami uju tinggang jala togutogu hami di hasusuda ni bohaluami tu harajaonMu na di banua ginjang i, asa disi pujionnami Ho marhitehite roha dohot hata na imbaru. Amen.

XII. DUNG TRINITATIS

36.      Ale Tuhan Debata Amanami ! Nunga marpungu hami dison di ari na pinarbadiaanMi. Sai buhai ma pinggol dohot rohanami, asa marlas ni roha hami manangihon hataM na badia i jala ringgas hami manimbangi dohot umpeop HataM di bagasan rohanami, asa pos rohanami martangiang tu Ho. Urupi ma hami, asa huparhaseang hami angka ariari ni ngolunami na pondok i. Sai pamasuk ma hami tu hangoluan saleleng ni lelengna. Pujionnami ma Ho disi marhitehite Tuhan Jesus Kristus Tuhannami. Amen.

*

37.      Ale Tuhan Debata jala Amanami ! Sai urupi ma hami, asa unang mandele hami, uju ro hapogoson tu hami, jala asa unang magopo hubahen hami silehonlehonMu na denggan i, uju ro pasupasuM tu hami. Ramoti hami, asa unang marpos ni roha hami tu arta na di hasiangan on. Lehon di hami haporseaon asa dohot hami parjambar di siteanon ni angka na porsea di Ho marhitehite Tuhan Jesus Kristus, Tuhannami. Amen.

*

38.      Ale Tuhan Debata, Pargogo na so hatudosan ! Sai lehon jala patubu ma di hami haporseaon na sintong. Tambai ma haporseaonnami ganup ari, asa lam togu. Lehon ma di hami holong ni roha na so marpangansi asa holong rohanami di Ho dohot di dongannami jolma. Lehon di hami pangkirimon na mangolu, asa rnarlas ni roha hami mambahen lomo ni rohaM i. Sai oloi ma pangidoannami ala ni AnakMu, Tuhan Jesus Kristus Tuhannami. Amen.

*

39.      Ale Tuhan Debata, Pargogo na so hatudosan, na so marmula na so marujung! Diparbaga Ho do marhitehite AnakMu, Tuhan Jesus Kristus: LehononMu hasesaan ni dosa, hatigoran dohot hangoluan saleleng ni lelengna di hami. Asi ma rohaM, lehon ma i di hami.

Sai sungguli jala togutogu rohanami marhitehite TondiM, asa hulului hami pangurupion sian Ho, molo ro pangunjunan tu hami. Sai pahot ma rohanami, asa tung porsea hami di HataM dahot di bagabagaM, asa jumpang hami hasonangan saleleng ni lelengna marhitehite AnakMu, Tuhan Jesus Kristus, Tuhannami. Amen.

*

40.      Ale Tuhan Debata, Parasiroha na sumurung ! Mauliate ma rohanami tu Ho, ala dijou Ho hami tu pangkirimon di hangoluan saleleng ni lelengna. Sai lehon ma TondiM tu rohanami, asa margogo hami mangalo hisaphisap ni rohanami jala asa hulului hami, angka na di banua ginjang i. Pargogoi ma hami manaluhon saluhut na naeng mangambat hami tu hasonangan. Sai paganda haporseaon, pangkirimon dohot pamompomon ni rohanami, asa monang hami ro di ujungna, laho manjalo tumpal i hami di joloM ala ni AnakMu, Tuhan Jesus Sipangolu i. Amen.

*

41.      Ale Tuhan Debata, Amanami na di banua ginjang ! Sai lehon ma tu hami roha na togu, na badia, pingkiran na denggan dohot roha na ringgas pasauthon ulaon na denggan. Sai lehon dame tu hami asa sonang hami mangolu di bagasan pangondingiM, Sai marsigantung tu HataM ma hami maradophon saluhut musunami. Sai ramoti jala pargogoi ma hami marhitehite Tuhan Jesus Kristus Tuhannami. Amen.

*

42.      Ale Tuhan Debata, Amanami na di banua ginjang ! Hupangido hami tu Ho, sai lehon ma tu hami Tondi ni hasintongan dohot dame, asa tangkas huboto hami nasa lomo ni rohaM, jala urupi ma hami mangulahon i sian nasa gogonami marhitehite AnakMu, Tuhan Jesus Kristus Tuhannami. Amen.

*

43.      Ale Tuhan Debata jula Amanami ! Sai togutogu jala rajai ma rohanami marhitehite TondiM i, asa olo hami manangihon dohot manjulo HataM. Sai pahot ma HataM di bagasan rohanami, asa lam imbaru jala lam badia rohanami. Sai urupi ma, asa lam marhaposan hami tu AnakMu, Tuhan Jesus Kristus, asa jumpang hami hangoluan saleleng ni lelengna. Amen.

*

44.      Ale Tuhan Debata, Amanami Parasiroha na sumurung ! Sai togihon ma hami tu AnakMu, asa Ibana nampuna hami. Lehon ma di hami haporseaon na sintong, asa holan Ho sambing haposannami. Unang loas HuriaM marhaposan tu angka na di hasiangan on, ai holan Ho do haposan dohot haporusan. Sai asi ma rohaM, patuduhon tu hami dalan tu hatuaon, asa jumpang hami asi ni rohaM na godang i ala ni Tuhan Jesus Kristus, Tuhannami. Amen.

*

45.      Ale Tuhan Debata, Parasiroha jala na bonar ! Mauliate hudok hami, ala dipabinsar Ho tu hami Barita na Uli, na manondangi rohanami. Ai ala ni i umbahen hutanda hami Ho dohot lomo ni rohaM. Dipangido rohanami naeng mangulahon lomo ni rohaM hami saleleng di ngolu on, jala naeng martua hami bahenonMu. Sai parbadiai ma rohanami marhitehite TondiM, jala pargogoi ma hami mangorom hisaphisap dohot manggotaphon roha portibi on. Sai palas ma rohanami mangoloi Ho ala ni AnakMu, Tuhan Jesus Kristus, Tuhannami. Amen.

*

46.      Ale Tuhan Debata, Pargogo na so hatudosan jala Parasiroha na sumurung! Dipangido rohaM, naeng mangolu jala martua hami sogot; nunga ragam dalanna dibahen Ho manungguli rohanami, asa hutanda hami hatuaon sogot. Dibahen i hupaserep hami ma nuaeng rohanami mangido sian Ho: Sai lehon ma TondiM na badia i tu hami, asa porsea hami di holong ni rohaM di hami. Sai hutangihon hami ma soaraM, na mangapoi hami di tingki parasirohaon nuaeng, asa sampang hami tu hangoluan, na pinaradeM i di hami marhitehite Tuhan Jesus Kristus, Tuhannami. Amen.

*

47.      Ale Tuhan Debata, Pargogo na so hatudosan, na songkal jala na bonar ! Dialo Ho do na ginjang marroha, jala dipatimbo Ho do na serep marroha. Ala ni i hupangido hami tu Ho: Sai ramoti hami, asa unang jungkat hami, unang ginjang rohanami. Alai togutogu hami marhitehite TondiM, asa unduk, serep, tobok jala burju rohanami di adopan ni halak saluhut, ala ni AnakMu, Tuhan Jesus Kristus, Tuhannami. Amen.

*

48.      Ale Tuhan Debata, Pargogo na so hatudosan, Amanami na di banua ginjang! Mauliate ma rohanami tu Ho, ala dilehon Ho AnakMu na sasada i tu hami jala dipalua Ho hami sian gomgoman ni sibolis. Hupangido hami tu Ho: Sai ramoti hami di bagasan HataM, asa margogo hami, jumpa masa hasusaan dahot hagogotan. Sai sesa ma dosanami dohot pangalaosionnami di HataM na badia i. Sai parbadiai ma rohanami marhitehite TondiM, jala pamasuk hami tu hangoluan sogot, asa pujionnami Ho disi ro di saleleng ni lelengna, marhitehite Tuhan Jesus Kristus Tuhannami. Amen.

*

49.      Ale Tuhan Debata, Pargogo na so hatudosan jala Parasiroha ! Hupaserep hami rohanami di joloM jala hupangido hami tu Ho: Sai lehon asi ni rohaM manggohi rohanami, jala sondangi rohanami marhitehite TondiM, asa lam hutinggalhon hami nasa dosanami, jala hutangihon hami HataM na badia i. Sai paian ma HataM di bagasan rohanami, asa marparbue na denggan hami. Hupangido hami saluhutna i marhitehite Tuhan Jesus Kristus Tuhannami. Amen.

*

50.      Ale Tuhan Debata, Amanami na di banua ginjang ! Hupangido hami tu Ho: Sai lehon ma TondiM na badia i tu bagasan rohanami. Sai paian di bagasan hami asi ni rohaM dohot hatigoran, na pinatupa ni AnakMu Jesus, Tuhannami. Sai ramoti hami di hamamasa ni pangunjunan. Pargogoi ma hami mangulahon lomo ni rohaM, asa lam marlas ni roha hami mida denggan ni pambahenanMu di hami, marhitehite Tuhan Jesus Kristus, Tuhannami. Amen.

*

51.      Ale Tuhan Debata ! Asi ma rohaM di hami, ai ndang tarbahen hami mambahen manang aha, molo so Ho dongannami. Dibahen i sai lehon ma di hami roha banua ginjang, asa tau hami manimbangi dohot. mangulahon lomo ni rohaM. Sai dongani ma hami, asa mian hami di bagasan Ho dohot di bagasan HataM, marhitehite AnakMu, Tuhan Jesus Kristus, Tuhannami. Amen.

*

52.      Ale Tuhan Debata, Pargogo na so hatudosan ! Ho do silehon apulapul tu angka na marsak roha. Ho do silehon gogo tu angka na gale. Asi ma rohaM ! Tatap ma angka na marsak roha dohot angka na hona pangunjunan. Sai tatap ma hoihoinasida, jala palua nasida sian hagogotan i, asa patar diida nasida: Ho do pangurupi, haporusan dohot pangaramoti di hagogotan marhitehite Tuhan Jesus Kristus, Tuhannami. Amen.

*

53.      Ale Tuhan Debata ! Ho do haroroan ni dame dohot holong ni roha. Sai lehon jala pahot ma di hami roha sisongon i. Ramoti ma angka naposoM maradophon pangasungi ni sibolis, asa malua nasida sian pangunjunan dohot sian biar ni roha. Ho do tongtong haposan dohot partanobatoannami. Sai togu ma hami di dalan sidalanannami ala ni AnakMu, Tuhan Jesus Kristus, Tuhannami. Amen.

*

54.      Ale Tuhan Debata, Pargogo na so hatudosan ! Sai lehon ma di hami haporseaon na mangolu, asa tongtong hami porsea di AnakMu, Tuhan Jesus Kristus, Tuhannami. Tompa ma roha na ias di bagasan hami, jala paimbaru rohanami jala pasintong. Sai pahot ma haporseaonnami, asa hot jala sonang rohanami marningot naung sesa dosanami, ala ni Tuhan Jesus Kristus Tuhannami. Amen.

*

55.      Ale Tuhan Debata, Pargogo na so hatudosan ! Na badia do Ho, pardosa do ianggo hami. Alai diondingi Ho do angka na marhaposan jala na maporus tu Ho. Ala ni i ro hami tu Ho, mangasahon asi ni rohaM. Sai unang tulak hami sian joloM. Angkup ni i lehon di hami roha na girgir tumangihon HataM, asa huboto hami mangulahon lomo ni rohaM, ala ni AnakMu, Tuhan Jesus Kristus, Tuhannami. Amen.

*

56.      Ale Tuhan Debata, Pargogo na so hatudosan jala Pardengganbasa ! Ro di saleleng ni lelengna do asi ni rohaM. Mauliate ma rohanami tu Ho, ala diramoti Ho hami sian nasailaon sahat ro di sadari on. Hupuji hami ma Ho, ala naung sahat tu hami Barita na Uli na sian AnakMu, Tuhan Jesus Kristus, na pangolu hami. Mauliate hudok hami tu Ho, ala di bagasan dame dohot hasonangan dilehon Ho HataM na badia i. Sai asi ma rohaM, urupi ma hami mangulahon na nidokMu, asa hot rohanami jala tarparangehon hami parange na badia. Sai ajari jala paimbaru ma rohanami, asa lam ias hami ro di hasusuda ni bohalnami, marhitehite Tuhan Jesus Kristus Tuhannami. Amen.

*

57.      Ale Tuhan Debata, Pargogo na so hatudosan, Amanami saleleng ni lelengna! Asi ni rohaM do na mangaramoti hami sian nasailaon rasirasa nuaeng, jala asi ni rohaM do na mangalehon Barita na Uli i, gabe hangoluannami. Sai asi ma roham, sai buhai ma rohanami jala lehon TondiM na badia i, asa huantusi hami sude panogunoguM dohot pambahenMu na balga i. Paian ma HataM di bagasan rohanami, asa mardame jala sonang hami jala lam imbaru rohanami marhitehite AnakMu, Tuhan Jesus Kristus Tuhannami. Amen.

*

58.      Ale Tuhan Debata, Amanami, Pardengganbasa na sumurung ! Na marpungu do hami dison, mangido tu Ho sian nasa rohanami: Sai tambai ma haporseaonnami jala pargogoi hami, asa tarulahon hami parange na denggan, songon na pinangido ni rohaM sian hami. Sai ramoti hami ro di hasusuda ni bohalnami, ala ni AnakMu, Tuhan Jesus Kristus Tuhannami. Amen.

*

59.      Ale Tuhan Debata, na sangap jala na badia ! Diramoti jala digomgomi Ho do HuriaM marhitehite TondiM i. Dibahen i hupangido hami nuaeng tu Ho, lehon ma di hami roha pangoloion, asa marlas ni roha hami mangulahon na nidokMu songon pangoloi ni anak tu amana. Sai pararat ma harajaonMu jala sai tambai ganup ari bilangan ni angka na porsea di Ho, asa lam tarbarita GoarMu na badia i, jala dapotan hangoluan hami marhitehite Tuhan Jesus Kristus, Tuhannami. Amen.

*

60.      Ale Tuhan Debata, Parasiroha jala Pardengganbasa na sumurung ! Tama do nian hona uhumMu hami ala ni garis ni rohanami mida HataM. Alai sai sesa ma dosanami jala salpuhon sude pambahenannami na hurang i. Sai unang unsati asi ni rohaM sian hami. Sai tambai ma pasupasuM dohot gogo na sian banua ginjang tu HuriaM, asa hupuji hami Ho, dung malua hami sian pardangolan na di hasiangan on, ala ni Tuhan Jesus Kristus, Tuhannami. Amen.

XIV. DI MINGGU JUMPA MANJALO TOHONAN HAPANDITAON

61.      Ale Tuhan Debata, Amanami, Parasiroha na sumurung ! Hudok hami mauliate sian nasa rohanami tu Ho, ala godang ni silehonlehon ni TondiM tu hami HuriaM. Ho do na pajongjongkon tohonan hapanditaon di tano on manarihon HuriaM na badia i. Na marpungu do hami dison, naeng mangido tu Ho: Sai ramoti jala ajari ma sude naposoM, asa polin dibaritahon nasida Barita na Uli taringot tu AnakMu, Tuhan Jesus Kristus. Parbadiai sude naposoM, asa hasonggopan ni TondiM nasida, asa tarulahon hasida sude ulaon na nilehonMu tu nasida, jala asa lam rarat harajaonMu di tongatonganami marhitehite Tuhan Jesus Kristus, Tuhannami. Amen.

XV. TANGIANG JUMPA MASA PESTA HURIA

62.      Ale Tuhan Debata, Pargogo na so hatudosan ! Ho do Raja ni angka raja, jala Tuhan ni angka tuan; ro di saleleng ni lelengna do asi ni rohaM. Na marpungu do hami dison mangido sian Ho: Sai lehon ma dame tu hami dohot tu saluhut HuriaM. Sai pasada ma roha ni angka na porsea di Ho, asa lam masitungkolan jala masihaholongan nasida, songon na pinodahon ni AnakMu Tuhan Jesus Kristus tu hami. Patongtong ma rohanami mangoloi Ho, asa lam marsangap GoarMu di tongatonganami, jela dapotan hangoluan hami, ala ni Tuhan Jesus Kristus, Tuhannami. Amen.

63.      Ale Tuhan Debata, na songkal jala na badia, Amanami na di banua ginjang! Sai asi rohaM, tatap ma HuriaM. Naung jinouM, jala naung hinophopMu do hami. Dibahen i sai ramoti ma daging dohot tondinami, asa mardame jala sonang hami mangihuthon AnakMu, Tuhan Jesus Kristus, Tuhannami. Amen.

XVI. TANGIANG MANGIDO ARI NA HASEA

64.      Ale Tuhan Debata, Amanami na di banua ginjang ! Ho do nampuna langit dohot tano ro di pangisina sudena. Jadijadian ni tanganMu do sude na adong jala na pinarmuduM do umbahen mangolu sude na tinompaM i. Na marpungu do hami dison mangido: Sai sesa ma dosanami dohot dosa ni angka dongannami. Sai unang baloshon tu hami angka pambahenannami na hurang i. Sai digohi asi ni rohaM ma sude na hurang di hami. Hupangido hami nuaeng sian nasa rohanami: Asi ma rohaM, sai lehon ma udan dohot las ni ari di tingkina be, na pagabe na huula hami asa jumpang hami parbue na denggan bahen panganon siganup ari. Sai lam patandahon ma tu hami godang ni denggan ni basaM, asa huboto hami mandok mauliate tu Ho dohot mamuji GoarMu na badia i marhitehite Tuhan Jesus Kristus, Tuhannami. Amen.

XVII. PESTA GOTILON

65.      Ale Tuhan Debata, Amanami na di banua ginjang ! Ho do haroroan ni sude denggan basa na marragamragam i. Ala ni pasupasuM do umbahen marparbue sude na niula ni tangannami, jala diparmudu Ho do hami na tinompaM, asa unang rapar. Dibahen i marpungu hami nuaeng mandok mauliate sian nasa rohanami tu Ho. Sian tanganMu do sude hujalo hami, nasa na denggan tu dagingnami dohot tu tondinami, jala asi ni rohaM do mangaramoti hami. On pe sai jalo ma hamauliateon ni rohanami. Angkup ni i sai lehon ma TondiM tu hami, na mamuhai dohot patiurhon mata ni rohanami, asa lam huida hami sude na denggan, sude na uli na pinatongonMi tu hami, asa lam ringgas rohanami mamuji dohot pasangaphon Ho marhite Tuhan Jesus Kristus, Tuhannami. Amen.

*

66.      Ale Tuhan Debata, Amanami ro di saleleng ni lelengna ! Mauliate ma rohanami, ala diparmudu jala diramoti jala dipasupasu Ho sude na tinompaM i marhitehite HataM. Sai suanhon ma tu rohanami HataM na badia i marhitehite Jesus Kristus Tuhannami, asa lam tau hami manjulo sude asi ni rohaM na godang i. Buhai ma mata ni rohanami, asa huida hami sude denggan ni basaM, na mangalehon di hami parbue ni na niula sian hauma dohot sian porlak, asa adong di hami hangoluan siganup ari. Dibahen i mauliate ma rohanami tu Ho, ala naung hujalo hami sudena i sian Ho. Sai urupi ma angka dongannami na di hagogotan, asa unang mate anturaparon nasida. Sai apoi ma sude halak Kristen manarihon donganna angka na targogot marningot asi ni rohaM. Sai lam tambai ma asi ni rohaM dohot pasupasuM di hami ala ni Tuhan Jesus Kristus, Tuhannami, asa lam ringgas hami pasangaphon dahot ma muji Ho. Amen.

XVIII. TANGIANG JUMPA SEGA NA NIULA

67.      Ale Tuhan Debata, Amanami ! Na badia jala na bonar do Ho, Ho do haporusannami sian najolo ro di nuaeng. Diloas Ho do nuaeng hasusaan masa tu hami, jala na holsoan do hami, ala hurang denggan jala hurang godang parbue ni na huula hami martimbangkon nasailaon. Ala ni i marpungu hami nuaeng tu joloM: huundukhon hami ro tu toru ni tanganMu na gogo i. Sai sesa sude dosanami dohot dosa ni dongannami. Sai unang baloshon tu hami pambahenannami na hurang i, sai huphupi ma i sude ala ni asi ni rohaM. Ho sambing do haporusannami jala marhaposan tu Ho do hami.

Sai pasupasu ma sipanganon na otik i, asa gabe sipargogo tu dagingnami. Sai lehon di hami hangoluan siganup ari, jala palua sian hagogotan angka na hurangan i, asa hupuji hami Ho ro di saleleng ni lelengna marhitehite AnakMu Tuhan Jesus Kristus, Tuhannami. Amen.

XIX. PESTA REFORMASI

68.      Ale Tuhan Debata, Amanami na di banua ginjang ! Na marpungu do hami dison mamuji Ho dohot mandok mauliate tu Ho, ala dilehon Ho tu hami Barita na Uli. Sai lehon ma Tondi Parbadia patiurhon rohanami asa pungu rohanami manjalo HataM, jala asa torang huantusi hami HataM na binaritahon tu hami. Sai ramoti ma hami asa unang hutinggalhon hami HataM, jala asa unang hualo hami saluhut parentaM. Sai lehon ma di hami roha na hohom dohot pamompomon ni roha, asa mangula HataM di bagasan hami, jala asa dipangolu HataM i hami dohot saluhut HuriaM. Sai lehon ma TondiM mandongani angka Parbarita na Uli, asa diboan dame dohot hasonangan tu HuriaM, ala ni Tuhan Jesus Kristus, Tuhannami. Amen.

*

69.      Ale Tuhan Debata, Pargogo na so hatudosan, Amanami na di banua ginjang! Mauliate ma rohanami tu Ho, ala naung disondangi Ho hami marhitehite Barita na Uli, asa tarbahen hami mulak tu Ho. Sai sondangi jala togu ma angka dongannami, asa mulak nang nasida sian dalan haliluon tu dalan hangoluan. Sai lehon TondiM manogunogu nasida asa lam denggan jela tau tiruan parangenasida mangihuthon Tuhan Jesus Kristus Tuhannami. Amen.

*

70.      Ale Tuhan Debata, Parasiroha na sumurung ! Ho do nampuna hami jala pangaramotiM do umbahen mian hami di harajaonMu. Asi ma rohaM, sai lului ma angka na lilu, na manirpang sian dalan na pinatuduhonMi. Sai togu jala paulak nasida tu haporseaon na sintong. Unang loas tarpedem angka pardosa di bagasan dosana, sai lehon tu nasida tingki hamubaon ni roha; sai patandahon tu nasida dosana dohot haliluonna be. Sai unang loas angka na lilu manggaori HuriaM, asa mardame jala marlas ni roha hami ro di ujung ni langkanami marhitehite Tuhan Jesus Kristus, Tuhannami. Amen.

*

71.      Ale Tuhan Jesus Kristus, Tuhannami jala Debatanami ! Nunga ditaon Ho hamatean humophop hami, lam paias ma rohanami dohot tondinami asa marhiras ni roha hami paimahon ari haroroM. Sai sesa sude dosanami asa unang mabiar hami mida hamatean. Sai lehon pangkirimon na mangolu di hami, asa lam malungun hami tu inganan na sonang di lambungMu. Asi ma rohaM, sai pamasuk ma hami tu harajaonMu na di banua ginjang, asa dohot hami marlas ni roha rap dohot angka surusuruanMu dohot angka naung pinillitMu. Amen.

*

72.      Ale Tuhan Debata ! Mauliate ma rohanami, ala naung diparade Ho hasonangan na sun denggan di angka na mangoloi dohot na mangkaholongi Ho. Ala ni i umbahen hupangido hami: Suan ma holong ni roha di hami, asa huhaholongi hami Ho sian nasa roha, sian nasa tondi dohot sian nasa gogonami. Asa Ho di atas ni saluhut hubahen hami. Sai papos ma rohanami, asa hugolom hami angka bagabagaM na sumurung i, na mangatasi sasude. Sai oloi ma pangidoannami ala ni Tuhan Jesus Kristus, Tuhannami. Amen.

*

73.      Ale Tuhan Debata, Pargogo na so hatudosan jala Ama Parasiroha ! Ndang lomo rohaM mida hamatean ni pardosa: mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen hupangido hami, sai sundati ma torutoruM, asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami asa margogo hami paubahon rohanami, marhitehite Tuhan Jesus Kristus, Tuhannami. Amen.

*

74.      Ale Tuhan Debata, na badia jala na bonar ! Parasi jela Partalup ni roha jala na basar do Ho. Sai marpangulahi ma rohaM mida hami. Dibahen i sai sesa ma dosanami. Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami angka na hinophop ni Tuhan Jesus Kristus, Tuhannami. Amen.

XX. TANGIANG DI ARI PARNINGOTAN DI ANGKA NA MATE

75.      Ale Tuhan Jesus, Tuhan ni angka na mate dohot angka na mangolu ! Ho do nampuna hami, manang mangolu manang mate pe hami. Nang pe mardalan hami di rura nilinggoman ni hamatean, ndang huhabiari hami be hamatean, ai Ho do dongannami. Ndang tartiop hamatean manang tanoman be hami, ai Ho do Tuhannami naung humophop hami, jala Ho nampuna hami. Ro hami nuaeng tu Ho mangido: Sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophopMi, asa sahat hami tu hangoluan na so ra suda. Amen.

*

76.      Ale Tuhan Debata, Pargogo na so hatudosan ! Ho do na manjou hami jala Ho do na papunguhon angka na pinillitMu tu HuriaM na badia i. Mauliate ma rohanami, ala na naung dipasahat Ho hami tu AnakMu, asa Ibana nampuna hami. Asi ma rohaM, sai pargogoi ma hami mangulahon na nidok ni HataM, asa domu hami dohot naung tolhas tu lambungMu. Sai patogu ma haporseaonnami sahat ro di ajalnami, asa sahat hami sogot tu halalas ni roha na sumurung, na pinaradeM di angka na mangkaholongi Ho, asa pujionnami Ho disi saleleng ni lelengna marhitehite Tuhan Jesus Kristus, Tuhannami, Amen.

77.       

D.                Angka tangiang dung sun marjamita

1. DI ARI MINGGU

1.         Ale Amanami na di banua ginjang ! Sai rajai ma marhitehite Tondi Parbadia saluhut Huria ni halak Kristen, asa mian di hami poda na pinodahon ni HataM. Sai patogu ma haporseaon ni angka na porsea di Ho, asa lam diboto mangihuthon HataM, jala asa lam ditanda be hangoluan na sian Ho i. (Pasupasu ma saluhut parguru, angka na naeng masuk tu harajaonMu, dohot saluhut angka na naeng manghatindangkon haporseaonna, asa tung gabe ruas na mangolu jala na margogo nasida di HuriaM i). Angkup ni i pasupasu ma HataM na jinamitahon tu saluhut sipelebegu dohot tu parugamo na asing, asa lam rarat harajaonMu jala monang, jala asa talu harajaon ni sibolis. Pasupasu ma Pamarenta rap dohot angka donganna na gumomgom hami, sai lehon ma tu nasida hapistaran na sian Ho i, asa diboto mangaturhon aturan na denggan na tau pasangaphon GoarMu. Pasupasu ma sandok Huria on dohot angka ulaon na masa disi. Pasupasu ma sasudena ama, ina, angka dolidoli dohot anakboru ro di dakdanak, angka na marsikola mangguruhon HataM. Angkup ni i sai pagabe ma saluhut na niula, jela sai padao ma nasa na tau mangago hami. (Sai unang ma sega hauma, binahen ni aek magodang manang ambolas dohot antingango manang sirara). (Asi ma rohaM, ale Tuhan Jahowa, sai lehon ma udan paremean tu haumanami hombar tu asi ni rohaM dohot denggan ni basaM ). (Asi ma rohaM di hami, sai tatap ma hami hinorhon ni denggan ni basaM, di tingki hagogotan binahen ni sahit na masa nuaeng (ngenge, beguantuk d.n.a.). Unang uhumi hami hombar tu murukMu. Asi ma rohaM di saluhut na mabalu dohot di angka dakdanak na sopot so marama so marina. Tatap ma saluhut na pogos, na marsahit ro di angka na naeng mate dohot na marsak binahen ni soro ni ari. Ho ma ale Tuhan Jahowa, amanasida dahot pangondianna, ai Ho do Sipangolu hajolmaon. Antong sai padungo ma hami sasudena, asa unang dipaotooto sibolis hami. Alai pamonang ma hami maralohon rohanami na jahat i, asa tarpabongot Ho hami tu harajaonMu na di banua ginjang i. Sai oloi ma pangidoannami, ale Tuhan Jahowa, marhitehite Tuhan Jesus Kristus, Tuhannami, na tarpuji rap dohot Ho dohot Tondi Parbadia ro di saleleng ni lelengna. Amen.

2.         Ale Tuhan Debata, Pargogo na so hatudosan, Parasiroha na sumurung Amanami marhitehite Tuhan Jesus Kristus ! Na mandok mauliate do hami tu Ho sian nasa rohanami, ala diudut Ho hosanami rasirasa nuaeng, jala dijou Ho hami marhitehite Barita na Uli tu hangoluan na so ra suda. Ditumpak Ho do hami marsonangsonang mananginangi HataM na badia i. Sai pahot ma di hami ro di pinomparnami jamita na sian HataM. Angkup ni i lehon tu hami siparmahan. Tiroi ma HuriaM, ai Ho do pangondingan dohot haporusan ni angka na marsitaonon ala ni GoarMu. Lehon ma hamubaon ni roha di angka sipelebegu dohot di parugamo na asing, asa saluhut jolma tumanda Ho jala mamuji GoarMu. Pasupasu ma saluhut parguru angka na naeng masuk tu harajaonMu ( dohot saluhut angka na naeng manghatindangkon haporsenonna ), asa tung gabe ruas na mangolu nasida di HuriaM i. Tambai ma asi ni rohaM di Pamarenta na gumomgom hami, ro di saluhut donganna pangarajai. Pasupasu ma saluhut angka na martohonan di bagasan Huria on. Parbadiai ma dohot na mardongansaripe, sai parrohai ma nasida mangajari angka anakhonna, na nilehonMi tu nasida be. Pasupasu saluhut pangomoan dohot ulaon na ture. Padao ma sian hami torutoru, na tama hian mangonai tu hami, jala lehon udan dohot las ni ari di tingkina be. Apuli ma saluhut na mabalu dohot dakdanak, na sopot so marama so marina, ro di saluhut angka na marsahit, angka na pogos dohot angka na di bagasan pangunjunan; patuduhon ma tu nasida rohaM na marasi i, asa diboto nasida pasangaphon GoarMu na badia i. Urupi ganup na tarsosak, ale Sipangolu hajolmaon ! Padungo ma hami marhite sian Tondi Parbadia, asa hobas hami di hasusuda ni bohalnami. Sai pargogoi ma hami asa huhabiari hami Ho saleleng hami mangolu; ia mate hami, asa tongtong mian hami di bagasan asi ni rohaM, maradian hami di bagasan dameM, jala mulak mangolu hami ala ni hagogoonMu, laho manean na hinirim ni rohanami hian, i ma hasonangan saleleng ni lelengna, marhitehite Tuhan Jesus Kristus, Tuhannami. Amen.

II. ANGKA TANGIANG DI ARI PESTA DUNG SALPU MARJAMITA ADVENTUS

1.         Ale Tuhan Debata, Amanami ro di saleleng ni lelengna ! Mauliate ma rohanami tu Ho, ala diramoti Ho hami di bagasan taon parhuriaon naung salpu i. Asi ni rohaM do na pasahathon hami tu bagasan taon na imbaru on. Huida hami di bagasan na sataon i denggan ni basaM: Buas do Ho mangalehon Barita na Uli tu hami, asa mardame jala marhasonangan rohanami. Ditambai Ho do bilangan ni angka na porsea, angka na burju mangoloi HataM. Dipargogoi Ho do angka na porsea dohot naposoM, angka na mamaritahon habalgaonMu di tongatonga ni HuriaM. Tung na so habilangan do sude denggan ni basaM na sataon i, sian minggu tu minggu, sian bulan tu bulan, sahat ro di sadari on. Dibahen i hupuji hami ma GoarMu jala hupasangap hami ma Ho. Sai gomgomi jala pasupasu ma nang HuriaM; tambai ma ganup ari torop ni angka na porsea, na marholong ni roha di Ho. Sai pararat ma harajaonMu di tano Batak on dohot di sandok pulo on. Sai ramoti HuriaM asa unang saut tahi ni parjahat na mangambati harararat ni harajaonMu. Sai unang loas HuriaM i disusai, digaori manang dileai. Ramoti ma angka na pinillitMu, paima sahat tu hangoluan. Sai ramoti ma sude naposoM, na mamaritahon Barita na Uli. Sai jou ma angka sipelebegu dohot parugamo na asing asa dohot nasida pasangaphon GoarMu. Sai ramoti jala parbadiai ma HuriaM sahat ro di haroro ni Tuhannami Jesus Kristus. Amen.

2.         Ale Tuhan Debata, Amanami Parasiroha ! Hasangapon, hamuliaon dohot pujipujian ma di Ho ro di saleleng ni lelengna ! Mauliate ma rohanami di Ho ala ni asi ni RohaM dohot holong ni rohaM; ai disuru Ho do AnakMu na sasada i, asa malua na ginomgomanMu sian dosana be. Na marlas ni roha do hami nuaeng di bagasan haserepon ni roha, marningot haroro ni AnakMu dohot hapapatarNa tu liat portibi on. Ale Tuhan Jesus Kristus, Anak ni Debata na mangolu i ! Pinuji ma Ho ala ni asi ni rohaM, ala dipatutoru Ho diriM, gabe saor Ho tu hami jolma na lea, asa malua angka na pinillitMu sian dosana be. Marlas ni roha do hami nuaeng jala mauliate rohanami, marningot haroroM mangebati hami. Sai topot ma HuriaM jala pature ma i bahen ingananMu. Bongoti ma rohanami, parbadiai jala patiur ma saluhutna i, marhitehite sondang ni Barita na Uli, asa hobas hami paimahon ari haroroM na sangap i. Sai pasupasu ma na manggomgom hami, dohot saluhut raja ni halak Kristen. Sai sondangi jala pasupasu ma saluhut Pandita, Guru, Sintua, Evangelist dohot angka na paturehon na marsahit, asa margogo nasida mangaramoti HuriaM. Sai sungguli ma hami tu hamubuon ni roha na tutu. Apuli ma angka na marsak, urupi ma na targogot dohot na marsahit. Sai patiur ma langka ni na laho mate, asa torang rohana manopot hasonangan i. Sai topot ma dongannami na di haholomon, pabinsar ma Barita na Uli tu nasida, asa lam tamba angka na porsea dohot na pasangaphon Ho di ari haroroM na sangap i. Amen.

PESTA HATUTUBU NI TUHAN JESUS

Ale Tuhan Debata, Debata na tongtong, na so marmula, na so marpansohotan ! Hupuji hami ma Ho ala saut sude tahiM, naung sinangkapMu, andorang so marojahan dope hasiangan on. Ndang tarambat sibolis sangkapMu; ndang sundat tahiM na badia i dibahen dosanami, ala ni holong ni rohaM na balga na so hadodoan i. Dibahen i mauliate ma rohanami tu Ho, ala naung saut sangkapMu, i ma parsuruM di AnakMu gabe Sipalua jula Sipangolu di hami, asa malua hami sian dosa, hamatean dohot sian uhum jala mansohot hami mangulahon dosa. On pe, sai asi ma rohaM di hami, togihon ma hami tu AnakMu. Sai bahen ma hami gabe siluaM tu Ibana, asa upa ni halojaonNa hami, ala na tinaonNa na bernit i dohot hangaluton humophop hami, asa Ibana nampuna hami, jala hami nampuna Ibana. Sai sungguli ma HuriaM sadari on, asa diingot habalgaonMu dohot haroro ni AnakMu gabe jolma, laho pangoluhon hami pardosa. Sai sungguli ma angka parhalado di HuriaM, mamaritahon Barita na Uli i tu saluhut halak, naung patar hasangaponMu, jala naung jumpang dame dohot hasonangan. Sai lehon ma pintu na ungkap tu halak sipelebegu dohot tu parugamo na asing asa ro nasida mangoloi Tuhannami Jesus Kristus. Sai rajai ma saluhut raja dohot angka suruanna, asa diboto nasida naung dilehon Ho Raja, jala Tuhan na sumurung i ro di saleleng ni lelengna. Sai lehon gogo tu angka na di bagasan pangunjunan, apuli angka na marsak jala palua angka na targogot. Sai tatap jala ondingi angka na pinaburuburu ni halak ala ni GoarMu. Sai dongani jala pasupasu hami sude, angka na magodang ro di dakdanak di bagasan Tuhan Jesus Kristus, Tuhannami. Amen.

TAON NA IMBARU

Ale Tuhan Debata, na so marmula na so marpansohotan, Debata na manongtong ro di saleleng ni lelengna ! Na so olo suda do angka taonMu, jala ndang marparbolatan angka ariariM; alai jempek jala na gabur salpu do taonnami dohot ariarinami. Nunga salpu muse sada taon sian ariarinami, alai ndang salpu ianggo asi ni rohaM. Dibahen i hupuji hami Ho marhitehite Tuhan Jesus Kristus Tuhannami, ala ni godang ni asi ni rohaM na pasahat hami tu bona ni taon on. Mansai godang do denggan ni basaM hujalo hami manipat taon na salpu i, jala huingot hami do i sadari on. On pe mauliate ma rohanami tu Ho, ala dipangolu jala diramoti Ho hami; dilehon Ho sipanganon dohot paruloson di hami jala dipasupasu Ho na niula ni tangannami. Angkup ni i dilehon Ho do hasonangan tu luatnami, jala dipalua Ho do hami sian parmaraan, jala diramoti Ho do hami di hagogotan. Tongtong do dilehon Ho Barita na Uli i manondangi hami asa sanga hami paubahon rohanami. Angkup ni i dilehon Ho do apulapul tu na marsak, tu na matean, asa unang mandele nasida. Molo huingot hami sude pambahenannami di taon naung salpu i, na maila do hami nuaeng maradophon Ho, ala jotjot magopo ariarinsmi dohot asi ni rohaM hubahen hami. On pe binsan disalpuhon Ho nuaeng taon naung salpu i sian hami, salpuhon ma sude pambahenannami na hurang i, jala sesa sude dosanami. Sai huphupi ma pambahenannami na hurang i, marhitehite asi ni rohaM. Diebati Ho do hami manipat na sataon i, jala diida Ho do lan na so marparbue na denggan di tongatonganami. Sai unang jolo taba, sai pasombu ma hami mangolu, anggiat marparbue na denggan hami tu joloan on. Huparhatopot hami do sude asi ni rohaM jala di bagasan haserepon dohot unduk ni roha do hami nuseng mangido tu Ho: Sahat tu Ho ma hami on sude. Sai togutogu jala ramoti ma hami on sude. Sai togutogu jala ramoti ma hami di bona ni taon on, songon i ganup ari, asa pujionnami Ho di taon na ro on. Patuduhon ma ganup ari tu hami dalan sidalanannami dohot ulaon siulaonnami. Sai pasupasu ma hami jumpa marpungu di bagasMon, di parsikolaan, songon i dohot di bagasnami be. Sai tumpahi sude parjamita, pangajari dohot na paturehon na marsahit, songon i dohot na pinasahat tu nasida. Sai ramoti ma na manggomgomi hami. Tatap ma salohut na tarsosak, na pogos, na dangol, na so marama, na nileaan ni halak. Unang loas nasida hona rupa, alai patuduhon ma tu nasida asi ni rohaM na so mansohot i, asa rap marlas ni roha hami sogot di hasonangan di lambungMu di inganan na hot, ala ni AnakMu, Tuhan Jesus Kristus, Tuhannami. Amen.

EPIPHANIAS

Ale Tuhan Debata, Ama ni angka hatiuron, haroroan ni angka dengganbasa na mauliutus ! Mauliate rohanami tu Ho, ala dipapatar Ho holong dohot asi ni rohaM, marhite sian pangalehonMu di AnakMu, Tuhannami Jesus Kristus, gabe jolma humophop hami. Huida hami sian i godang ni holong ni rohaM; ndang na hasuhatan bidangna dohot ganjangna; ndang na tardodo bagasna jala ndang na tardungdung timbona. On pe pujionnami ma Ho, ala dipabinsar Ho Barita na Uli tu hami, asa mangolu hami di bagasan asi ni rohaM. Sai asi ma rohaM, sondangi ma hami, lehon ma TondiM patiurhon rohanami, asa torang huida hami habalgaonMu dohot panondang na sian Ho i. Sai lehon ma hami tu AnakMu, bahen upa ni halojaonNa ala na tinaonNa hangaluton humophop hami, asa mansohot hami mangulahon dosa, asa burju jala daulat hami marroha, paboa mauliate ni rohanami. Sai sungguli ma HuriaM, asa olo mangalehon rohana dohot artana be bahen silua tu AnakMu Tuhan Jesus, Tuhannami. Papatar ma Barita na Uli tu halak sipelebegu dohot parugamo na asing asa marrongoman nasida ro mandapothon Panondang naung binsar i. Sai lehon hiras ni roha tu angka Parbarita na Uli, asa hatop rarat Barita na Uli i tu ganup huta na di tano on. Sai lehon hapistaran sian Ho tu angka panggomgomi dohot tu angka raja, tu angka suruan na pinabangkitna, asa dohot nasida patiurhon dalan ni Barita na Uli. Sai paunduk ma rohanasida, asa rap hami mangoloi parenta ni AnakMu, Tuhan Jesus Kristus, Tuhannami. Amen.

PESTA HAMAMATE NI TUHAN JESUS

Ale Tuhan Debata, Amanami, na marhabangsa di atas ni saluhut ! Nunga patar huida hami holong ni rohaM na godang i. Gumodang do i sian holong ni roha ni amaama dohot inaina di anakhonna. Tung na so tartimbang do godang dohot arga ni silehonlehonMu di hami. Ai AnakMu na sasada i disuru Ho gabe jolma, manaon pardangolan, insakinsak dohot pastappastap gabe tarpajal Ibana jala tu hamatean humophop hami. Mauliate ma rohanami, ala naung sae utangnami, jala malua hami sian dosa, sian hamatean dohot sian gomgoman ni sibolis; ala ni i pujionnami ma GoarMu na badia i, ala naung dipatupa AnakMu pardomuan, pardengganannami tu Ho. Ale Tuhan Jesus Kristus, birubiru ni Debata, naung mamorsan dosanami dohot dosa ni hajolmaon ! Mauliate ma rohanami tu Ho jala pujionnami ma Ho ro di saleleng ni lelengna. Sai tatap ma HuriaM, na hinophopMu jala na pinapunguM i. Sai pahot ma di hami hasesaan ni dosa dohot dame na pinatupaM i. Sai paias jala parbadiai ma hami, asa tarboan Ho hami tu banua ginjang pasaorhon hami tu angka na badia i. Sai bunu jala parsilangkon ma jolma na buruk i dohot sangkapsangkap na roa na di bagasan hami, asa unang marlindang hami mandapothon Ama na di banua ginjang i. Hupasahat hami ma dirinami tu Ho, jala hulehon hami rohanami bahen ingananMu, ala naung dihophop Ho hami. Di Ho ma hami jala Ho di hami, sai unang loas hami sirang sian Ho; dongani ma hami jala saor ma Ho tu hami. Sai patogu ma haporseaonnami tu Ho, asa hot langkanami ro di ujung ni hamatean. Sai ramoti ma angka ruasMu na mamarltahon holong ni rohaM dohot dalan naung pinatupaM i. Antong manang mangolu manang mate pe hami, Ho do Tuhannami dohot Rajanami. Sai asi ma rohaM, ingot ma hami di hasangaponMi jala boan hami tu hasonangan ina di lambung ni Debata. Amen.

PESTA HAHEHEON NI TUHAN JESUS

Ale Tuhan Debata, Amanami jala Parasiroha ! Mauliate ma rohanami jala pujionnami Ho, ala naung ditubuhon Ho hami paduahalihon sian godang ni asi ni rohaM tu pangkirimon na mangolu marhitehite haheheon ni Tuhan Jesus Kristus sian na mate. Nunga gabe Sipalua jala Sipangolu AnakMi di hami, jala Ibana Tuhannami, Ibana Ulunami, siihuthononnami. Na marlas ni roha do hami nuaeng marningot haheheonNa i. Nunga talu sibolis, talu hamatean, talu banua toru. Ndang mabiar be hami mida hamatean dohot soropna, ai nunga monang Tuhannami. Ulubalang na gogo i. Ibana do manogihon hami sian hamatean tu haheheon sogot. Ala ni i umbahen hupangido hami: Sai asi ma rohaM, patogu ma haporseaonnami maniop Barita na Uli i, asa unang ganggu rohanami di na hubolus hami hamatean i. Sai sungguli ma rohanami dohot roha ni dongannami, asa rap hehe hami sian parrohaon na buruk i; asa tarulahon hami parange na imbaru. Sai pasupasu ma HuriaM dohot Parbarita na Uli, na mamaritahon haheheon ni Tuhannami, asa lam tarsunggul angka na pedem roha jala hehe sian dosana be. Sai papos ma rohanami manghaporseai, naung mardame jala mardomu hami tu Ho ala ni pardengganan na pinatupa ni AnakMu. Sai pasabam jala pamalum ma rohanami. Tompa ma roha na ias dohot tondi na marsihohot di bagasan hami, asa tarhajongJongkon hami, naung pintor hami ala ni hatigoran na pinatupa ni Tuhan Jesus Kristus. Sai sungguli ma pangkirimon na mangolu di hami, asa tarapul rohanami marningot angka dongannami naung jumolo nialapMi, jala asa tarapul rohanami manaon sitaonon di hasiangan on. Sai apuli ma angka na matean, na dangol, na pogos, na so marina, angka na mabalu dohot angka na malungun tu banua ginjang marhitehite haheheon ni Tuhan Jesus Kristus, Tuhannami. Amen.

PESTA HANANAEK NI TUHAN JESUS

Ale Tuhan Jesus Kristus, naung manaek tu banua ginjang, na hundul di siamun ni Debata ! Hasangapon dohot hamuliaon ma di Ho ro di saleleng ni lelengna. Na marlas ni roha do hami nuaeng ala naung monang Ho, jala dipabangkit Debata Ho gabe Raja di atas ni saluhut. Halongangan do sude dalanMu, ai dipatutoru Ho diriM tu toru ni saluhut, alai gabe tumimbo Ho sian sasude jala maruli Goar, asa lompit saluhut ulu ni tot laho marsomba tu Ho, jala ganup pamangan marhatopothon: Ho do Tuhan ! Mauliate ma rohanami tu Ho, ala naung diungkap Ho dalan tu banua ginjang, gabe Sintua ni malim Ho, na mangondihon hami tu Debata. Sai pasupasu ma HuriaM, na maringanan dope di hasiangan on, paima marpungu hami tu lambungMu. Sai pasaut ma bagabagaM tu angka suruanMu. Lehon tu nasida sahala dohot hagogoon sian banua ginjang, asa marmulia GoarMu di portibi on. Sai ajari ma angka partohonan di HuriaM, asa hombar tu lomo ni rohaM angka aturan, paminsangon dohot panogunoguon na niaturhonnasida di HuriaM. Sai gomgomi jala parentai ma HuriaM di tano Batak on, asa lam rarat jala monang HuriaM i; lehon hapistaran sian banua ginjang tu angka induknami, tu angka Pandita, Guru dohot tu angka Sintua, asa lam maraturan HuriaM di tano on. Sai pajongjong harajaonMu di bagasan rohanami, asa marhiras ni roha hami mangoloi dohot mangihuthon Ho. Pahot ma rohanami tu Ho, asa huhatindangkon hami, mangolu manang mate pe hami: Ho do Tuhannami. Sai paian ma HataM dohot dame di HuriaM, asa huingot hami: ndada hasiangan on inganannami, alai di banua ginjang di lambungMi do. Sai ramoti ma na manggomgomi hami dohot raja dohot suruan na pinabangkitna; lehon tu nasida hapistaran sian banua ginjang dohot unduk ni roha, asa dohot nasida mangoloi parentaM. Pasupasu ma saluhut parpunguan ni halak Kristen, sai Ho ma dongannasida jumpa marpungu di gareja, di parsikolaan, nang pe di bagasna be. Sai lam longkangi sian hami dosa dohot sude na pasorathon hami di hasiangan on, asa lam malungun hami, paimahon haroroM mangalap hami tu lambung ni Ama i. Amen.

PESTA HARORO NI TONDI PARBADIA

Ale Tuhan Debata, Amanami ! Na so tarasam do godang ni silehonlehonMu di hami. TondiM na badia i dilehon Ho tu hami jolma, sumonggopi hami na lea on. Na umarga i do dilehon Ho tu hami, jala gumodang do i sian portibi on dohot sian pangisina sude. On pe mauliate ma rohanami jala pujionnami ma Ho ala ni sude habalgaon dohot hamuliaonMu, naung pinapatarMu tu hami. Sai lehon ma Tondi Parbadia i tu HuriaM, angka na olo mangihuthon Tuhan Jesus Kristus, Tuhannami asa diajari, dirajai, dipatiur, diparbadiai jala dipatongtong hami mian di Barita na Uli i. Ale Tondi Parbadia ! Sai pasada ma HuriaM na pinapungupunguM i, asa masijaloan jala masihaholongan songon angka ruas ni daging ni Tuhan Jesus Kristus na badia i. Sondangi jala patiur ma hami, asa hutanda hami angka dosa na balga dohot na metmet sipasidingonnami. Sai buas ma Ho manesa dosanami, asa lam badia jala imbaru hami ganup ari, asa tarbahen hami saor di bagasan Huria na badia, na sasada i. Sai ondihon jala padomu hami tu Ama i, asa pos rohanami mandok: Amanami di bagasan Tuhan Jesus Kristus. Sai tambai silehonlehon tu Huria, asa lam ganda torop ni angka Parbarita na Uli dahot pangajari dohot parasiroha, na mamaritahon habalgaonMu di portibi on. Sai sondangi jala pasupasu sude parpunguan ni halak Kristen di gareja, di parsikolaan, nang di bagasna be, asa tau nasida saor tu parpunguan sogot. Sai sungguli angka na tarpodom, jala pargogoi angka na gale. Sai songgoti ma angka na neang dahot na tangkang marroha, asa ditinggalhon nasida hajahatonna be. Sai parrohai angka na bojok roha, jala apuli angka na marsak dohot na dangol i, asa unang diruparupa portibi on angka na mangoloi Ho. Sai tatap ma na targogot dohot na pinaburuburu ni halak ala ni haporseaon di Tuhan Jesus, sai ajari nasida maralus jala mian ma Ho di bagasan nasida. Sai ramoti ma pingkiran ni angka panggomgomi, panguhum dohot angka raja, asa tigor uhumnasida, jela asa dihabiari nasida ari paruhuman sogot. Sai patogu haporseaonnami, asa tongtong huingot hami, naung sesa dosanami, jala boanonMu hami tu hangoluan sogot. Sai sungguli pangkirimon na mangolu di hami, asa pos rohanami, nang malangke daging on, pangoluonMu do muse, asa masuk hami marnida Debata Ama marhitehite Tuhan Jesus Kristus, Tuhannami. Amen.

PESTA TRINITATIS

Ale Debatanami, Debata Ama, Anak dohot Tondi Parbadia ! Na badia, na badia, pa badia do Ho, jala gok hamuliaonMu liat portibi on. Pinuji jala pinasangap ma ho ro di saleleng ni lelengna, ala ni asi ni rohaM naung sahat tu hami dohot tu sude HuriaM. Na marlas ni roha do hami nuaeng, ala naung dipapatar jala dipatandahon Ho tu hami hadirionMu, holong ni rohaM, asi ni rohaM, lambas ni rohaM, hasesaan ni dosa, hangoluan sogot, arta silehononMu sogot ro di uhum sidabuonMu sogot. Na so habilangan do sudena i, ai na so dung niantusan ni jolma, dipatorang Ho do tu hami; na so dung niida ni jolma, dipataridahon Ho do tu hami; na so dung hinasiholan ni portibi on, diboan Ho do di hami; na so tarlehon portibi on dilehon Ho do tu hami. Ala ni i hupasahat hami ma tu Ho dagingnami, tondinami, rohanami ro di saluhut na di hami, asa patauonMu hami tu harajaonMu na di banua ginjang. Ho do manompa hami, umbahen tubu hami tu hasiangan on; sai tompa jala paimbaru ma hami, asa tubu hami paduahalihon, jala gabe partohap di hasiangan na ro sogot, di lambungMi. Na unduk jala serep do rohanami ro tu Ho mangalehon rohanami, sai bahen ma i ingananMu. Sai Ho ma mangula jala margogo di bagasan hami, sai paujung ulaon naung pinungkaM i di hami, naung sinahaphonMu GoarMu tu hami, naung tardidi hami tu bagasan GoarMu na badia i, asa hami di Ho jala Ho di hami. Sai lam tanggali roha na buruk sian hami jala solukhon roha na imbaru tu hami, asa badia parangenami, paboa naung mauliate rohanami tu Ho. Sai pargogoi ma hami, asa huparangehon hami sude na nidokMu tu hami, paboa naung tutu hami angka anakMu jala panean di hangoluan sogot. Sai paian Barita na Uli di hami, asa adong pargogonami, saleleng hubolus hami hasiangan on. Sai patogu haporsesonnami marhite Tondi Parbadia sahat ro di hamatean, asa sahat hami tu Ho, Amanami marhitehite Tuhan Jesus Kristus. Amen.

PESTA GOTILON

Ale Tuhan Debata, Amanami Pardengganbasa na sumurung ! Na ro do hami tu joloM mamboan pujipujian dohot olopolop. Mauliate rohanami ala dipasupasu Ho na huula hami, gabe jumpang hami parbue sian hauma i (sian porlak). Marlas ni roha hami nuaeng mangalehon silehonlehonnami na denggan tu Ho. Na laho pasangaphon Ho do hami, ala ni pangaramotiM di hami dohot di angka ulaon na huula hami jala malua hami dibahen Ho sian ragam ni parmaraan. Na hurang tama do hami nian manjalo asi ni rohaM na godang i, ala jotjot hulaosi hami parentaM. Sai sesa ma dosanami, jala unang jujur pambahenannami i. Sai togu ma hami marhitehite silehonlehonMi, asa lam hupauba hami roha na so hasea, jala huihuthon hami Tuhan Jesus Kristus, Tuhannami. Sai buhai ma rohanami marhitehite TondiM, asa hutanda hami godang ni silehonlehonMu tu hami asa lam girgir hami mandok mauliate. Sai urupi ma angka na pogos dohot na dangol, unang loas mate anturaparon manang ise na manghabiari Ho. Sai tatap ma na haleonon jala suru pangurupi tu nasida. Sai apoi ma angka na mora, na duma, asa dilehon tu angka na hurangan. Sai pasupasu ma HataM tu rohanami, ai I do hangoluan ni tondinami. Sai paingot hami di ujung ni langkanami, asa unang holan hangoluan di tano on hulului hami, alai togutogu ma hami, asa hupareak hami hangoluan dohot arta na so olo suda, silehononMu tu hami. Sai pasupasu na manggomgomi hami dohot panguhum, ro di angka raja, asa tigor uhumnasida jala asa diuluhonnasida parripena i tu angka ulaon na denggan. Sai paringgas hami mulaulaon, ai patikMu hian do i, asa lam moru bilangan ni angka na jungkat jala lam tu toropna parasiroha, na pasangaphon Ho. Sai boan ma hami sian rura hasusaan on tu lambungMu, marhitehite Tuhan Jesus Kristus, Tuhannami. Amen.

PESTA REFORMASI

Ale Tuhan Debata, Amanami, Parasiroha na sumurung ! Mauliate rohanami, ala dipasangap Ho GoarMu di tongatonganami, ala naung sahat tu hami Barita na Uli, na polin, na sian Tuhan Jesus Kristus, Tuhannami. Diboan Ho hami sian dalan haliluon tu dalan na tigor, sian na holom tu na tiur, sian parhatobanan ni dosa tu pangoloion di AnakMu, gabe bangsoM hami jala hami gabe anakhonMu. Hupuji hami ma Ho, ala tongtong hot jala mangula Barita na Uli i di hami. Ho do na mamillit angka naposoM, na mamboan Barita na Uli na polin i tu hami. Sai paian ma naposoM na burju, pasupasu nasida di tongatonganami, sai lehon ma apulapul dohot gogo tu nasida, asa unang mandele nasida manganjuanju halak na di HuriaM. Sai songgopi ma angka parjamita marhitehite TondiM asa marhiras ni roha nasida jala asa mabuor sian pamangannasida HataM na sintong i songon hababsor ni aek sian mual na denggan, na pasabam roha ni na loja jala na sorat. Molo adong naposoM di bagasan hagogotan, tibu urupi nasida, asa unang tarambat Barita na Uli i. Sai lehon ma tu HuriaM pinggol na tinggil, roha na sonang, asa dijalo nasida Hata hangoluan i. Unang loas roha ni sibuknami on mangalo sorop ni HataM, asa lam ias hami jala mangoloi di sude parentaM. Sai unang loas ro tu tongatonga ni HuriaM angka parpoda haliluon, manang sijubajabi, manang parsibalikmata angka na naeng mangaliluhon jolma i, mamboan tu hamagoan. Tagonan togihon nasida tu hamubaon ni roha, mangoloi Tuhan Jesus Kristus. Ala molo so olo nasida toguonMu, jala boanonMu tu hangoluan, padao ma nasida sian HuriaM, asa sonang HuriaM i mangoloi Ho. Sai patota ma HuriaM, lam ambolongkon sian nasida poda na so hasea. Sai tuturi angka partohonan di HuriaM, asa diboto nasida mangaturhon na denggan di tongatonganami. Sai ramoti ma na manggomgomi hami jala togutogu pingkirannasida, asa dohot nasida pasauthon lomo ni rohaM. Sahat tu Ho ma hami on, na magodang ro di dakdanak, na mora ro di angka na pogos, na martohonan ro di angka na torop, ro di sude angka ruas di bagasan HuriaM. Ia mangolu manang mate pe hami, sai oloannami do Ho di bagasan Tuhan Jesus Kristus, Tuhannami. Amen.

ARI PARNINGOTAN DI ANGKA NA MATE

Ale Tuhan Debata, na sian nahinan jala na mangolu ro di saleleng ni lelengna ! Huingot hami sadari on angka na mate sian hami, naung pajolohon tu lambungMu. Di Ho do anakhinsu ni banua ginjang, jala diungkap Ho do i di angka na mangasahon Tuhan Jesus Kristus. Na rungka do rohanami sadari on marningot ajalnami, dohot haheheon ni daging di ari sogot. Mauliate ma rohanami tu Ho, ala ditubuhon Ho hami tu pangkirimon na mangolu, gabe partohap hami di hangoluan na so ra suda. Ndada na mandele hami di ari parningotan on, alai na malungun do hami di sambulo ni tondinami. Nunga torop dongannami naung nialapMu; tau sipaingot do ujung ni langkanasida di hami, bahen pangkirimon mida Tuhan Jesus di ujung ni langkanami be. Sai sungguli ma rohanami mambahen tiruan na denggan di angka pinomparnami. Sai apuli ma na marsak roha dohot angka na matean, asa unang mangandungi jala mandele nasida. Sai taiti ma rohanasida mamereng dompak ginjang. Sai lehon TondiM tu hami asa tangkas dihatindangkon tu hami, naung dohot do hami anakMu jala panean di arta na di banua ginjang. Sai padao ma ganggu ni roha sian hami, asa hot haporseaonnami maniop Tuhan Jesus Sipangolu i, andorang hubolus hami rura linggoman ni hamatean i. Molo homur matanami be, ungkap ma mata ni rohanami asa tangkas niida dalan tu hasonangan i. Molo hallang dilanami, so binoto be mangkuling, pargogoi ma hami marhitehite TondiM i, asa tarjouhon hami: Ale Amang ! Sahat tu tanganMu ma tondingku ! Sai patiur hian rohanami, asa hobas langkanami jala sonang hami laho mate di bagasan Tuhan Jesus Kristus, Tuhannami. Amen.

PESTA ZENDING

1.       Ale Tuhan Jesus Kristus, Tuhannami jala Debatanami ! Hamuliaon dohot pujipujian ma di Ho ro di saleleng ni lelengna. Nunga ditaon Ho na porsuk, use mudarMu humophop hami pardosa, asa tu hangoluan hami. Disuru Ho do siseanMu mamaritahon Barita na Uli tu portibi on. Ala ni i do umbahen las rohanami nuaeng, ai nunga sahat tu hami Barita i, gabe jumolo hami jumpangan martimbangkon angka bangso na asing. Sai lehon ma Tondi Parbadia tu hami, asa mangoloi hami di ajar dohot poda na sian HataM i. Sai tambai haporseaonnami jala longkangi rohanami sian portibi on, asa jolma na badia jala na imbaru hami. Diparbaga Ho do oloanMu pangidoannami. Asi ma rohaM dohot di angka sipelebegu dohot halak parugamo na asing angka na hundul di haholomon i. Sai dasdas nasida ro, asa dohot nasida marpungu tu HuriaM i. Sungguli ma roha ni halak Kristen, suru ma nasida mamaritahon Barita na Uli i, asa tau sira dohot palito nasida di portibi on. Sai pasupasu ma kongsi Zending dohot angka na paturehon i. Sai suru ma angka pangula na burju tu sigotilon na lambas i, asa dipapungu nasida na tau tu harajaonMu. Sai ramoti jala pasupasu ma angka naposoM, na paratahon harajaonMu, di tongatonga ni sipelebegu dohot parugamo na asing, lehon tu nasida gogo, benget ni roha, haporseaon dohot pamompomon ni roha, asa pir tondina manaonnaon, paimaimahon angka na olo pangoluon. Sai lehon apulapul tu angka pangula naung loja, apusi ma iluilu sian matana, sai marparbue bahen ulaonnasida, asa marolopolop nasida mamuji Ho. Sai ramoti ma angka Huria, naung pinapunguM i, indukna ro di ruasna. Padao sian nasida pangaleleon manang pangarupaon ni parjahat. Sai unang loas tarambat harararat ni Barita na Uli i; sai pademak ma angka musuna. Sai arahon ma halak na di sandok tano on, asa ria nasida ro tu HuriaM, sian utara ro di dangsina, sian habinsaran ro di hasundutan, asa domu hami sada Huria na badia, na marhatopothon: Tuhan Jesus Kristus, i do Raja dohot Tuhan, bahen hasangapon ni Debata Ama saleleng ni lelengna. Amen.

*

2.       Ale Tuhan Debata, Amanami Parasiroha na sumurung ! Pinuji ma GoarMu na badia i, ala dilehon Ho tu hami Barita na Uli na sian Tuhannami Jesus Kristus. Mauliate ma rohanami, ala naung disondangi, dipatiur jala dipangolu Ho hami. Asi ma rohaM, sai lehon ma TondiM tu hami, asa diajari hami mangoloi dohot manghaporsesi HataM, asa jumpang hami hangoluan saleleng ni lelengna. Sai pasupasu saluhut bangso, asa olo nasida manjangkon Barita na Uli i. Ditonahon Ho do ingkon jamitahononhon Barita na Uli i tu sude jolma. Ala ni i lehon ma gogo dohot hiras ni roha tu angka na porsea, asa dibaritahon nasida Tuhan Jesus Kristus Sipangolu i, tu halak sipelebegu dohot tu parugamo na asing. Sai pasaut ma bagabagaM, lehon ma angka bangso bahen silua, silehonlehon tu Tuhan Jesus Tuhannami, asa upa ni halojaonNa hami sude, ala na tinaonNa i na porsuk humophop hami. Sai tarbarita ma harajaonMu tu liat tano on, bahen hamuliaon di GoarMu, jala bahen hangoluan di hami marhitehite AnakMu, Tuhan Jesus Kristus, Sipangolu hami. Amen.

*

3.       Ale Tuhan Debata, Parasiroha na sumurung jala Amanami ! Hupuji hami Ho, ala dilehon Ho Barita na Uli na sian AnakMu, Tuhan Jesus Kristus i, pangoluhon hami. Sai pargogoi ma hami marhitehite TondiM, asa huoloi hami HataM. Nunga hubege hami parentaM i. Disuru Ho do hami mamaritahon Barita na Uli, asa hubaritahon hami Tuhan Jesus, Sipangolu i, tu halak sipelebegu dohot tu parugamo na asing. Sai lam patorop naposoM, pangula sisuruon tu na di haholomon i dope. Hupangido hami dope tu Ho: Pasupasu ma Kongsi Barmen i dohot sude indukna. Ramoti jala pasupasu sude na sinuru ni Kongsi Barmen tu ganup luat. Tumpahi ma angka pangula di harajaonMu na di liat portibi on. Tumpahi sude parguruan, asa lam timbul harajaonMu, ramoti ma Zending Batak i dohot sude na mangula disi. Sai apoi hami on sude, asa marlas ni roha hami pararathon harajaonMu. Sai oloi ma na hupangido hami ala ni AnakMu Tuhan Jesus Kristus, Tuhannami. Amen.

*

Isina

BAGIAN PARJOLO                                                                                 Alaman

I.             Parturena di parmingguon ganup ari Minggu                                    3

II.            Pandidion tu dakdanak                                                                  7

III.           Pandidion na hinipu                                                                       9

IV.          Manjangkon parguru na naeng tardidi                                              10

V.           Pandidion tu na magodang                                                            11

VI.          Manghatindangkon haporseaon                                                      13

VII.         Pabagashon                                                                                 16

VIII.        Patujolo ni ulaon na badia                                                              18

IX.          Marulaon na badia rap dohot patujolona                                           20

X.           Parpadanan na badia

              A. Di Gareja                                                                                 23

              B. Di Huta                                                                                    25

XI.          Mananom na mate

              A. Na magodang                                                                          28

              B. Dakdanak                                                                                29

              C. Di parbandaan                                                                         30

XII.         Pasahathon dongan tu uhuman Huria

              A. Panguhumon parjolo                                                                31

              B. Panguhumon na dokdok situtu                                                  31

XIII.        Paluahon angka na hona uhum parhuriaon                                      34

XIV.       Manjangkon Sintua                                                                       35

XV.        Pasahathon Tohonan Haguruon                                                     37

XVI.       Pasahathon Tohonan Hapanditaon                                                 39

XVI.       Pasahathon Tohonan Parjamita Ina (Bibelvrouw)                              44

XVII.      Pasahathon Tohonan Diakones                                                     46

XVIII.      Mangompoi Gareja                                                                      48

XIV.       Mameakhon batu ojahan ni Gareja                                                50

BAGIAN PADUAHON

A. Angka ayat sidohonon di ari Minggu dohot di ari pesta:                        Alaman

I.             Adventus                                                                                           53

II.            Pesta Hatutubu ni Tuhan Jesus                                                           54

III.           Taon na imbaru                                                                                  54

IV.          Epiphanias                                                                                         55

,V.          Tingki panaonon ni Tuhan Jesus parjolo                                                55

VI.          Tingki panaonon ni Tuhan Jesus                                                          50

VII.         Parningotan di hasasahat ni ulaon na badia                                          58

VIII.        Ari hamamate ni Tuhan Jesus                                                             58

IX.          Ari haheheon                                                                                     58

X.           Tingki haheheon                                                                                59

XI.          Hananaek ni Tuhan Jesus                                                                   60

XII.         Exaudi                                                                                              60

XIII.        Pesta Pentakoste                                                                              61

XIV.       Trinitatis                                                                                            61

XV.        Tingki Trinitatis                                                                                  62

XVI.       Pesta gotilon                                                                                     65

XVII.      Pesta Reformasi                                                                                65

XVIII.      Angka Minggu di ujung ni taon Huria                                                   66

XIX.       Ari panopotion di dosa                                                                        60

XX.        Parningotan di angka na mate                                                            67

B. Tangiang panopotion di dosa                                                                 68

C. Angka bagabaga dung salpu ta~iang manopoti dosa                            71

D. Angka tangiang laho mamungka di angka ari pesta

I.             Adventus                                                                                      73

II.            Pesta hatutubu ni Tuhan Jesus                                                       74

III.           Taon na imbaru dohot ari Minggu na mangihut tusi                           75

IV.          Epiphanias                                                                                    75

V.           Tingki panaonon ni Tuhan Jesus                                                     76

VI.          Ari hamamate ni Tuhan Jesus                                                         78

VII.         Pesta dohot tingki haheheon                                                           78

VIII.        Rogate                                                                                          79

IX.          Hananaek ni Tuhan Jesus                                                               79

X.           Exaudi                                                                                          79

XI.          Pentakoste                                                                                   80

XII.         T r i n i t a t i s                                                                               80

XIII.        Dung Trinitatis                                                                                80

XIV.       Di Minggu jumpa manjalo tohonan hapanditaon                                 85

XV.        Tangiang jumpa masa pesta Huria                                                   85

XVI.       Tangian mangido ari na hasea                                                         86

XVII.      Pesta gotilon                                                                                  86

XVIII.      Tangiang jumpa sega na niula                                                          87

XIX.       Pesta Reformasi                                                                             87

XX.        Tangiang di ari parningotan di angka na mate                                    89

E. Angka tangiang dung sun mariamita

I.             Di ari Minggu                                                                               90

II.            Angka tangiang di ari pesta dung salpu marjamita                           92

              Adventus                                                                                      92

              Pesta hatutubu ni Tuhan Jesus                                                      93

              Taon na imbaru                                                                             93

              Epiphanias                                                                                   94

              Pesta hamamate ni Tuhan Jesus                                                    95

              Pesta haheheon ni Tuhan Jesus                                                     95

              Pesta hahanaek ni Tuhan Jesus                                                     96

              Pesta haroro ni Tondi Parbadia                                                       97

              Pesta Trinitatis                                                                              97

              Pesta gotilon                                                                                 98

              Pesta Reformasi                                                                           99

              Ari parningotan di angka na mate                                                   99

              Pesta Zending                                                                             100

=***=